..يا( الكبش) يا ود امى سمعت بالخبر..يرد (الكبش) بغير اكتراث وهو ينفث فى الارض ليزيح التراب عن بقايا قش..شوفى يا النعجعه انت خليك فى حوامتك فى الزريبه ولقيط الكلام , اخبارك جديدها قديم ..الجديد شنو البنى سودانيين بطلو الضبيحه..ترد (النعجه) لا يا قشيم بس قالو بعد ما (بطلو) ياكلو لحمه واسعارنا ياود امى نزلت وكده..جه عيد الضحيه وانت عارف لسؤ حظنا انو السودانيين لازم يضحو بينا مهما كانت ظروفهم الماديه..(الكبش) مقاطعا ..اها يا النعجه بقيتى مثقفه وبتتكلمى فى الاقتصاد والسياسه ..(النعجه) يا اخوى احنا مصيرنا معروف يا ضحيه يا جزارة يا....الكبش مقاطعا..التالته مافى لانو صادر ليك مافى يا عجوز انتى مصيرك (كيرى) فى خطاف جزاره ولامى فى لحمك الضبان..(النعجه) مساختك دى (الخلت) الجزارين ما يشتروك اسمع الخبر الجديد..شدة ما غلينا وكده لحمتنا دى ما بتدخل الا بطن المصارين البيض والاثرياء والمرتاحين وطبعا ده بيسعدنا ولا نو الفقراء نهمين و(بفرتقونا) من (الباسم) لى ام فتفت والكوارع وشية الجلد..الكبش مقاطعا شية الجلد دى ماشفتها..النعجة شوف عين (النعجه) جارتنا فى الزريبه قالت الجماعه حلقو الجلد من الصوف وقطعوهو وشوهوه..الكبش ،معقوله دى ما مجاعه عديل..الابرضوا ما قلتى لى الخبر..(الخبر) انو قررنا نعمل جمعيه الرفق بالانسان..ها..ها..ها يضحك الكبش ويرد انا ما قلت ليك يالنعجه انت مطرطشه..انت وكل الخرفان احلامكم سكين سنينه شان تموتو بسرعه..تاكلو تسمنو شان تتتاكلو..تلدو وترضعوا شان يشرب لبنكم وتتأكلو ..انتو يا الخرفان عايشين للغير وتموتوا للغير...(النعجه) اها جيتنى فى الكلام ..الانسان الانت زعلان منو..اولى بالرفق والرعايه..شفت ليك خروف اكلو الخروف التانى..شفت ليك خروف غنيان وخروف فقران..شفت ليك خرفان تحكم خرفان..اقيفى يا النعجه.. والسماك نعجه ما خاتى عليك..شنو الخترفه البتقولى فيها دى انتى يادوب (حتت) حيوان وهو انسان..النعجه مقاطعه ..شوف يا الكبش ما تحور الكلام انا متعاطفه مع الانسان وما قلت انا احسن من الانسان..وعشان كده قلنا فى الجمعيه دى وفى اول قرارته الخمسيه وخطتها الاسعافيه لرفع المعاناه وتقليل اثر ارتفاع الاسعار على الاسر قررنا نحن الخرفان نعاج وكباش وحملان الخروج الى الشارع...الكبش بزهول الخروج الى الشارع وعايزين تطلبو شنو...(النعجه) ترد نحن عارفين مطالبنا ما حا تحقق..وحا يحصل تسويف وتطمين ..عشان كده ما حانرجع الزريبه الا بعد......الكبش ،بعد شنو يا الشقيه...ترد النعجه الا بعد ان ندخل بيوت الفقراء والمعدمين ..بيت بيت..زنقه..زنقه..عشان يضحو بينا ..........يجرى مهرولا لباب المنزل وهو يصيح ..اتفضلو يالخرفان..كتر خيركم ..اتفضلو..البيت..بيتكم..وهو يصيح محمد اجرى جيب القش..اسامه جيب المويه..السره بسرعه السكين وجهزى الصوانى وجردل مويه لنضافة الكمونيه...حواء ( وهى تمسك بيد الحاج ودموعها على خدها) ..معليش يا ابو اولادى يا غطاى وضراى كل سنه وانت طيب قول بسم الله واستحم عشان تحصل صلاة العيد والسنه الجايه بنضحى ان حيينا.................................................................
موضوع: ..حوار خرفان......من يوميات حنجورى 
الخميس 3 نوفمبر 2011 - 15:15
