الولولة....واللولوة..والقلقلة..واللقلقة

يا حبى ما حكيت ليك قصة صاحبى مع مرتو والله حكايتو حكاية
ندى : لا ماحكيت لى يا احمد ..اها احكى
احمد: صاحبى حلف تانى ما يسكر ..لانو مرتو كانت بتسجل كلامو وهو سكران
ندى: ماعندها ذوق ولا اخلاق
احمد: لا الفلم ما كده..اصلو هو كلو ما يسكر بتكلم فى السياسة..وطوالى مهددها اطلقك ..اطلقك...اها بقت بى التسجيلات هى برضو مهدداهو بأنها تسلم الاشرطة لل...
..واسمعى حوار صاحبى فى الشريط..جيبى المسجل داك عشات اشغلو ليك
ندى: يمكن يكون فيهو كلام خاص ولا كده يااحمد..ماصاح الكلام ده
احمد: معقولة بس يا ندى الشريط ادانى ليهو هو زاتو ..بعد ما اتصالح مع زوجتو خلى السكر..وقامت ادتو الاشرطة.
ندى: اها هاك المسجل..(يدخل احمد الشريط ويدور الحوار)....الاتى:


...شوفى يا ولية ..شوفى واسمعى..كبرى اضنيك وفتحى عينيك..انا كان عايز اطلقك كان زمان طلقتك..وماتفتكرى انى خلاص ميت فى غرامك..ابدا..ولا الاولاد ماسكنى ..ابدا..ولا العيشة غالبانى ابدا.. و لا شايف لى شوفة..ابدا..

الولية: انت يا راجل تجى نص الليل شارب السم الهارى ده وتقعد تلقلق وتقلقل فيينى انصاص الليالى..ودينى بيت ابوى
الراجل: السم الهارى ده بخليهو..لكن انا ..انا ..يا ولية البخلينى من ؟؟؟
الولية: البخليك منو كيف ..مالك..البنقو قلت لى بجنن بخليهو..بس اشرب العرقى عشان اخلى البنقو..والصعوط ما مشكلة..اها لا خليت البنقو ولا العرقى ولا الصعوط..مشكلتك ..نفسك.
الراجل: يا ولية يا وهم...نسيتينى حاجة مهمة وما قلتها..عشان تكتبى ذكرياتى مع الممسوخ زوجى.. بعد مماتى.
الولية: نسيت شنو يا السجم؟
الراجل: انا قبل كده ما كان تبت لى الله..انتى قايلانى انا كافر..انا لمن تبت..ما ريحونى..وقالو عمك عايز يحصل مصلحة..قلت ومالو مادام اهتديت لوجه الله ما بهمنى زول..ومشيت اقدم لى الوظيفة الكلمتك بيها..قالو لى جيب مزكى..وانتى عارفة شلتى زول بقبل بى تزكيتهم مافى ..برغم مكاناتهم العلمية والعملية..المهم قدر ما احوم..مافى فايدة لاعندى جد حبيب ولا جد شريف ولاجد عندو اى لقب ..يانا تربالة ..وضهرنا كاشف.
الولية : طيب كاشف حالى انصاص الليالى مالك..تحمد الله سمسار بى شهادة جامعية وماجستير..وشدة ما موفر ..بتشرب فى السم بتاعك ده.
الراجل: نقتك ولولوتك معاى دى بتفك السكرة ..انتى اسكتى وخلينى اتكلم..لانى لو اتكلمت الصباح وقلت كل الجواى يا شفت لى صينية وقفت فيها ولقلقت..يا رمونى الحراسة..انا اولادى ديل بسألونى يطلعو شنو ولدك اقول ليهو مهندس ..يقول لى هاهاها..اهو داك احمد قاعد فى البيت وما لاقى شغل وقال منتظر قرار فرتقت شركات المقاولات الحكومية المحتكرة حتى بنى بيوت الناس..وسمية اتخرجت دكتورة..وشغلوها متعاونة ليها خمسة سنين ..ولمن مضت على تقرير حالة وهى مناوبة طردوها..لا ماهية ولا خبرة وطلعوها كذابة..ولا منو.. ومنو..ومنو..
الولية: الليلة العرقى كارب..و كلامك كبار كبار وجنس كلامك ده ياهو النخر ليك مخك ..اولادك ليهم رب وربنا اقسم بعزتو وجلالو ان لن يظلمن احد لاحد.
الراجل: ما قلنا حاجة..البلد دى ما اتمعطت..وجيع مافى..اى زول ..اى جماعة ..اى حزب..عايز يحكمنا ..ويدوهو ثروة كمان..واحنا..احنا وين..يا عيييييق.
الولية: وسكرك ده ..بحل ليك مشكلة..ولابتهرب..وبكرة من الصباح تقوم وشك يلعن قفاك..
الراجل: ايوة كلامك مظبوط انا سكران عرقى..وبلقلق وبقلقلك ..وربنا يتوب على ..جوه بيتى وما ضارى زول ..ممكون ممغوص متوجع..لكن الجماعة السكرانيين سياسة ديل ومدمنينها من اجداد اجدادهم ..البفك السكرة من راسم شنو..وانا اول مرة اشوف لى سكرة تورث ..انا ام فتفت بى شطة حارة بتفكها منى...
الولية: انت البلد دى مافيها ناس غيرك ..وكان بفكروا بطريقتك دى ..كان كلهم سكروا واطرطشو زيك كده .
الراجل: جيتى فى الكلام.. الناس اصناف..ناس زى مطموسين ذى ما بتقولى .. عرقى وبنقو وحبوب وشم..وناس متملقين وهتيفة وكسارين تلج وحنجوريين ونفعيين ومتسلقين وديل طبقة عملت ابدال واحلال وغيرت الشكة ناس عندها قروش بجيبوها من وين ما عارف وكان الواحد سألتيه من اين لك هذا يرد عليك ويقول والله انا ذاتى ما عارف القروش والاملاك دى جاتنى من وين ..والله لو بجيبها ليهو جنى كان فتر وفز ..وناس دايشين هايمين لايصين مهمشين وديل لو الواحد قلت ليهو اسمك ؟ منو يقول ليك هسى الساعة عشرة...وناس يا ولية اعزاء قوم ذلو وديل اعتكفوا منازلهم لانهم احبطوا ويتمرجحوا على ذكريات زمان وردى..ومحمد وردى..وناس خلو البلد وتجنسوا واصبحوا يسبو فى البلد وشايلين حالنا..وناس زى النسيم العليل رقيقى حال وحواس دواخلهم بره فى السهلة و شفيفين من الخارج ينفذون فيما بعضهم كأنسجة الشمس..وديل ياهم ضل البلد
الوليه: خخخخخخخخخخخخخخخخخخخخخ....؟؟؟؟
.......................................................................................................................
احمد: ندى يا ندى انت نمتى ولا شنو ..وانا من قبيل مشغل الشريط وانت نمتى برضو..انتو يا النسوان فى همكم حقوا الواحد يسكر ليك شان تعرفى كلام

والله احمد وندى طلعوا اولاد ناس ... طيب احمد ده لو شغل شريط اخوانا المدور من الخميس الفات عند ناس وراق ومبارك وابو سماح وعاطف اسماعيل وبى فنانهم بكش واخرين بهناك كان عملوا شنو!!!!

البكرى سلامات وتحايا...تعرف يا ودحمد يا اخوى ..فى ناس سكرانة من غير شراب خمر والعياذ بالله ..موية قطعت ..قهران.... موضوع مع زول ..فلسة.. شمطة مع الولية..تلقاهو يلقلق ويقلقل ..لكن والله يا البكرى انا بى عينى ديل شفت ولية سكرانة وفى السوق والصباح ما عارفها بايته معاها ولا جديده..والله يا عمك السكر عندها ..شتمت راجلها والرجال من حولها والرجال الما ولدوهم..المهم اتفشت ...والفكرة انو فى كثير من الظواهر الاجتماعية السالبة التى بدأت تتمدد وتشمل شرائح من المجتمع من الاطفال للطلاب والطالبات لابد من لفت النظر اليها وهناك الكثير العجيب المثير للشفقة من جرائم المخدرات والخمور والحبوب والبدرة..وطبعا ده نتاج طبيعى للظروف الاقتصادية وقلة الوازع الدينى الاصيل الغير مؤدلج والتداخل والتفاعل مع ثقافات متعددة وافدة بافرادها كعمالة اجنبية على قفى من يشيل..ياخى السلطات اعترفت بى عضمة لسانها انو يوجد اكثر من اثنين مليون اثيوبى فى السودان.. وقبائل غرب افريقيا اسكت ساى ..وانا شخصيا عندى افلام هندية مع الوافدين ديل حا احكيها فى بوست ان امد الله فى الاعمار.. او وافدة اثيريا..نسأل الله ان لا يبتلى بها شخص ..