نُصّك المجنون

عندما يفلس التاجر يبحث في دفاتره القديمة ... هذه أيام ما كان في دين ودفاتر ... على كل حال ... أهو بنفتش !!!
أمثال سودانية ... ما راكبه ...
مثل بيقول: القحة" أي الكحة" ولا صمة الخشم ....

نعم ..... نعم !!!
والله أخير صمة الخشم خمسمائة مرة ....
أكيد الزول القال الكلام دا ... ما شاف الكتكوتة" القتقوته" " السعال الديكي"
معنى المثل أن يحدث لك شيئ أيا كان .. خير من أن يصير لا شيئ.... العكس تماما مثل أو قول متعارف عليه عند الغربيينno news ,good news

أن يحدث لك شيئ سيئ مثل الكحة مثلا لا يمكن بأية حال خير من أن يظل فمك مغلقا ....

ما دفعني لكتابة هذه المداخلة .. أنني لفترة لم أكتب بهذا البوست " ربما صرت عاقلا قليلا!! لا أدري.."....فحدثت نفسي بكتابة أي شيئ , والقحة ولا صمة الخشم ....
على فكرة الخشم هنا في بلاد اللغة العربية تعني الأنف .... يقولون مثلا عندما تطلب طلبا من أحد : من ها الخشم.... إي من عيوني ... فتخيل صمة الخشم عندهم ستكون كيف؟؟ يعني أن الكحة خير من أنف مقفل " يعني ولا نفس" وفي هذه الحالة .. يكون المثل صحيحا ....

كسرة:
في أول أيامي هنا عندما يأتي أحد يشكو من ألم بالحلق , كنت أطالبه بفتح خشمه لمعاينة اللوزتين ... كان بعضهم يبقى مندهشا لا يفعل شيئا ويكتفي بالنظر إليك بعينين واسعتين ... بينما يحاول الأكثر ذكاء جل جهده لفتح أنفه.. أما أنا عندما تكرر عدم فتح الفم عند طلبي بفتح خشومهم .... ظننت وبعض الظن إثم , أن فتح الخشم عندهم عيب أو قلة أدب , فتوقفت عن طلبهم ذلك , حتى تبين لي ماهية الخشم عندهم.... ولكن طاف بذهني أولا موضوع فتحة الخشم بتاعة العريس .... تخيلوا زول يدفع فتحة نخرين !!

لكم ودي.

مبارك محمد عثمان كتب:

وزيرة خارجية باكستان..حنا رباني كهر
....

الناها بت حمدي ولد مكناس
..........................
د. ميرغني
شوق للرُكب ( اها ياميرغني شكلتها ليك) عشان ماتقول لي نصك مجنون وانت عارف انو نصي العاقل زاتو بي زاتو مجنون .
وزيرة خارجية باكستان دي مما شفتها ( ضرب جهازي هكر) وبعدين اكتشفت العلاقة مابين الهكر واسم الوزيرة الاخير .
حاولت اكتب مشاركة جديده قام ( النت ) كنسني بعيد ، تعرف ليه يادكتور لان المشاركة كان موضوعا وزيرة خارجية مورتانيا ، الناها بت حمدي ولد مكناس .. لمن ( كنسني ) النت اكتشفت سر العلاقه بين ( عملية النت هذه ) والاسم الاخير لوزيرة خارجية مورتانيا .
بعدين بالمناسبة هي بت حمدي ولد مكناس ولا بت حمدي بله .. ويحلنا الحلا بله

مبارك .... شوق بحر ... ومافي داعي لتشكيلها!!

اتهكرت واتكنست .... ونسيت كرت الجلا " كرتي" يجلّي المخاواة ...ويخليك حايم خليج ... استراليا... أمريكا... أوروبا .. كايس الفتوح والتغطية .... وما حتفتح ولا حتغطي لحدي ماتتدكَ ... وترجى توزيعة جديدة ... حكومتنا حريق يا ودُو!! وكلنا خاشين زوون... وفي ناس 30 وراجين " سيد ال30" ليهو فتوح !! ويـــــــــــــــــــــــــــــــــــــــــن .. كان زمان ...
أقطع يا مبارك أمكن يجيك جوكر ... ولا أقول ليك القطعية ما حقتك !!
كج ... حارق من زمان وقاعد بره " مكتفي بالإجازات" منتظر البيليه ....

في انتظارك دائما.

النُص مجنون ، والجنون فنون ، وحسب المعادلة دى فنُصك يا دكتور ميرغنى فنان ، نحنا مستمتعين بسهلك الممتنع هنا ، وعاقدى النية على أن نظل هاهنا مطالعون ، وبمناسبة عاقدى النية دى يا دكتور ما بينفع (رابطى ) النّية ؟

تحياتى

بركة ... بركة الجيت ... بسكويت ..جكسا .. ترا ليلا لا .. حلاوة جكسا .. كان بي قرش .. صاح ؟
غالي جدا ... هو واللكوم .. مقارنة بالدربس ... 8 حبات دربس وممكن يزيدوك واحدة ... بلا قطعة لكوم واحدة بلا وجع دماغ ... كان هذا تفكيرنا وقتها في الجدوي الإقتصادية لمشروع اللكوم... طبعا في ناس حيعملوا فيها ما سامعين !!

صداح يا ملك الكنار وهذا الرجل من ذاك الرجل عليه رحمة الله .....
تعرف يا سيدي العرب ديل معقدين الأمور ... يقول ليك عاقد العزم ما ممكن لأن الربط يكون بين إثنين أما العقد وجايي من العُقدة knot مش العُقدة النفسية حمانا الله وإياكم فلايمكن أن يكون بين إثنين .... بينما العَقِد المفوِّر رأس الدنيا كلها بين إثنين ..." كنت أفضل رابط العزم لأنه متعقد من حكاية العقد دي!!"
وعقد العزم أي أحكمه ومتّنه ...
ينكرون رابط العزم بينما يحلون لأنفسهم أن يقولوا "لاحظ جاءت الياء بعد النون الساكنة دي فيها إدغام بغير غنة.. "... قلنا شنو؟
أيوه يستحلون لأنفسهم : رابط الجأش ...
... بعد الكلام ده كله ... إنت عاقد دي مالك ما عايزها ... ؟ برضو عقدة زينا؟
المهم كان عقدت ما تفِك ... لأنه .... لأنه!!
لكن كان ما عقدت ... لاتربط ولا تعقد ولا تحل ... ودي وصية من عجوز عرك الحياة .. وعركه الزواج .. لحدي ما طلع زيته... وعلى فكرة عرك دي بليغة جدا ... لأنه صاحبك الفوق دا" أقصد بركة" بقى معراكة بس ... والسبب .. آللوه" قالوا له بالمصري".... لكم ودي .

المدارس الخاصة لذيذة جدا .. ويا ريت لو كنا قرينا خاص ... الأساتذة سياحيين زي الجرسونات بتاعين الفنادق 7 نجوم .. تحت طلب الطالب .. والزبون على حق دائما يعني ممكن حصة التاريخ ما تنفع معاك .. تفرطق أصابعك للجرسون" أقصد الأستاذ" وتقول ليهو عايز المنيو ...وطبعا حيكون واقف جنبك وأنت تمرر في أصبعك على اللستة بتاعة الحصص... واحدة واحدة ..
علوم أحياء مع بريك قصير .
.. جغرافيا العالم مع شرح بالبور بوينت أو ...national geography مع الترجمة.
لغة عربية مع قصائد لنزار قباني .. وممكن أغنيتين لكاظم الساهر .. أو الأطلال لابراهيم ناجي مع أم كلثوم في الأداء
...
تربية رياضية تنس إسكواتش بلياردو .. وممكن أهداف ميسي في الدوري الاسباني ...

.بعدها تشير بأصبعك للجرسون الذي هو الاستاذ الذي ينخفض عليك وأذنه قرب فمك لتهمس طالبا 2 لغة عربية نانسي عقرب ...أزعل 2/1 .. 2/1
وواحد إنجليزي مايكل جاكسون ......وبريمر ليق مانشستر سيتي وتوتنهام .
إدارة المدرسة لاتتردد في تحقيق طلبات أولياء الأمور في توفير وسائل الراحة للطلاب ...والترفيه عنهم وعدم الضغط عليهم كما تنص عليه أصول التربية السياحية الحديثة .....
" الرسول عليك يا مهند بكرة تجي حافظ القصيدة .. إن شاء الله بيتين منها.. وأنا عندي ليك مفاجأة.....
لؤي...يا لذيذ مش عيب يا شاطر ماتعرف 2على 1 تساوي كم؟ شطورة إنت بس مرات مابتركز!!"
نتائج هذا تراها جلية في منتدياتنا وفي الشريط الأسفل للتلفزيونات ... أخطاء إملائية بالكوم :
يضحد : قاصدا يدحض " ياأخي إنت الفلسفة ليك شنو... الله يدحض شنو ! أقول ليك"
ملغي على الأرض: قاصدا مُلقى على الأرض" الملغيين نحن من الأرض.. تم إلغاؤنا نهائيا بخطاب مروّس من الجبهة القومية الإسلامية وبإمضاء لجاننا الشعبية وختم المجالس المحلية"
والكثير المثير الخطر .. وهذا ما جادت فقط به الذاكرة الخربة كخراب الباقير.
وطبعا أصحاب هذه القمامة الرديئة ..إحتفلوا بتخريجهم .. من الروضة والأساس والثانوي والجامعة ... ودراسات فوق الجامعية ...
والله حكاية الإحتفال بالتخريج من الروضة دي عاملة فيني عملية !!! أسكتوا ساكت...
ممكن يكون حقد طبقي ؟
ممكن حقد سِني " ما سُني.. عشان ماتدخلونا في حسن نصرالله وما أدراك!!"
والله أقول ليكم حاجة ... الناس المعانا ودرسوا في الروضة كنا بنعتبرهم حناكيش .. خليك من تخريج ... شفتَ التخلف دا كيف؟
لا لا ... الحكاية حقد وشكلي عملتها ظاهرة !!

حليل زمننا ... تجي مردٍف يوم السبت والثلاثاء .. يوم النظافة فالويل لك إن كان هناك زرار مقطوع أو أظافر غير مقلمة أو بقعة حبر علي ملابسك أو يدك ..والويل لك في أيام الأسبوع الأخري ... تسميع جدول الضرب .. تسميع الأحاديث والآيات .. تسميع الأناشيد والمحفوظات .. الإملاء ..والأستاذ وما أدراك ما البعبع الذي تفر هاربا إن رآك خلسة في الطريق تلعب الكرة أو البلي أو غيره ......وأبوك الذي أول ما يقتادك الي المدرسة محدثا إدارة المدرسة أن لكم اللحم ولنا العظم ,, إيدكم والبركة ...أحسدهم كثيرا أبناء هذا الزمن .الجميــــــــــــــــــــــــــــــــل

والله يا ود الزبيدي بمناسبة الجدوي الاقتصادية في الحلويات زمااااان
كان في عدة خيارات ٠٠٠ويا حليل ريا وسكينة وكمان معاها مطّة ٠
وفي العصرية تسمع تُرمس تُرمس كبكب٠٠٠٠٠
لكن اًخوك منتظر عربية الباسطة ٠٠٠

هو واللكوم .. مقارنة بالدربس ... 8 حبات دربس وممكن يزيدوك واحدة ... بلا قطعة لكوم واحدة بلا وجع دماغ ... كان هذا تفكيرنا وقتها
......
حبيو
برضو بنحب اللكوم ، تعرف ليه ... اسأل كج ولا اقول ليك وببراة شديده لانو بنفخ ( الجضوم ) ياحليل ( الجضوم )
صاحبك والله موش بقى ( معراكة) معراكة بس
بالمناسبة دي ذكرتني واحد صاحبي دخل الجيش ، سالناهو ليه مشيت الجيش
قال انتو طبعا عارفين انا زول هزلي ودخلت الجيش عشان اطلع صارم .
ولمن ساب الجيش سالناهو . ليه سبت الجيش ؟
قال انا دخلت عشان اطلع صارم اكتشفت اني حاطلع ( منصرم)
حبيو ... اضرب
بس اوعك من ( البلية ) الصفراء
انا عارف ( ضرابك ) اشتر
هع هع هع

عماد كج كتب:

والله يا ود الزبيدي بمناسبة الجدوي الاقتصادية في الحلويات زمااااان
كان في عدة خيارات ٠٠٠ويا حليل ريا وسكينة وكمان معاها مطّة ٠
وفي العصرية تسمع تُرمس تُرمس كبكب٠٠٠٠٠
لكن اًخوك منتظر عربية الباسطة ٠٠٠

.......
كج بصراحه
كنت منتظر عربية الباسطة ولا عصام باسطة
وهيييييييي يكا
سلم لي عليهو
وبلغ اشتياقي الزايد
وشوقي ليهو

كج / بركة ... كيف حالكم وعذرا للتأخير .. أشكر مشاركتكم ومروركم

وقفت بعيدا عن نفسي وراقبتها جيدا:
كنت أتابع مباراة المريخ وليوبارد الكنغولي وأنفاسي متقطعه وضربات قلبي تتسارع مع كل هجمة للمريخ خوفا على مرمى الفريق الكنغولي!!! أو أملا في إحراز هدف حين يقتربوا من مرمى الحضري .....!!
ما هذا .... هل أنا أنا ... أو أنا مافعله بي مزمل والرشيد .... ساقونا إلى هنا ....وهل في هذا عذر لشخص في مثل سني ؟
كيف يكون حال أبنائي ؟؟
إلى أين نحن ذاهبون؟؟
سيدا ليس بسيد أي شيئ.. والملك ليس حتى غفيرا!!!
هل يستطيع جمال الوالي الزواج
بثانية مثل الأرباب " لاحظ الأرباب وليس صلاح إدريس"...هكذا صرنا نمجد الشخوص ونكيل المدح لمن يستحق ومن لا يستحق.. ونحن الذين كنا نخجل من مدح من يستحق حقيقة!!!


والمقبرة ... وزريبة العيش ... والمرشد ... والبرير بونيه....وفريق الحكومه ...و ما إلى ذلك من تفاهات وساقط قول .. يمتلئي بها المدى الأثيري ....


تركنا كرة القدم ... وتفرغنا لأشياء أخرى غيرها اللعبة التي هي قطعة من الجلد مملوءة هواء يتناقلها 22 متنافسا ....يشجع بعضنا أخضرا وأصفرا وأزرقا أو حتى من غير لون......
ننتشي للعبة حلوة ونستهجن الخشن والنشازمنها.......


ثم كيف بدأ كل منا تشجيعه لفريقه كان هلالا أو مريخا .... غالبا صدفه ... أو إقتداء بأخ أو أب أو صديق... أو لون أو شعار الفريق ..... وكل هذا ليس مبرر .. للحديث عن عقيدة إسمها الهلال أو المريخ .


من غيرنا يعطي لهذا الشعب معنى أن يعيش وينتصر .... !!
بالله قل لي بربك من؟
بله جابر ؟ بويا ؟ خليفه؟...أو أو ... مع كامل الإحترام لهم كأشخاص يمارسون لعبة كرة القدم فقط ليس إلا...ولا أكثر...
أفرغنا حتى هذا المعنى الجميل لهذا البيت والغاية التي قصدها وأحسها محمد المكي إبراهيم ................................


الله الوطن الهلال .....................كل الحرية لك أن تشجع الهلال كما تود ... ولكن فارق شاسع بين الإيمان بالله وحب الوطن وتشجيع الهلال كي يأتي مباشرة بعد الوطن .... أين أمك أين أباك أين أبناءك " زينة الحياة الدنيا"..... هذا شطط كذاك .

ثم كيف نسعد بهزيمة ند أكثر مما نسعد بفوز فريق نشجعه؟؟؟؟؟؟؟
ثم الحديث عن الولاء للوطن وربطه بتشجيع الفريق الخصم .... من قال هذا؟؟
هي لعبة ... قد أبحث عن هزيمة للمريخ ولكن ليس وأنا في إستاد القاهرة ضد الزمالك مثلا ... ولكن قد أكون جالسا هاهنا أشاهدها على التلفزيون لأغيظ صديقا ... لا أقول أن مثل هذا هو المثالي ولكن لا أعيب على من فعله فعلته وأتهمه بالخيانة؟؟
أكيييييييييييييييد لن أساعد فريقا أجنبيا بتقديم أي معلومة عن المريخ .....................................................هكذا هي لعبة!!


وبعد كل هذا ماذا جنينا أو سنجني مع هذا الحال المائل .... كنا صفيراب أو وصيفاب ... كمثل أب سنينه يضحك على أب سنينتين ... ويظل يضحك ولن يزيد أحدهما عن حاله ولربما فقد كلاهما ما يملك ..... وللحقيقة فالمثال هنا لاب سنينة وأبو من غير سنون

هناك أخوك وأبوك وصديقك أو عزيز لديك على الطرف الآخر مشجعا ........................................................
فيا أيها الأسياد هل أنتم سادة أباءكم إن كانوا مريخابا .
وياأيها الصفوة هل أنتم صفوة وإخوانكم وأباءكم حثالة إن كانوا هلالاب .

هي مجرد كلمات تقال في الهواء للهزل البريئ مع بعضنا وفي مجالسنا الخاصة ... وليست عقيدة مؤكده تدفعنا لتكسير أستاد الآخر .....
هي لعبه... والله لعبه!!!
شفانا الله وإياكم ....