نافع كُراع الكرسي إن بقت كراع عنقريب ما كان لحقتو علي فضل بالملاريتعذيب صاح ولا ما صاح ؟؟

من الحاجات الما بتبرر إطلاقاً العنف
يستوي في ذلك العنف اللفظي والجسدي
فمن غير المقبول أن يكون الحوار بالألسنة الزفرة
ولا بالأيادي والأرجل ذات العضلات المنفلتة
فالبني آدم دا "خيتو رقيق" ممكن باللسان تجيبو أرضاً
وفي حالات كتيرة ما بكون الجناة على معرفة بالظرف الصحي للمعتدى عليه
وفي السوابق القضائية حالات كتيرة لموت المجني عليهم بـ "مُطرق" مثلاً
في السودان "السياسي" سجالات كتيرة أستعملت فيـها ألفاظ تندرج في خانة العنف اللفظي
وإستعمال الأيادي والأرجل نادر جداً في الحياة السياسية والحمد لله الحالات بسيطة
وأشهرها "بُنية كندا ..هاشم بدر الدين 1992" التي كادت أن تودي الترابي في داهية
ومع ان البعض "طاروا فرحاً" إلا ان السودانيين عموماً إستهجنوها على ما أذكر وقتـها
الحادثة التانية السنة الفاتت "سجة البشير بالبرطوش" والحمد له البرطوش طلع "رطب" بلاستيك
وقبال كم يوم تناقلت الأخبار دقة نضيفة أخدا نافع علي نافع ووين ؟؟ في السفارة السودانية بلندن
وأظنو "الدقا" واحد من مطاريد الإنقاذ الذين تعج بهم دول الغرب
حسب الروايات قالوا نافع إتلامض "شوية" في رده على سؤال حول ملفات التعذيب بواسطة واحد من الحاضرين ونافع "حقروا"
ومعروف عن السودانيين ..أي شي إلا الحقارة ...... بشيل القدامو وبخمك بيـها
ما بتذكروا قصة الجزار مع واحد من زباينو ؟؟ لبعة واحدة خلاهو ممدد في العناية غير المركزة بين الحياة والموت الله ساي شاف ليهو
المتحري لمن سألوا قال ليهو "الشي سجاك بي شنو خلا دمك إشُر ؟؟ "
بصعوبة "متحاملاً على نفسه من شدة الألم "
"والله ياجنابو قلت ليهو أديني ربع كيلو شرموط قام أداني ليهو عضم ولمن وريتو العضم شال الدُرج سجاني بيهو"
وإتضح في النهاية بأن الراجل "إنسجا" بالمركوب "قطع جنينة" ناشف قرب يوديهو في داهية
أها نافع كان نصيبو "كُراع كرسي خيزران" والحمد لله ما بقت كُراع عنقريب كان دكتورو يسنتت لي حسي
عموماً الناس بعدا تعمل حسابا وأنا غايتو ما حا أتلامض علي أي زول لابس مركوب"قطع جنينة" ولا قاعد ليهو في عنقريب
زول واقف علي حيلو ولابس رطب ولا سفنجة أهلاً وسهلاً .. لابس مركوب أو بوت إفتح الله وياروح ما بعدك روح
وناس لندن غلطانين "ياحليلم" قايلين نافع قتل دكتور علي فضل بالتعذيب !! أبدا شهادة الوفاة أثبتت الوفاة بالملاريتعذيب
ومافي داعي للملاقطة بكرعين الكراسي والعناقريب في عاصفة بريطانيا "لمضن" صاح ولا ما صاح
أسي بكرة "يات من هي تمش " سعد قشرة " وتقول ليك دايرة "توب رسالة لندن دقة نافع "
ونبقى في الإعتقالات وملارية التعذيب وشهادات الوفاة "المضروبة بي كرعين الكراسي والبنابر والعناقريب"