مسامحك ياحبيبى

السادة / اعضاء المنتدى الاعزاء ...

تاملوا معى فى كلمات هذه الاغنية .. وتخيلوا كيف ان الشعراء السودانيين ..
قد طوعوا المفردات وجعلوها حبلى بكل المعانى الجميلة ..
لتنجب كل هذه السماحة والطيبة .

مسامحك يا حبيبي...

مسامحك يا حبيبي مهما قسيت علي
قلبك عارفو ابيض وكلك حسن نية
وما خطرت لقلبي سلوى تحيدو عنك
ما ممكن اعاتبك واخد خاطري منك
(انا عارف خصامك وغضبك في كلامك
ما من جوة قلبك كله على لسانك)
مسامحك يا حبيبي..
واسال عني طيفك وزكراك هم شهود
وياما اشتقت ليك ورجيتك لو تعود
(وحشتني الابتسامة عيونك بي كلامها
تداري في اشياقها وتفضح لغرامها)
مسامحك يا حبيبي..
سيان عندي عدلك وجورك عليا
تكابر او تداري حبك باقي لي
بترجع لي تاني وتسالي عن مكاني
تجدني زي ما كنت زايد في حناني
مسامحك يا حبيبي..
ظلموني القالو عني و غيرني البعاد
وحيات نور جمالك زاد البي زاد
(واصبح شوقي اكتر حبك عندي اكبر
املي في هواك نامي ولسه اخضر)
مسامحك يا حبيبي


بالله عليكم .... افيدونا فيه اجمل من كده ؟؟؟

وينك خالد قول حاجة !!!

عمر اقول انا ولا انتظر خالد

أقول أنا ولا أنتظر خالد ،،

ما تجي يا خالد ،،،


ود صليحة :-
ركابـــي :-
وقـ المغارب ـ ت :-

الأخ/ عمر محمد عثمان
أولاً أسمحوا لي يا أولاد(صليحه) كما يزين أخي و شقيقي الأكبر(أمين) كتاباته بذكر والدتكم الكريمه و ربنا يتقبلها مع الصالحين في الدنيا والأخره.. أمين يا رب العالمين..
وبعد
حقيقةً لقد إخترت أغنيه تجسد أسمي روائع التسامح، وهي أغنيه فيها دعوة لأنبل الغايات وأقدسها ليس في عالم العشق بين المحب و محبوبته فقط، بل في علاقات الإنسان مع أخيه الإنسان وهي مناشدة الصفح والغفران مهما كانت أسباب الإختلاف وإفتراض حسن النيه و(القلب الأبيض) في حق من أخطأ في حقنا.. ولكن هل يستوعب الطرف الأخر هذه الرساله ويكف عن ما بدر منه؟؟ أم يتعامي سادراً في غيه ويمد عذابات طغيانه مدا؟؟
لك التحيه ول(سنتر)الأغنيه السودانيه الراحل عثمان حسين و ربنا يمد في أيام الباقين منهم بيننا..
و دمت و داموا

الرشيد حبيب الله

حبابك الف يارائع .. لقد مررت .. وقلت ... ووفيت ... وشفيت

مشتاقيييييييييييييييييييييييين؟

شكلك كده
عاشق
للجمال المغنى
لكن
اختياراتك
موفقة
ما زى التانيين شغالين يخرمجو خرميج شديد

السمحة ،،،

الكلمة الجميلة تغذو العقل قبل القلب احياناً ... كما قالوا قديماً ان..
العين تعشق قبل القلب احياناً ..

لك التحية

[quote="عمر محمد عثمان"]السمحة ،،،

الكلمة الجميلة تغذو العقل قبل القلب احياناً ... كما قالوا قديماً ان..
العين تعشق قبل القلب احياناً ..

أخي عمر
كما أن الكلمه القبيحه تغزو القلب قبل العقل دائماً ويبقي التسامح المنشود بين أسطر هذه الأغنيه عنوان لك ول(السمحه) و للتواصل الحميم بين بني البشر..برافو أبو عفان ولشاعر الأغنيه المجيد..

بت الحصاخيصا ..
يكفى احساسك بالجمال من غير كلام ..دمت ودامت ايامك اروع

ابوالشوش ...

التحية لك ولكل الباحثين عن الكلم الطيب .. وصدقوا حين قالوا ان (الكلمة الطيبة جواز سفر)

لاحظ يا ابوالشوش المقطعنين ديل وقول لى فى اروع من كده !!!

انا عارف خصامك وغضبك في كلامك
ما من جوة قلبك كله على لسانك)
******************
(وحشتني الابتسامة عيونك بي كلامها
تداري في اشياقها وتفضح لغرامها)