رأيكم أيه نفصلها من شندي...

رأيكم أيه نفصلها من شندي
ويبقى تمرُّد بس خمجان
وديكا يشيلو البلد السَّمحة
...
... كنانة وكوستي ومارنجان
... ودارفور تبقى حكومة براها
شايلة البركة من القرآن
والكردافة رجال الحارَّة
يعلنوا دولة بدون عنوان
حمرة عين كدا بس يا فردة
والماعاجبو يموت حيران
وكسلا الروعة تفرتق تبقى
دويلة صغيرة حليوة كمان
ونمشي جبال النوبة بفيزا
وندخل عطبرة بالطيران
وتبقى كريمة ودنقلا دولة
جارة صديقة لأم درمان
والخرطوم تصبح واشنطن
وبحري تكون زيَّ اليونان
ومدني البهجة تكون زي موسكو
وسنار تتبع لليابان
وندخل واو تهريب باللفة
ومندسِّين ورا شجر البان
ونمولي تكون دخلت يوغندا
وحلفا تكون راحت أسوان
وأدروب يبقى حكومة براهو
ويفرد سلطتو لي قيسان
وثغر البلد الراقي وباسم
يفتح ناصية علي نجران
ويبقى الحي يا زول فيدرالي
وتبقى حكومة الحي نسوان
ويبقى الشارع وحدو ولاية
ندخل ونمرق باستئذان
وكل زول يحكم بيتو براهو
لا حزب أمة ولا كيزان
لا شيوعيَّة ولا بعثيَّة
ولا مولانا ولا الحيران
لا شعبيَّة تبرطع فوقنا
ولا ناس عدل ولا إخوان
لا ناس شعبي ولا أتباعهم
لا حركات لي زول سجمان
لا أحزاب مختلفة بغيضة
ولا كومبارس ولا أعوان
نحن نشتت بس نتخارج
ويبقى الناس كيمان كيمان
نشوف راح يعملو أيه بالباقي
لأنو الباقي صِبح خربان
كوم في وادي وكوم في وادي
كيف راح يحكموا بس وديان
ونحن نقنَّب بس نتكشَّم
نار القصب الفي الحيضان
ونشمت فيهم ناس السَّاسة
ونضحك بالخشم المليان
شتَّتوا يلا خلاص بلا لمَّة
شعبنا من قولكم قرفان
وطمَّت بطنو وجاتو الحمَّى
وأصبح راقد بس هلكان
كايس طعم اللقمة الحلوة
وفي الأحزان دائماً غرقان
ويبقى ختامكم حسرة وبلوى
وعقبال تمشوا علي النيران
عفواً يا أخوانا دقيقة
أسمعو لَيْ أنا عندي بيان
وقِّفوا انتو خلاص صدَّقتوا
ده كلام زول ساكت زهجان
نحن يمين ما بنقبل إنُّو
تلمسوا شعرة من السُّودان
بلدي الكم فاضت حنيَّة
روقة وبسمة وشوق وحنان
بلدي البين الناس مرويَّة
دمَّ الشهداء الماتو زمان
بلدي الغالية علينا حدودها
روحنا فداك أغلى الأوطان
أحسن ليكم ترعوا بقيدكم
قبَّال نمشي علي الميدان
ويبقى حديثنا ذخيرة ودوشكا
ويبقى قدرنا هو الجبخان
سيبوا الوطن الملَّ حديثكم
وضوقتوهو المُر ألوان
فرتقوا يلا عجاج كرعيكم
مطلب شعبي ورسمي كمان
لأنو الشعب إذا قام ليكم
بكرة حتصبحوا خبراً كان
أسمعوا مني يمين لو دامت
ما كان جاتكم بالمجان
أسمعوا مني يمين لو دامت
ما كان جاتكم بالمجان