خديجة الضكرية في رحاب الله

رحلت الي رحاب ربها المغفور لها باذن الله تعالي بقرية صفيتة رفاعة /
خديجة الحاج عبدالكريم والشهيرة ب ( خديجة الضكرية )
والمرحومة احد المعالم البارزة بسوق الحصاحيصا وتاريخ انطوي من عمر الحصاحيصا
نسأل الله لها الرحمة الواسعة وان يدخلها فسيح جناته مع الصديقين والشهداء

تربطني بالراحلة علاقة وثيقة وسبق ان اجريت معها حوار غير مسبوق (ادناه) نشرته العديد من الصحف:

خديجة بين بنطونين

خديجة بين كبري وبنطون ماذا تقول:
دردشة مع خديجة الضكرية

• [b]لايوجد احد في الحصاحيصا لا يعرف خديجة الضكرية امرأة تزرع سوق الحصاحيصا جيئة وذهابا متلفحة بثوب ابيض حولته المعاناة والهجيرة الي اللون الاغبر. تتوكأ علي عكازتها التي تعينها في رحلة الحياة ومشاوير السنين عند كل فجر يوم جديد.[/b]
تقول عن نفسها
انا اسمي بالكامل خديجة الحاج عبد الكريم من قرية صفيتة والدي الحاج عبد الكريم كان نجارا في سوق الحصاحيصا مع زميله محمد عبد المطلب من اهالي اربجي.
نحنا خمسة اخوات واخوين. شقيقتي الكبري الفنانة المطربة فاطنة الحاج والتي بدأت الغناء منذ الصغر والتحقت بمدرسة ديم لطفي الابتدائية ومن هنالك انطلقت الي امدرمان والتحقت بالاذاعة السودانية تزوجت ولم تنجب من زوجها الذي توفي مبكرا . وفاة الوالد ونحن بنات غير مجري حياتي كما تري انا كنت البنت التانية بعد اختنا الكبيرة فاطمة وبعدي طوالي اختي خولة , عشة, رقية ثم الاولاد الطيب والعوض ولم يبقي علي قيد الحياة الا انا وشقيقتي عشة ورقية.

 الناس زمان مازي اسع كونو المرأة تخرج للعمل كان حاجة غريبة وشاذة وغير مقبولة. ظروفي حتمت علي الخروج للعمل وكان لازم اعمل حسابي المجتمع ما برحمك الزمن داك, وعشان كدا كنت شرانية جدا يعني اقول ليك ..كنت شيطان مصرم.. مافي زول مرا والله كان راجل بقدر يقل ادبو علي وعكازي دايما معاي لحدي اسع دي زي ما شايفو.. انا كنت بسرح مع البهائم وبنوم معاهن في الخلاء وما في زول يقدر يهوم علي... زمان ناس كتار ديرين يتفالحوا علي يعلم الله كسرتهم ليك لامن عرفوني وخجلوا وبعد داك الناس بقت تعمل حسابا مني الا اولاد الناس واولاد الحلال علاقتي بيهم عادية جداً.

 انا مرا كاملة ومكتملة وما اتزوجت اصلا للظروف التي مرت بي لتربية اخواتي واخواني وبيني وبينك مافي راجل اتقدم لي .. الرجال كانوا بخافوا مني خوف شديد وعاملين حسابهم مني .. وسموني الضكرية وانا ما بزعل من الاسم دا ولو كان في رجل ضكر بالصح ويملك الشجاعةو الادب ويقدر الظروف كنت اتزوجتو لكن ياخسارة يا ود اخوي الرجالة خشم بيوت كان في رجال انا ما مرقت وزاحمتهم في السوق كنت قعدت لازمة البيت زي الحريم الوراهم رجال. والله اقول ليك حاجة انا ماندمانة انو ما اتجوزت والحمدلله راضية بالقسمة ومخير الله في حكمو.

دخلت سوق الحصاحيصا من بدري جدا وكنت ببيع اللبن بكميات تجارية للقهاوي والمدارس وكان زبوني المرحوم يوسف حجاجي وبعد داك المرحوم الطيب عطا المولي وكانت لي علاقات مع التجار في السوق ناس عم وراق وابو صابونة وعمك علي ابو نقدية وعمر عطية وكانوا بقولوا لي (( المجينينة)) والمرحوم علي عيسي ما يشوفني الا يقولي المسمارة بت المسمار رحمهم الله جميعا.كنت بقعد في السوق لحدي المسا وببيع وبشتري في زريبة البهائم ومسترزقة كنت والحمدالله.في قهوة التنقور كنت طوالي بكون هناك ولعبت فيها القمار وخرت وخرتوني وكان جات للرجالة الكلام بيقيف لمن اجي عندي.

 الحكاية اتطورت كثير نحمدالله الحضرنا زمن الكبري ومافي زول كان زمان بيصدق انو بجي زمان نقطع فيه بحرنا بالكبري.. ويا حليلك يابنطون العزة وياما عشنا معاهو ايام وكنت بقطع بيهو مجان ما بدفعوني قروش .. احترام والله ما خوف وكانوا فيه ناس محترمين والله يرحمهم ناس عبيد وسيد البشير وسيداحمد الشايقي (والد الجكومي ) و طلب وابراهيم وعبد الله ود حاج توم وولد ناس عوض الله والله انا ما متخيله اقطع الشرق بدون بنطون.؟؟

ما عندي كلام اقولو غير انو المسئولين ما اهتموا بثراث اختي فاطمة الحاج ولا حتي اغانيها ما قعد نسمعا ولم يتم تكريمها لا في امدرمان ولا في الجزيرة.. ياولد اخوي زي مابقولوا ناسنا ( الكبر حصل والقرباب نصل ) والآن ما شغاله والاحوال الحمدلله والبجي السوق بلقي رزقو وفي وراي ناس صغار وكبار راجيني وفاتحين خشومهم والله يديكم العافية يا ناس جريدة الحصاحيصا يعلم الله قدرتوني وانا شاكراكم ومع السلامة.. دحين البنطون بالفا؟؟

عليها الف رحمة ونور .. تتغشاها اناء الليل واطراف النهار
انا لله وانا اليه لراجعون

لها الرحمة والمغفرة، لقد كانت المرحومة علم من أعلام سوق الحصاحيصا، ربنا أرحمها واغفر لها

لها الرحمة والمغفرة حسن الثواب
انا لله وانا اليه راجعون

لها الرحمه والمغفره انا لله وانا اليه راجعون

تغمدها الله بواسع رحمته والهم آلها وذويه الصير الجميل.

لها الرحمة والمقفرة والهم اهلها الصبر

لها الرحمة والمفغرة وانشاءالله
ربنا يتولاها بواسع رحمته ومغفرته
وانا لله وانا اليه راجعون

لها الرحمة والمغفره كانت رمز من رموز الحصاحيصا وتراث لن يندثر

انا لله وانا اليه راجعون
لها الرحمه والمغفره وللاهل جميل الصبر

لها الرحمه فهى معلم من معالم الحصاحيصا وهى تمثل التضحيه بكل معانيها مازلت اذكر مكانها فى القهوه شرق شركة باتا سابقا اللهم ارحمها واغفر لها

اليوم عام ونصف مضي منذ رحيل هذه الانسانة
نسأل الله لها الرحمة والمغفرة

لها الرحمة.. إمرأة في وزن رجال.

اللهم أغفر لها وأرحمها وثبتها وأدخلها جنات تجرى من تحتها الانهار

ضمت مدينتنا الحنون بين احضانها كثير من من اثروا وجدان أهلها بكل خير جاؤمن كل بقاع الدنيا طاب لهم المقام وطيبة إنسان هذه المدينة يجبركل من قصدها على البقاء..
حاجة خديجة يرحمها الله ويغفرلهامعلم وعلامة مميزة بمدينة الحصاحيصا وضواحيها ودسلفاب طيبة الشيخ القرشى القوز ابوجويلى كل القرى التى تقصدها للرعى وتربطها بأهلها صلات رحمية وعلاقات إنسانية راقية.. وملكت يرحمها قطعان من الماشية ابقار وأغنام وذات ايادى بيضاء وكرم نادر ومرؤة يعرفها كل من عرفها
إمرأة ملكت ناصية الحكمة تحل وتربط مقام الرجال محكمة اهلية متحركة مرجع عرفتها عن قرب يرحمها الله ويحسن إليها ويتقبلها قبولاًحسن..

اللهم أرحم خجيجة

» الحاجة خديجة العوض في رحاب الله
» انى احن الى تلك الربوع
» خديجة الضكرية فى جريدة السودانى عدد اليوم
» خديجة الضكرية في وداع البنطون داخل دوت كوم ..توجد صور
» خديجة الدسوقي - في ذمة الله