ذكريات كومر

ذكرياتي مع الحلة الجديدة في بداية الطفولة الاولي وكان ذلك تقريبا سنة1965- 1966 ووجدت نفسي بمنزل جدي عليه رحمة الله /عبدالرحيم احمد الحسن(الجمل) حيث كنا نقيم فيه مع جدي ولازال منزله بالحلة الجديدة ويفتح جنوبا في الشارع الكبير او شارع الخور كما كنا نسمية وهذا الخور كان المجري الرئيسي لمياة الامطار المنحدرة من المنطقة الغربية للحصاحيصا (كمبو المحالج والجملونات وربع الخراب ومياة الحلة الجديدة نفسها) وكانت تصب في النيل الازرق( البحر) واذكر ان منزلنا واغلب منازل الحي ان لم يكن جميعها ليست بها كهرباء وكان الناس يستعملون الفانوس لتسهيل حركتهم ليلا وكان يستعملون الرتائن في في مناسبات الافراح والاتراح والرتائن هي ايضا فوانيس ولكنها بشكل احدث وفي ذلك الزمان كان يباع الجاز بواسطة فناطيس متوسطة الحجم تقريبا نصف طن عليها شعار شركة شل او شركة اجب وكانت تجر بواسطة حصان وتمر علي كل منازل الحي وتقوم بتوزيع الجاز باسعار بسيطةوكان اشهر بايعي الجاز بالحلة الجديدة علي عبدالرحمن الشهير بعلي جاز والمرحوم الخليفة محمد محجوب له الرحمة وذكر في هذه السنين كانت بداية تركيب شبكة المياة بالحلة الجديدة وكانت المواسير وصلت لبعض سكان الحي والبقية يقيمون بشراء المياة من الخراجة والخراجة هم اشخاص يعملون بنقل المياة من النيل بواسطة حمير علي خرج يصنع من جلود الابقار ويملاء بالماء ويضع علي ظهر الحمار ويبدأ بيعه بالحي واغلب الذين يمتهنون عمل الخراجة هم من ناس الحي والطلبة في فترة اجازاتهم اوبعد نهاية اليوم الدراسي==
وكان بالحلة الجديدة سوق يسمي بالسوق الصغير يقع في الجهة الجنوبية الغربية للحلة الجديدة وكان به مخبز بلدي ملك المرحوم عبدالخفيظ عائد ( جد وليد العشي) وكان يوجد به نجار وقهوة واعتقد عدد من الدكاكين الصغيرة وبداخل الحي كان يوجد دكان المرحوم/ محمد السيد( والد فائزة السيد) ودكان محمد عثمان ( والد مبارك محمد عثمان ) ودكان المرحوم/ الامين ابوشنب ودكان باشري ودكان المرحوم خليفة كرومةولا اذكر سوي تاكسي واحد للمرحوم عوض بشيروتوجد طاحونة المرحوم علي يوسف بالقرب من مسجد الوداعة عثمان وطاحونة المرحوم عثمان حمد ( والد بكري عثمان حمد ) وكانت مجاورة لمنزل المرحوم محمد السيد
وبداخل الحلة الجديدة كانت توجد شجرتان مشهورتان جدا والاثنين كانتا بالشارع الكبير ( شارع الخور احدهما بالقرب من منزل المقاول عبدالوهاب جيب الله وهي شجرة حراز والثانية بالقرب من منزل السعيد احمد السعيد وتسمي السيالة وجل وقتنا ونحن صغار نقضيه تحت ظلال الشجرتين وكانت شجرة السيالة عبارة عن موقف لتاكسي عوض بشير وكان ياتي مساء كل يوم باص المرحوم العيس ينقل ناس الحي الي المستشفي لمعاودة المرضي والعودة بهم للحي
لنا عودة انشاء الله

يا كمال ما شاء الله انت قدر كده ، انا فاكر نفسى كومر بعد ناس وراق وبكرى طوالى لكن يبدو انى مكبر نفسى ساكت . انا اتولدت فى الحى الاوسط لقيت المويه فى الماسوره والكهرباء موجوده ،وكانوا بحكوا لينا عن الخراجه والرتينه . ربنا يطول عمرك .

.. كمال الجمل الفيك اتعرفت .... الله يحلنا من بركة !!!!!!!

تحياتي الاخوة عبدالوهاب والاخ وراق وراشد الجاك وشكرا علي المرور والتعاليق الجميلةوانا من مواليد23/ 4/ 1961م
وبعدين ياخونا موية الخراجة حتي السبعينات موجودة واذا كنتم انتم مولودين بعد السبعينات والله فعلا صغار وبعدين انا ذكرت دكان محمد عثمان والد مبارك لان مبارك واخوه ابراهيم كانوا هما المتواجدان في الدكان باستمرار يعني ابراهيم يمكن يكون دفعتنا ومبارك كان كبير شوية يعني ماكتير بس انا متاكد راشد الجاك صغير ويمكن يكون ماشاهد الخراجة وباص العيس ولم يشاهد الرتينة وبالمناسبة ياراشد انا امتحنت من الابتدائي الي الثانوي العام سنة 74 وكان مدرسة الحصاحيصا الشمالية غير مضاءة وكنا نذاكر فيها بالرتاين
وثانيا يا عبدالوهاب انا بتكلم عن ذكرياتي بالحلة الجديدة ماعن الحي الاوسط
فتكم بعافية وسنواصل الذكريات

دقيقة ياكومر قصدى ياكمال ....... ماتكروتنا ساكت .... الكلام ده داير ليهو قعده .. قلت ابراهيم اصغر منى ( امانا ماوقع راجل) بعدين وراق قال ضاريه الشيب ( هو وينو ) وفايزه قالت ما متذكره ونحنا بنقصد اختا الكبيره وكيشو لزم الحياد ...وعبد الوهاب اتولد مع العولمه ...اسمع كلام راشد ده .. هلا هلا على الجد ... انعدل لى سمح انا جايييييييييك ... وثق لذلك الزمن الشفيف وبتلقانى فى طرفك

التحية لك اخى العزيز كمال
والله اتحفتنا بذكريات رائعة
نحتاجها
لكن عندى سوال السعيد احمد السعيد ده نسيب ناس العشى

سلامات الاخوان / عمار تلودي وبكري عثمان ولكم شكري علي مروركم الجميل ونعم يا اخي ان السعيد هو نسيب وليد العشي واوعدكم بالمواصلة في هذا الموضوع انشاء الله
ولكم كل الود

سلامات ونحن كنا مع باص العيس عليه رحمة الله وطبعا زي ماقلنا باص العيس ياتي الي شجرة السيالة يوميا مساء لنقل ناس الحي الي المستشفي وبالعكس وكانت ماكينة الباص تدور بمنفلة( اسأل الكوامر المعاك ياراشد عن المنفلة لاني ماحاقدر اشرح المنفلة هنا) والباص بابه بالخلف وله كنبتان علي يسار ويمين الباص عند دخوله وبه ماسورة في السقف يمسكوا فيها الواقفين وغالبا يكونوا من الرجال0 وكانت اجرة الباص قرشا0وكما ذكرنا كانت توجد شجرة اخري تسمي الحرازة وتحت هذه الشجرة كانت ام بتو عليها رحمة الله في بداية كل موسم خريف تعمل كرامة تحت هذه الشجرة احتفالا بقدوم الخريف وكانت تذبح خروفا وتشد بليلة الذرة وتقوم بتوزيع اللحم والبليلة لناس الشارع الكبير وكان ناس الشارع يساهمون في شراء الخروف والذرة ومستلزمات الكرامة
وكان بالحلة الجديدة نادي الشبية وهو منزل مستاجر مبني من الطين وكان يفتح علي منزل المرحوم/ محمد السيد والد ( مصطفي لياقة) وحسب ماسمعت كانت هناك مواقع اخري وكان بالنادي بوفية وكان اغلب سكان الحي يتعشون منه وكان يديره الخير محمد الخير والد ( ياسر الخير) اطال الله عمره وكان نادي الشبيبة عامرا بشباب الحلة الجديدة وكانت تقام فيه الليالي الثقافية والملاهي والكلام عن نادي الشبيبة يطول ويوجد من يتحدث فيه اكثر مني ( وانشاء الله نستضيف احد مؤسسي نادي الشبيبة في الحصاحيصا كوم للتحدث عن النادي باسهاب وانا اقترح وليد العشي لاستضافة مصطفي لياقة في المنتدي ليحدثنا عن نادي الشبيبة)
وايضا تكونت بالحلة الجديدة اول فرقة جاز بالحصاحيصا في ذلك الزمان علي ما اعتقد وسميت بفرقة العفاريت وتتكون الفرقة من اسحاق وشقيقه المرحوم خلف الله رزق وسمير علي رستم وعليكو ويعقوب الاشول وعدد من العزفين وكانوا مستاجرين منزل يعزفون فيه وكان جوار منزل المرحوم المقاول عبدالقادر عبدالرحيم عليه رحمة الله وكانت هذه الفرقة ايضا تهتم برياضة رفع الاثقال وكانوا يتدربون في نفس المنزل رياضة رفع الاثقال وايضا كونوا فريق لكورة القدم اطلق عليه اسم العفاريت وفما بعد تحول الاسم لفريق النجوم واخيرا سمي نادي الموردة وهو نفس نادي الموردة الموجود حاليا بالحلة الجديدة وبعد ذلك فرقت باعضاء فرقة العفاريت السبل وصروف الحياة وعلي انقاضها تكونت فرقة يعقوب الاشول وهي الان موقعها الامتداد منزل يقعوب
ولنا عودة

.. استاذ كمال المنفلة انا بعرفها ماعندك مشكلة ....
بس كلامك دا ماعندو علاقة بالمنفلة ...
انت قربت تقول لما عمارة دنقس كان بجى يتعشى فى بوفيه الشبيبة

واصل هذا السفر الجميل .. فانه يذهب بما صدأ فى النفوس ..
والله يا كمال لو الكوامر الجد كتبوا كان اتو بما لم ياتى به الاوائل ..تقول لى منفله .. ..

يا كمال، ما شاء الله ، ذاكرة شابة ، اما جماعتك من فيضان 46 ، ديل عاملين
فيها شباب ، تعرف وراق عندما كان يعتقلوه ، كنا بنلعب (البلى ) فى ضل الضحى ،
ومبارك من زمن الناظر المرحوم محروق ،عبد الوهاب ، بيلعب الدافورى مع التيمان
وشوقى العوض فى العالى (نادى الاهلى حالياً ) ، اما راشد يخطو نحو الكومرية
بترس تقيل !!! بالمناسبة الفرقة اسمها العقارب .

أخونا كمال الجمل يا زول ده كلام شنوا البتقول فيهوا ده والله ده ذكريات جميلة ... الحمد لله الما قلت بيت ناس الجاهوري ولا ذكرت اسم مدثر لحدي الآن طبعاً المعلومات ده أول مرة أسمع بيها ... بعدين أحذرك ثم أحذرك تقول أنا ومدثر قرينا سواء في الحصاحيصا القديمة وإلا لحقناك مبارك وحاكمناك بقانون الطوارئ ... واصل يا كومر يا عجوز

ياكمال
كويس امنتا على نادى الشبيبه الفاتح على منزل عمنا ود السيد ( القالت) فايزه مابتعرف عنو حاجه وسمير على رستم ووالدته ( فاطمه) واخواه عماد وصفيه واسيا ديل كان بيتم جوار النادى على جهة اليمين .. وخلف النادى منزل محمد صالح والد ناس اسامه وعاصم وسوسن ... ودكانا كان ناصيتو ناس ( ستنا وفاطمه الطويله ) بنات الرحمه
واصل واوعك تلاوز من قانون الطوارى بتاع الجاهورى ده ... تتذكر زمان فى العياشه فى السوق كانوا اصحاب العيش بختو ليهم دمية كده عباره عن زول فى كوم العيش عشان تخوف الطيور ما تجى ترك تاكل العيش ده قانون الطوراى بتاع مدثر ده

يا سلام
واصل يا كمال
لانك ح تظهر لنا كوامر كتيرة

شكرا للمرور الجميل راشد ومدثر وعاطف اسماعيل ومبارك وعمار تلودي ومروركم دفع فيا روح التواصل ولكن اخي عاطف الفرقة اسمها العفاريت ولكن حول اسمها يعقوب الاشول الي العقارب بعد ان تركوها المؤسسين
ولكم كل الود

ذكريات جميلة احسبها وممتعة رجاء لاتقف واصل في كتابتها يااستاذ كمال

يا سلام عليك يا كمال الجمل واصل واتحفنا بالزكريات الجميلة
المنفلة دى يا كمال قريبة ونحن عاصرناها
تخريمة
ياكمال دحين مدثر الجاهورى دا ما اكبر منك ولا شنو

سلامي محمد علي حبريل
سلامي علي سركيس
وشكرا علي مروركم الانيق واكيد حانواصل
ويا علي سركيس الاخ / مدثر اصغر مني في العمر بس يا علي انا عارف الاجابة دي ماريحتك0 وطبعا انت شفته قال لي ما تقول مدثر درس معاي في الحكومية القديمة0 لكن برضو انا اكبر منه
لكم كل الود

ياكمال وهاشم ابوشوره ... والله تقول اكبر منك اخليهو يسجل هدف بى ( ركبتو) هههههههه

استاذ كمال لك التحيه والتجله علي هذا السرد التاريخي الممتع

ياابو كمال وينك؟ ووثَق للشبيبة وللحلة الجديدة . نحنا في الانتظار.

يا ابوكمال :
مبارك الربو بيقول ان لمن هو كان طالب مدثر الجاهوري كان بيشتغل في الهيئة القومية للكهرباء!!!! الكلام ده صاح يا ابوكمال؟ اصحي يا جاهوري