قبال كم يوم أخت زوجة الرئيس "الزوجة التانية" ناسية آلاف الدولارات والريالات في شنطة
قولنا إن شاء الله ربنا يجمع بالشنطة وإستجاب المولى للدعوات وإتلقت الشنطة تامة ولامة
ولمن كترت "الشمارات" وإنتشر الخبر وعم أم القرى وسمع الماحاضر وأصبح موضوع المنتديات
جاء الرئيس "شخصياً" وصرح "القال ليكم منو مرتي" إشترت بيت الشيخ مصطفى الأمين ؟؟
لكن الكلام ياحضرة الرئيس ما كان "المدام" بل عن أختـها "شفتو كيف" وعن "شنطة رايحة"
المهم العريس "الغلبو الصبر" دخل لينا بحمد "حرمو وقطوفو" ومرق لينا بخوجلي "وضعو وظروفو"
ياخي نحن مالنا ومال "مرتك" إشترت ليـها بيت في "اللا ماب" ولا دخلت ليـها في "ختة ولا صندوق"
البلد "تئن" وإنت "تتدرق" تدافع عن "ثراء" الهانم وإخواتـها "المُودِرات " يعني دا أكبر همك ياكيس؟؟
وهو يعني "الشمارات" بس جات مع الشنطة "الرايحة وإتلقت" ولا مع بيت الشيخ مصطفى الأمين ؟؟
مافي كلام كتير بدور عن ثراء ناس حمزة والعباس وعن الشركات والصفقات الجابت خبر بانقا
وقبال كم يوم كمان تابعتو تصريحات "أميرة قرناص" زوجة وزير الخارجية الوجيه "علي كرتي"
سبب تصريحات "قرناص" مناسبة تعيينـها سفيرة لجمهورية "الإخوان" في جمهورية إيطاليا الشقيقة
و"جل" تصريحات الأميرة "إنكبت" في إدارة شئون بيت "الزوجية" و"كي" ملابس الزوج "المكرفسة"
بالله في "إمرأة" عاقلة كان "قديمة ولا جديدة" يكون أفضل إنجازاتـها كزوجة "طِريح هدوم راجلا"
تكوي ليهو هدومو ولا "تطقطقي ليهو أصابعينو" دي ما حاجة خاصة نحن علاقتنا بيـها شنو ؟؟
وأظن لو ما الدنيا رمضان كانت دخلت لينا في تفاصيل الغسيل و"شر الملابس" في سلك البلكونة
طبعاً "حبل الغسيل في البلكونة " فالحوش مقسم حدائق وأحواض سباحة للأولاد المحظوظين
"راجلي (( اللهوكرتي )) مقتدر وربنا فاتح عليهو ..شنو لو عمل حوض سباحة للأولاد في البيت ؟ "
فدافعي عن حق الأولاد في حوض للسباحة في البيت وإن شاء الله يطلعوا زي كيجاب وسارة جاد الله
وعلى قول زهير ابن ابي سلمى : ومن لا يزد عن حوضه بنفسه….يهدم ومن يخالق الناس يعلم .
وهو يعني معقولة أولاد وزير الخارجية حا يعومو في البحر المويتو بقت زي موية المواسير دا ؟؟؟
وربنا يوصلك بالسلامة لإيطاليا وأمشو عومي أولادك هناك والبندقية البتلعلع دي نحن اولى بيها
وقصتـها عن "الطماطم" "مبالغة" كيف حوض للسباحة والبيت بدون طماطم بعد وصلت 12ج ؟؟
صدقنا الطماطم خليتوها لأنـها غالية أها و"تقلية" رمضان ؟؟ ما تقنعينا بأنكم شغالين "أم شعيفة" ؟؟
كرتي يعتزل الطماطم "للغلاء" دي معقولة يا "أميرة الحسن هل صعبت ظروفك" للدرجة دي ؟؟
ناس مدغمسة وناس مدقسة !! أها اللحمة الكيلوها بي قرشين ونص دي بتجيبـها ليهو من وين ؟؟
والرغيف أكيد بتجيبوهو بي شِلِن يقضيكم الإسبوع كلو والله العظيم طلعتو تفاتيح ونحن مدقسين
وأكيد أقساط "جامعات الأولاد" ما بتزيد عندكم عن "طرادة" شوف نحن "الراس" عشرة مليون
لو أي واحدة "تانية ولا تالتة" كانت كلمتنا عن توجهاتـها كـ "إمرأة" في تطوير العمل الدبلوماسي
أو على الأقل تحدثنا عن خروج "المرأة" وإقتحامـها للعمل في ظل قوانين "التأصيل" المقيدة لحريتـها
القيود التي يسعى "الأزواج" لتكريسـها "إنتقاصاً" من حقوق المرأة التي إكتسبتـها في نضالـها الوئيد
"الأزواج المذدوجين" الذين ينادون بعودة المرأة إلى البيوت ويشدون "رحال" زوجاتـهم إلى روما !!
يتشدقون بحرية المرأة في مجتمعات الدبلوماسيين وينكحون ما طاب لهم منها مرتين وتلاتة مرات
ومع دا كلو تجي السفيرة وتأمن لأولادها حوض سباحة في البيت العدمان الطماطم ... الله يطمم بطونكم
موضوع: رئيس الرساليين يدغمس ثراء زوجته "التانية" !! وزوجة وزير خارجيته "الأخرى" التي تم تعيينـها سفيرة لـ "الإخوان" في ايطاليا قالت كرتي يقاطع الطماطم !! 
الإثنين 22 أغسطس 2011 - 8:02
