ادغام بغنه

فى اتصال هاتفي مع الاخ الصديق الاستاذ حسن وراق جمعني به واسرة الاستاذ محمد الجاك ابوشمة وشاركتنا فى الحديث الفاضلة علوية ( والدتنا) ووالدة كل ابناء حي العمده بالرعاية والاهتمام والتوجيه والنصح . افاد بانه ياكل الان ملاح رجله ( ملاحظة كانت الساعة التاسعة مساء بتوقيت قطر) سالته .. هل هذا عشاء؟ وما اذا كان يتعشي رجلة ؟ فاجابني ساخرا .... ياربو , ليس هناك عشاء فى الوجبات الان بالسودان فقد صرنا نضغم الوجبات .. من الطرفة اجبتة ... اتعني ادغام بغنة ...
ضحك ملئيا وحسبت ان هذا بوست يمكن لنا فى التداعي حوله
جل حبي وودي للاستاذ حسن وراق والاستاذ ( العملاق الصامد ) محمد الجاك ابوشمة ولكم جميعا.. دعونا نحلق هاهنا باجنحة الحب والالفة والتوادد

تحدثت مع الوالده علوية ان تمنح الاستاذ حسن وراق عضم مع تلك الرجلة ( ليكده) اختبارا لاسنانه .... ووعدتني علويه بذلك ..
هل ينجح الاستاذ حسن وراق فى ( كد) العضم
دعونا نختبر اسنانه

يعني دائر الناس تضحك عليهو يقولوا سقطوا عضم ؟؟
ربو ما تسهل لينا الامتحان دا وتكشفوا تعملوا باسطة سلا
بعدين تعال هنا انت حكايتك شنو ؟؟
ولا المسكين "ضقل" وفي رواية اخرى "عضم"

محبونا ومحبوب الكل
انا ماعندي مانع اعملا باسطة سلا
لكن ( خشيم ) وراق
منو البقلبو ..... سلا

استاذنا محمد الجاك ابوشمة
تعال
عليك الله ورينا زي ما قال اخونا المحبوب
باسطة سلا
خايلة فى ( جلاضيم ) اخونا وراق
والله لو ماقلت
سوف استعين بصديق

اسال وراق
قال لي اخونا ( عوض حامد )
لو غلبك انا حاضر

دى بمناسبة سلا و الرجلة يا ربو .

الصورة يظهر فيها مبارك ربو يأكل فى لقمة (المحامى )!!

صداح
والله انت بتاع مشاكل
ياخي شنو الجاب باسطة سلا هنا
بعدين ديل شنو الوراي ديل باحبيب
يعني الواحد لو عاوز يبقى ( جبهة) معادية للاستعمار مايقدر
شكيت محنك

ياخي
الباك ( اللفت ) ده خطير بشكل

وراق
ياخي فك الاشتباك ده
وجيب
( عضم ) الرجلة

عزيزنا مبارك الربو له حضرة فينا تحركها كيمياء تتفاعل داخله ، تخاطرنا من علي البعد فتجدنا في حضور قاعدي قلوي وحمضي في انتظار معادلة الاتحاد الكيمائي عبر اتصاله الهاتفي الذي لا يتبخر منه إلا شهيق الضحك البرئي وزفير القرقراب المعافي الذي يشد ترهل الرتابة والروتين, ,,,مهاتفات الربو ( محظوظة دائما ) لا تخطئ ظرفي الزمان والمكان ابداً ..تاخذنا في كبسولة ازمان حي العمدة الطاعمة عندما تغشي الحاج سالم حالة من الوجد و التمرد علي المعتاد مرتديا جلابيته العجيبة ( لبنية بنص كم واحد والتاني نسي ترزي تحت التمرين خياطته دفع فيه للحاج سالم ريال بعد اجاويد بعد ان غير قماش الجلابية باللبني ) يطلق صرخته الشهيرة ( ويييييييييييييييييييييييييك ) فيزداد علي إثرها عبدالرحمن سيدالدكان (جدالربو) صرامة علي جديته العسكرية فتختفي شلوخه الثلاث الافقية فتلتقي في خط استواء الوسط ، يتمتم "لاحول ولا قوة اللهم طولك ياروح" ..من منتصف الشارع يخرج (حفيد ) عبدالحفيظ تلودي يتوكأ علي عصاة كسجارة البنسون صنعت خصيصا للسودان بلا ملامح لا طول لها ولا قصر يهش بها طرقا علي باب الصبر(( عليكم الله دي ما ولادة خلاف ؟؟)) .. الصرخة أفزعت عمك بخاري ابوزيد من غفوته تحت شجرة حفيد بينما ميرغني منصور يكثر من التلفت كبائع الفلسكة ..في منتصف الطريق يلتقي عمك النور الحلاوي ( صاحب مكتبة النور الشهيرة ) والد عصام ترباس مع الاستاذ بشير الهادي استاذ الفنون والموجه الفني والد ( الاستاذ صلاح بشير ) في جديث روتيني عن أقوال الصحف وما يدور في الشاوراب والتميد مصطفي قرشي .. عبدالودود الحلبي يقطع الصمت الصاخب " نشد السرائر نصلح الكوانين" حاجة فتحية وعرفة بت حاج حمد وحاجة التومة بت عطية الله يكملون باقي ونسة بدأت في البركل لا تنتهي عند خشم الباب وحي العمدة تغرق في رائحة الكشنة المنبعثة من مطابخ البيوت في ( وقت العواسة ) وراديو ام درمان يغلبه النعاس ايضا يبث قي اغاني رتيبة فاصل من غناء الفنانين التجاني مختار وعمر الشريف وصالح سعد ويختم بالرحمة مكي (فنانين مسجلين في الاذاعة اتحدي من سمع بهم من قبل) ... آآآه يا ربو كم كان حديثك منعشا كقارورة البيبسي ( المبرجمة ) الملمس التي تنفرج لها خياشيم والانف والاذن والحنجرة في ذلك الوقت والتي لا علاقة لها ببيسي هذا الزمن ( المبرمجة) النكهة والذي لا يهضم حتي البيبي لاك,
عزيزي الربو هل تصدق الادغام بغنة اصبح واقعا مفروضا ..(نحاة ) الانقاذ جعلونا نفارق الثلاثة وجبات فراق الطريفي ل ( بصو )... شاي الصباح ان وجد فهو الفطور لا يوجد غذاء .. ادغم الغذاء مع العشاء فذابت العين في الذاي بحركة انشغال الظروف بالفاقة والفقر لتصبح وجبة واحدة اطلق عليها ( الغشاء ) نعم الغشاء بالغين ..جمع العشاء والغذاء يتم تناوله بعد السابعة مساء مع مراعاة فروق الوقت في الاقاليم والشاي مجازفة والبنطون بالفاء؟؟ بعدين ياربو انت من زمن سلا والعبد ؟؟ إش إش والرجلة في الحجلة يا الافندي سوقني معاك وبعدين الباك اللفت والرايت (المسّاكين ) بتعنك ديل الظاهر عليهم مقرر ساهل بشكل من عيونن الطايرات ديل عائزين اتقان (بقنة) وكمان مديهم ضهرك مؤقتا والله شنو ؟؟ يكا والله يكا وسلم لي وانت في قطر علي الكوزة اللوزة خديجة بن قنة التي فطر قلبها أحد السودانيين ( زي حلاتك ) اداها شاكوش جامدخلاها تتلخبط بين الاحتجاب ولبس الحجاب في قناة الجزيرة الذي زادها حلاوة يا مناوة .
ويجعلو عامر يا ربو

صداح فاروق وراق كتب:: دى بمناسبة سلا و الرجلة يا ربو .

الصورة يظهر فيها مبارك ربو يأكل فى لقمة (المحامى )!!

شرو شرو براك كده والله الناس ديل ما عندهم منطق باك شنو ده رأس الحربة زاتو ههههه
بالمناسبة الصورة ما كاملة انت كنت بتبرد الشطه بشنو ؟

يا حبة سلام انت داير تلحق وراق امهات طه (القرشى) سلا قال لا مارينا احسن
خليهو مع عضم حاجة علوية بقدر اكدو سنونو تمام بس السكرى ضرب البارسا

اصحي يا مدغم س

وراق
هذه المداخلة صوره تتحرك .. هي صور شعبية فاتحه علي الشارع والشارع فاتح القلب والقلب مساكن شعبية
هي مسرحية متكاملة تتراي فيها المشاهد وتنساق بعفوية محببة وتكتمل بها اللوحه لتجسد تلك الصور الشعبية فى حي العمده . هي جزء من القنا وزمن فطامنا ..
الا رحم الله من سلف فى هذا المشهد واطال الله عمر من تبقي منهم

عزيزنا بدر
بنبرد الشطة بالشطة .. نحن قوم نستجير من الرمضاء بالنار .. بعدين اخونا وراق ده سنونو حديد ( وركبو) حديد والاهلي حديد وكمان عصام ابوحديد