حادث سرقة مؤسف جدا لكاميرا دوت كوم

بمجرد وصولي الحصاحيصا من منطقة العسيلات وام ضوا بان حيث اجريت حوارا توثيقيا تاريخيا مع اسرة الشاعر ودالرضي والجاغريو وقمت باخذ صور نادرة لتكمل الحوار تعرضت لحادث سرقة لكاميرتي ( سوني ) التي تحوي صور نادرة تخص الحصاحيصا دوت كوم وذلك من امام المنزل في حي العمدة وفي لحظة زمن ولا نملك الا ان نقول كما يقول اهلنا الشيوخ الوراريق !
ياجامع يا رقيب

يا جامع يا رقيب انت تفتش والرحمن يجيب

أنتو يا ناس الربو والمحبوب وراق ده دحين ما كترا ؟
ولا قولكم شنو الحرامى ده مستقصدوا يا ربى عارفوا دخل مرحلة الزهايمر ولا امكن الظنابيج قاصدين كمرتو هههههههههههه

الرائع حسن وراق ياخي ولا يهمك والجات في كمرتك سامحتك
واحسن ما كانو يسرقوك مننا ( ناس الكجر) ؟
فداك الكمرة وناس دوت كم كلهم :
ودمت ولاعدمناك

بمناسبة الحادث الأليم وسرقة كاميرة حسن وراق التي دائماً تكشف الفضائح والمستور، أقتبس هذه القصيدة التي قطعها أحد الشايقية عندما تجرأ حرامي نتن من سرقة ملايات إشتراها إستعداداً للزواج
يعيقك الله يا مجرم
وكيف اسع تصدقني
وتسرقك بطنك ان شاءالله وتخليك ديمة متألم
حضير إن شاءالله يبراكا وفلساً للجيوب يخرم
والعطش اليحرق الجوف يخلي الفقرا قايمي وقاعدي ليك تعزم
تعيقني أنا..؟.
يعيقك الله يا مجرم وبي مدفع كلاشنكوف يواليك في المسيمع عاد
يخليك لا سمع لا شوف
يجيك عميل من السوفيت مرسلو ليك قورباتشوف
شايل حقنة حارقة معاه يحرق ليك قلبك وكبدك وحتى المعدة والشرشوف
تعيقني أنا ..؟
يمين بالله لو سألوك نان عميان من الاسواق..
تسوق الوتّي في ساقي تورها يقطع الخنّاق
تسوق ليك داف تدقشو ترلة في عقبة يخليك لا ضهر لا ساق
نان بالله لو سألوك ماتعرف القروش بي وين..
ناس بانية عمارات وناس راحات وناس تخزين
حكمت تجيني أنا المسكين البلقط بي قرش وقرشين
تقرشك عقرباً تلقاك فوق الريق يكون جسمك مرطب تب..
تقرشك سموم الصيف تخلي وشيك قايم حب
وِقرْشاً يبلعك يسرِع يلف بى جدة والصومال ويجيبك لينا تانى هنا
يرميك فى الرصيف بي جاى يسلب لحمك الفوقك يخليك بس عضام و عصب
تعيقني أنا ..؟
تطرشق لي برنامجاً أخطط فيهو ليّا سنين
يطرشق فيك كمبرسون يخليك انت بس ساردين
ويطرشق فيك بوتجازاً يكون جنبك صفيح بنزين
وترقد ما نشوفلنا زولاً يقولنا ماشي في تحسين
تعيقني انا …؟
كمان تسرق كمرتي والجديد\ة ولنج
يفكك مننا الله اليوم قبل باكر
يخليك لافّي صيف وخريف
يفك ضلعك تفارق عقلك تسك الماشي فوق عدلك
زي جملاً عشاه الزيف
تعيقني انا …؟
نفسك فااااااتحة ترقد وتنوم ولاك مهموم؟؟
ترقد يابا في عنبر نصيحو يشابي كايس سيدو
ترقد يابا في قبراً اعوذ ربي من هولو وعذاب سيدو
ترقد يابا في غرفة وتكون مفروشة بالصُرفة ونملها يخمو بالقفة
لا تشوف جنّة بي عينك ولا في العتبة تتعتب
عشان عملك تملّي كعب
تسرق الجيب تسوي العيب
انت حرامي ود الكلب
انت حرامي ود الكلب
انت حرامي ود الكلب
وربنا يجمع الرايحة إنشاء الله

» فاجعة!، مصرع13 شخص في حادث مروري مؤسف بالحصاحيصا
» حادث حركة مؤسف علي طريق الخرطوم مدني !! توجد صور
» خبر بإصابة ثلاثة من أبناء الصداقة بإصابات متفاوتة ، إثر حادث حركة مؤسف
» حادث مؤسف يؤدى الى اغتيال الامين محمد الامين
» لقطات متنوعة لكاميرا دوت كوم في يوم العرس الكبير(يوجد حضور مميز)