يوميات صائم ( اليوم الأول )

قمت مفزوعة من على سريرى وقد خيل لى انى اسمع ( الصلاة خير من النوم ) فقد نمت فجأة قبل ان اتناول شيئا والحمدلله لازال هناك وقت ساغلق البوست واتجه الى المطبخ لاعد وجبة العشاءرمضان كريم وكل عام وانتم بخير
في رمضــان ::: أعد ترتيب نفسك لملم بقاياك المبعثرة اقترب من أحلامك البعيدة اكتشف مواطن الخير في داخلك واهزم نفسك الأمّـارة بالسوء ... تصوموا وتفطروا على خير.

رمضان كريم
والسنة الجاية تتحقق الأماني الطيبات
وننتهز هذه "السانحة" ونحي كل الأعضاء والمتصفحين ونقول ليهم كلهم كل سنة وأنتم طيبين

كل عام والجميع بالف خير وعافيه ..
بختكم يا ناس السودان .. نحن نفطر بعد فطوركم بثلاث ساعات ونصف ...
والله ما عارف كان يومى ده صيام ولا لا .. لانو شربت مويه الساعه اربعه صباحا ووجدت فى النت ان الامساك ثلاثه ونصف صباحا .. عاد ده كلام ده!!!!

نشاط حيوية
الكل يشعرك بان هذا القادم جميييييل
تصوموا وتفطروا علي خير

يا مقدم الاقتراح .. اى موضوع ينزل قبل الساعه 12 منتصف ليل السودان غير محسوب كيوم جديد .. ما تدونا السهر ساكت .. انا ساجاهد لاحتفظ بالهديه المقدمه منى لنفسى .. الباقين اجتهدوا فى الثلاثه الباقيات ..

الأطفال لا يصومون ولكن لدينا طرق خاصة في تجويعهم ومعاملتهم معاملة الصائمين
فالإمساك عندهم لا يبدأ إلا في السابعة صباحاً بعد شرابـهم لبقية الشاي بتاع السحور
وممكن يكون في بقية "عيش أو رز بي لبن" وبواقي الآبري الأبيض "ما بتشرب في السحور"
ولديهم تراخيص "وجبات متفرقة" يبرزونها كلما رصدتهم رادارات الصائمين الزهجانين من الصيام
فيزورون "الأزيار" كلما داهمتـهم فكرة "العطش" السائدة في رمضان ويبالغون في شطف الموية الباردة
"آآشافع الليلة ما عندك شغلة غير الأزيار زي ود أبرق كل دقيقة جائي ناتح ليك كوز !!"
وينتهي "صيامهم" قبل آذان المغرب بقليل "هاك آآشافع ضوق لي الآبري دا طاعم ولا مسيخ"
بصراحة لا يحتسب الصيام "عندنا" إلا بالتفريط في متطلبات الأطفال يعني صائمين وحقارين في وقت واحد "إلا من رحم ربي"

ويا طالع الشجرة .... ......
جيب لي معاك ثمرة... .......
أطفالنا نور العين.. .........
الغيمة والمطرة... .......


لا جبت لي لعبة تكون ،،،،،،،،
في ذاتـها مبتكرة،،،،،،،،
لا جبت لي اللون ،،،،،،،،
لا لوحة منتظرة،،،،،،،،
لا مصحة جمب البيت ،،،،،،،،
لاالسكة مختصرة،،،،،،،،

يا طالع الشجرة
كان عندي كراسة
وكان معاها كتاب
كان أطفالنا تقراه
كان نلقى لينا علاج
كان درنا نلقــــاه
وكان حليبنا كتير
موجود وبي وفرة
يا طالع الشجرة

الجميع كل سنة وانتو طيبين .....تصومو وتفطرو على خير .بكتب وانا فاطرة (مش ما صمت ؟؟؟لا اليوم عندنا انتهى ليه 4 ساعات وبفكر فى العشاء .....وكل مرة يعاودنى الحنين ترجع بى الزاكرة الى الخلف حيث رمضان هنااااااااااااااااااااااااك فى الحصاحيصا وبين الاهل واللمة ........وتراويح مسجد حى العمدة ......ولاننى مرضع فقد اكتفيت بوجبة خفيفة فى عشاء البارحة واصبحت عليها صايمة ..لم احس باى مشقة ولا تعب .فالصيام راحة للنفس والبدن ....انتهى يومنا الاول وبعد قليل يبدأ الثانى ونحمد الله ان هدانا ووفقنا .......اللهم اجعلنا من عتقاء هذا الشهر المبارك

باشمهندس بكـــري والجميع

رمضــان كـــريم

يعني كــده يا بكـــري أنتو بتعيــدوا بعـــدنا بأربعـة ســـاعات (الرياض) بعـد ما الكعك يكمل...

حقيقة يا أخــوة لي ما يربـو عن 15 عام صيام خــارج الســـودان ... يا ترى ما زال رمضان في الســودان كما هــو ... يعني لسع في صواني بتمرق الشارع ... ولا كمان الحال اتبدل ... أرجو أن لا يكون ذلك.

أحمــد سركيس

يا أم رامــا إنت في الصين ولا شـــنو

أحمد ســركيس

يا أم رامــا

طبت وطابت رامــا

رمضان كـــريم

إنتي في الصين ولا شـــنو..

أحمد سـركيس

رمضان كريم يا اخ احمد ودمت ودام وصالك .انا فى ماليزيا .......وفاطرة مع حاراتى السودانيات .......وازواجنا عاملين افطارات زى السودان (صوانى تطلع الشارع )

أم رامــا

حياك الله وحفظك

والله خـبر جميــل ... يا ريت العادة السمحة تنقـل إلى بقيـة الشـــعوب....

حقيقة أنا سـافرت لبلدان ليست بالقليلة وصادفت فيها شهر رمضان ... ولم أجــد ما يشبه هذا التقليــد الســـوداني ... أتمنى أن لا يكون قد اندثر في الســـودان مع هذه الهجمـة الشـرسة على عاداتنا وتفاليدنا ومبادئنا وأصـولنا.

حقيقة ما جعلني اتســاءل وأن ملئ بالخــوف ... كلما شــددت الرحال إلى بلادي الحبيبة وجـدت عادة أو تقليد أو مبدأ أو أصل قـد اندثر أو على الأقل أهمل.

تحباتي لزوجك وعائلتك

أحمد ســركيس

رمضان كريم وكل عام وانتم بخير

اول يوم في رمضان دائما ما يكون من اصعب الايام لان الجسم يكون في حالة تغيير
وقد صحيت اليوم متاخرا عن مواعيد استيقاظي بساعتين تجنبا للصداع الذي يصيبني
دائما في اليوم الاول من رمضان ولكن ذلك لم يمنع الصداع الذي لاذمني حتى الان

ذهبت الي السوق بواسطة المواصلات , وصلت السوق وفتحت المقهى وفتحت جميع
اجهزة الكمبيوتر - ولكن في الخارج وجد اثين من الشماشة يشمون في السلسيون
طردتهم من امام المحل ولكنهم عادوا بعد قليل للمشاغبة فما كان مني الا ان حملت جردل
الصابون الذي استخدمة للنظافة وسكبته فيهم وقد ابتلوا بمياه الصابون وفروا هاربين

ثم ذهبت الي البنك السوداني الفرنسي لاسلم اختي الموظفة في البنك جوالها الذي
نسيته في المنزل وعند مروري وجدت السوق فاضي وخالي من المارة في جميع الشوارع
وذهبيت لاشتري كهرباء وجدت زحام شديد امام مبني الكهرباء وعلمت ان هناك مشكلة في
شبكة الكهرباء فقررت شرائها ليلا

صورة للشماشة وهم يشمون السلسيون



صورة لزحام المواطنين امام عمارة الدفع المقدم

اليوم الاول عدد المتداخلين 12
1. حسن وراق تجاهل السحور مع سبق الاصرار والترصد
2. د. بكرى تناول السحور بعد الثالثة والنصف ( يا مغربى فتوى مستعجلة )
3. ود الاهلية وكوثر يوسف لم يتناولوا السحور (نوما ) على وزن سهوا
4. المنصورى لم يتناول السحور ( قلة حيلة )
5. المحبوب يترتر فينا البوست كله مع الشفع مافهمنا صايم معانا ولا فاطر معاهم
6. ام راما فطرت قبالنا وصامت قبالنا وشكلها كده لما يسخن رمضان حتستخدم فيتو المرضعات
7.احمد سركيس بدا يفكر فى كعك العيد وشايل هم بكرى الما حيحصله
8؟ الرشيد حبيب الله فى حالة طشاش
عبداللطيف عوض الله عدى نهاره كله نوم وفى النهاية مشى الكهرباء
9. ود عيسى مزاجه عالى شديد (يا ربى صايم ؟)
10. صداح وراق فطر فى جبال النوبة وصلى المغرب فى الصومال