الحكومة فاقدة آتوو!!

حكومة وفاقدة آتو!

§ الجنيه السوداني العائم يغرق الآن ،لانه لم يعرف بر يصل اليه ولا اي جهة يتلم عليها. آلية السوق هزمت الجنيه أمام الدولار الذي صارت له 3 اسعار، في الصرافات وفي البنوك وسعر السوق الاسود. الحكومة تصر علي عدم الافصاح عن مصادر الجهات التي مولتها ولا حتي كمية النقد. تجار السوق الاسود تيقنوا أنها مجرد ( مكنة ) والحكومة ح تأخد ( إسنا) في (قبولا) لانها فاقدة (آتوو) في عهد الوزير عبدو ربو.

الغني بي شعبو ما بيفقر!!

§ غايتو يا ناس صحيفة الميدان طلعتو (عكاليتاً) و(لواييقاً) اكثر من الويكة (أم بُق بُق) ، كرهتو السلطات حاجة اسمها المصادرة بدون سبب الميدان تطبع والامن يصادر.ذكرتونا درس المطالعة الشهير علي ايامنا بعنوان (الفيل والتمساح) عندما ارد الفيل ان يشرب من النيل هجم عليه التمساح واطبق باسنانه علي خرطومه ( التمساح يجر ويجر وانف الفيل يطول ويطول) حتي (تعب) التمساح من قوة الفيل واصراره ويفك ( انف) خرطوم الفيل (كما كنت ). آه يا أفيال.

تزوير مع سبق الاصرار!!

§ سعادة اللواء عثمان السيد يعتقد أنه ما يزال في الخدمة ( يتبرع ) بافادات مشكوك في صحتها الغرض من وراءها (مخطط أمني قديم ) لتحميل الحزب الشيوعي احداث بيت الضيافة . الامانة تقتضي ان يقوم مقدم البرنامج الطاهر حسن التوم تقصي الحقائق من مصادرها الاصلية (لقاليقها ) حتي تكتمل الصورة وليس من لواء لم يك شاهد عيان ومولانا حسن علوب كاتب التقرير الذي اوجزه اللواء (كما شاء له) ما يزال علي قيد الحياة في دولة قطر .

فكت جنس فكة !!

§ في احدي زيارات النميري لمدينة القضارف كان من بين مستقبليه احد زملاءه في حنتوب كان مشهورا بلعب الميسر فداعبه النميري قائلا ( ما خليت لعب القمار يا..) رد عليه هازئاً ، ( يا ريس انت خليت لينا قروش نلعب بيها) . .بينما تطالب حماية المستهلك رجال الدين اصدار فتوي حول الغلاء وضائقة المعيشة المستفحلة، يخرج علينا مجلس علماء الاسلام بفتوي ( تحريم الفكّة )، هو في قروش عشان يفكوها ؟؟ واللاّ دا وقتو ؟ الله يفك شنو اقول ليكم ؟.

الفساد المحور وراثيا!!

§ من المصطلحات الفساد المالي والاداري الجديدة بما يعرف بظاهرة الحمل خارج الرحم وهي الاموال المجنبة خارج ( رحم ) الخزينة العامة . براءة اقتراع المصطلح تعود لمحلية الحصاحيصا (الفنانة ) وهي تجبي موارد مليارية باورنيك 15 لكنها لا تمر باورنيك 67 للمراجعة ولا تدخل الخزينة باورنيك 29 كما تنص اللوائح لانها (تتحور ) الي فواتير تدخل الخزينة ولا تخرج بأذونات صرف لانها تصرف من خارج الرحم بطريقة (الدنانير مقابل الفواتير )

والله الحكومه ما عندها غير رباطه ولد في كرتين والقبول ما عندهم

والله يا وراق الله يطول لينا في ايامك ويمتعك بالصحة والعافية
عشان تكشف لينا عن المستخبي والمتنيل علي عينو؟
وزي ما قلت ديل ما عندهم اتو ديل عندهم فرمالة دامة في كرت؟
ودمت ولاعدمناك

[b]طوالي نحنا ناكل البت

» الحصاحيصا فاقدة سكر
» دجاجة فاقدة للذاكرة
» الحكومة والنزاهة
» 77 حقيبة وزارية ، والحليفة بالقصر على دفعتين "مولد"
» الحكومة أم مواسيراً عُراض ؟