في غربة جاي عليه عيد

كل شخص لديه في داخله روح المغامرة، واكبر مغامرة يخوضها شباب اليوم هي السفر والاغتراب جاهلين ما يخبئ لهم ما وراء البحار من أسرار وأضرار حتى لو علموا ولكنهم يصرون على خوض التجربة القاسية حيث يتصورون أن الجنة هناك ولكن بعد أن يصبح الشخص هناك ويبدأ التخبط في موج بحر الغربة تبدأ الماساة : يصدم بواقع العمل المرير والكرامة المنسية أو المركونة حاليا على الرف والخوف من الفشل والهزيمة و العمر الضائع وما خفي كان أعظم لذلك البقاء صعب والرجوع أصعب
وإن قسوة الغربة حنين لا يهدأ بُعد عن الأحباب والأصحاب، دموع حائرة لا تجد لها وطن أحساس بالوحدة تتغلغل في الأعماق أمواج شوق تعتريني دوماً .أبث مكنوني ولا أجد سوى صدى صوت ذلك المكنون يعود إلي باكياً ..لا يجد أذناً تصغي إليه ولا قلباً يحتويه
شكواي إليك يا رباه ..ففراق الوطن أشبه بفراق الروح ..كم أحبك يا وطني غربتي طالت متى وقت الرجوع ، وكلما يرخي الليل سدوله تجدني أردد، شوفي الزمن يا يمه ساقني بعيد خلاص، دردرني وإتغربت واتبهدلت يا يامه وريني الخلاص، وكما قال الشاعر الغربة أصلو طعيمه مر لكني بقعد بالجبر لامن سنين الهم تمر ياربي الهمني الصبر، ويذكرني ذلك أبيات الشاعر محمد سفله المقل : كعب الزول يقاسي الغربة مابين نوح أنين وشقى، يلقى رويحتو ودّر عمرو لا ارتاح لا مراضو لقى...
ويتجسد شوقي للبلد بهذه الأبيات الجميلة
بلاد الريد والمحنة بيوت الطين القديمي *** سلام ليك يعم يطوفك يحلق في سماكى ديمى
بعيد عنك يا بلدنا مصاقر الغربة اللئيمى *** معاي في البال مابتغيبي وأهيم فيكى مكان تهيمى
أشوف لى جنا بى حمارتوا شادها كارب الصريمى *** يلكد فيها وينهر ويقشط فيها بى نيمى
وبرضوا كمان مابى تمشى وهى جكجاكا ومو هميمى *** هو لابس عراقى بلدى مكرب ولافى العميمى
أشوف تربال ماشى طالع بعد حشا عشاء البهيمى *** وراهوا التانى داك يعرج كراعوا أظن مو سليمى
وداك شاقق بى هناك طلع بى ناس ود مريمى *** وداك من الصباح قايم عجلان شايل كريمى
وداك يخب ماشى أهلوا عشان السماء فيهوا غيمى *** عرش بيتوا قديم مشقق على فلقاً مو نعيمى
وداك يلاقيك باسم كرم فى طبعوا صار شيمى *** يقول لك لاجوة قنب يكتر لك فى العزيمى
بعيد عنك يا بلادى حياتى أنا ما ليها قيمى *** داير أرجع ليكى وأضمك وأعيش أنا فيكى لا ديمى
ارجيني فوق ارض الصبر جايكـي مـن زمنـاً سجـم لا فيهـو للأفـراح طريـق ولا فيهـو للأيـام طعـم باكر بجيك بـى لعنـة الريـد الملـت قلبـى الجريـح
بى حال بيغنى عن السؤال ما بيوصفو الخاطر الفصيـح خايف يقصر بى العمـر تحملنـى مـن الدنيـا ريـح لو كان مقدر إنى اروح سويلى فى خاطـرك ضريـح
سافرتى ما خليتـى خيـط ابراهـو للمرسـى الجديـد.
أبتدي في الكتابـة عيونـى يتقـدِن كلما كتبت كلمة القى الدموع يمحِن خليت الكتابـة أهيـا الدمـوع صُبِّـن واجرن لا تقيفن وفى الصبيـب جِـدِّن
يا يمة رسلي لي عفوك ينجيني من جور الزمان

يا زينوبة ابوكي هو اصلو حالو برا ومو زول غربة لاكين الظروف جابرا
ما لو كان صبر كل الخلوق صابرا والصابرات روابح لو يجن قماح
هو متين نساكم يمة شان يطرا يتنفس هوا زكراكم العطرة
رقيق احساس حنين قلبو بالفطرة نديمو بقيت دموعو الديمة منقطرة
وعارف نفسو من غيركم هو ما برتاح والله جاهو العيد كمان زاد القليب حسرة
سادي العبرة حلقو ونفسو منكسرة هو لا لما القروش لا حصل المسرة
بلد ما فيها زول مات من عدم كسرة فراقكم لينا يا احباب دا ما كان صاح

الشوق للبلد لي بهجتة وسمرا الشوق لي مقيلا ضمة ضل تمرة
الشوق لي حديثاً ضمة ضو قمرة كان الشوق يخفف ولا يبري جراح
مشتاق للبلد جابريتة وككرا مشتاق للحسيناب اسقا وبكرا
مشتاق للقبيل اتربو في حكرا مشتاق للدميرة ومويتا العكرة
مشتاق للجزيرة وتشقا وهكرا مشتاق لي قطع بحرا ودخول وكرا
مشتاق للابا يفارق الفؤاد ذكرا مشتاق للعلي مشغول دوام فكرا

الاخ/ عبدالمنعم ترتورة فعلا الغربة قاسية لاكن الظروف التي قادت الناس الي الاغتراب اصعب
وامر , غالبا ماتكون ظروف مادية صعبة او سياسية تهميش حيث لايجد الفرد وظيفة او يسرح
من وظيفته فظلم ذوي القربي ومن اهل البلد اشد صعوبة والاوضاع الاقتصادية الصعبة ايضا
من العوامل التي تشجع الناس على الغربة - السودانيون اليوم من اكثر شعوب العالم طلبا للهجرة حتى في الواق الواق اذا وجدوا طريقة تجدهم يسافرون لها .
وقد كان لنا صديق يقول نفس كلامك ولكن عند الرجوع اصطدم بالواقع المرير فقال
( السودان ذي المرحاض عندما تكون بعديدا عنه يتخيل لك انه احسن مكان ولكن عندما تدخله فان العن يقتلك ).
وشكرا

ياترتورة والله شوقنا للسودان بقى بس عشان نعمل حاجة للاجيال القادمة ....
الفى السودان زى ماذكر اخونا عبداللطيف كرهونا ليهو ظاهرا وباطنا ...
بعدين افتكر انو الجلد خشن .... وحكاية الاعياد دى بقت تمر فينا ... عاااااادى
ويمكن بننتظر الاعياد عشان نعرف ناخد لينا نومة ..... بدون منبه !!!!!

الأخوين عبد اللطيف وراشد لكم التحية
أنا أتفق معاكم بأن البلد طارد وليس فيه شيء مغري لكي تستقر فيه، لكن كلامي دا زي كلام ناس الحكومة يصرحوا بي شيء ويعملوا حاجة تانية، يعني حكي بتاع جرايد وأي واحد في الغربة يمسك قوي بي وظيفته ويحاول يقعد في بلد غربته أذا سمحت ليه الظروف مدى الحياه يعني خروج من السودان بلا عودة " ودمتم سالمين"

اخى ابو التر
بسم الله وماشاء الله
نحمد للمنتدى ان اخرج لنا ما تحتفظ به من حنين وشوق وعاطفة وملكة حفظ لا يشق لها غبار وبعدين يا خوى نحن الاتكوينه بنار الغربه دى بقى جلدنا خشن وفقدنا الاحساس وكل شئ جميل والضرب اجى من كل اتجاه ونحن مسردبين وما عندنا حل الا الغربة ولا القبر اه نمشى وين ويوم العيد كما قيل قديما القبل الأربعة قفلت علينا (وصار علينا المثل 0 ان كترت عليك الهموم ادمدم ونوم ) ونحن قبل النوم هاك يا دموع وآهات وحسرات كريات وفتنا باب الصبر بهناك لكن نقول ياها القسمة ويا اخوى تراك ممكون وصابر دحين اكتب واكتب علشان تتنفس (( ودمت سالما وكل سنة انت والعيال طيبين وتامين ))

أخوي مصعب لك التحية
ربنا يديك الصحة والعافية والعمر المديد مع السعادة، حكاية الحنين للسودان أظنها في داخل كل مغترب وتختلف من واحد للآخر وطبعاً كلما تقدم الشخص في السن كلما زاد الحنين للبلد ولكن عندما يذهب ويسأل وين فلان قالوا ليك في الدنمارك وين علان انتقل إلى الرفيق الأعلى والموجود في السودان يقول ليك انا تبتا، طبعاً إنت عارفوا تاب من شنوا، وياحليل زمن العافية وقت الناس حنينين، تحياتي لك وللأسرة الكريمة وإن شاء الله نتلاقا في ساعة خير يوماً ما في السودان

» أيهما نختار غربة الروح ام غربة الوطن؟
» غربة ومطـــر يا دسكو
» قصيدة بعنوان / غربة
» حميد والنجار "غربة الجن" " فيديو"
» بمناسبة مولد النبى صلى الله عليه وسلم، اكتب صلى الله عليه وسلم لكى يصلى عليك عشراً، صور حلاوة المولد