قلب أب حب

قلْبْْ أبْ حَبْ
كان ليل غريبْ
مرسوم على عيونه السهر
فتح المدى شباك يطل على القمرْ
جنب القمر كانت حكايته بتترسم
رقصة أميره .. وخوف وحيره ..
حاجات كتيره ..
عيون جميله بتبتسم
لمسة حنانْ ..
مسَحِت على خد الزمانْ
عدِّت حدود النبضْ
دابت فى الكيانْ
حَسِّ بأمان
من عُمر جرحه محَسهوش
قدَّام عنيها إتبخرتْ
كل الملامح والوشوشْ
فجأه ارتجفْ
رعَدِت عنيه .. برَقِت دموعه
وْبين جفونه انْسال مطرْ
لمَّا افتكرْ
يوم ما انكسرْ
قلبه البرىءْ
على إيد رفيقْ عمره اللى كانْ
فاكرُه الحياهْ
سافر معاهْ
مشوار حنينْ
وفْ يوم حزينْ
لِقيوه على جنب الطريقْ
راجع لوحده من السفرْ
من يومها والشباك عليه مليون ستارْ
نِسْيتْ عنيهْ لون النهارْ
والعمر دارْ
وسنين مَرارْ
ومكنش يعرف إنه حيقابل عنيها
يرتعش من تانى نبضه
وجوا بردُه يْحسِّ نار
بَصْ فْ مراية عمره شاف بُعد الزمنْ
تجاعيد بتزحف فوق ملامحه
وْلسه جرحه فْ لون عنيهْ ..
رعشة إيديهْ ..
بسمِةْ شجنْ
غمَّض عنيهْ
مِن قد إيهْ
وحشاهْ قوى كلمة حبيبتى
راح يدوَّر فى الحروفْ
يتهجَّى حرفْ فْ حرفْ
خانه النُّطق
تاهت لكْنتهْ
حرمان وخوفْ
فجأه انتبهْ على إيد بتمسح دمعته
وضفيره مجدوله ببراءة سنها
رسمت مكانها ف قلبه قبل مخدته
بتقوله مش حتنام فى حضنى
قاللها حاضر ح .. ب ..ي .. بْ ...
حاضر حبيبتى
خلاص نطقها وْحَس بيها بطعمها
أجمل حبيبتى نطَقها قلبه
وراح لها
قفِّل شبابيك المدى
شد الستاير كلها
لملم دموعه وخبَّى حرمانه فْ ضلوعه
وجنْبها ..
مدِّدْ سنين العمر تنهيييييييييييده
براح الكون يئن بْحِملها
فردت إيديها .. عنيها قالت ضمنى
يكْفيك رضا
لو عشت بس تحبنى . [center]

[/center]

المبدع والشاعر الجميل ذات الأحساس الرائع ..فؤاد حافظ ..
أسعدنى أختيارك للركن لتعرض فيه هذه القصيدة الراقية ..دمت مبدعا ..ويا ريت من ده كتير ..