جلسة خم رماد مع عدلان خاشوفجي اثري ظرفاء قرية وحي الصداقة ( ممنوع للصائمين ولاقل من 25 سنة ) ة

اهلنا ناس الصداقة ارتباطهم بالحصاحيصا قبل ان تصبح مدينة .. ساهم اهل الصداقة في نشأة مدينة الحصاحيصا ارتبطوا بالسوق من خلال عملهم كتجار وخضرجية وجزارين وعملوا بجميع المصالح خاصة في المحالج وقطاع الخدمات وعدد من ابناء الصداقة زاملوا في مختلف المراحل الدراسية ابناء الحصاحيصا وتفردوا بعلاقات خاصة وحميمية مع اهل الحصاحيصا .
هنالك شخصيات في الصداقة لا يمكن تجاوزها شكلوا نسيج الحصاحيصا كمدينة بكل خصوصياتها الا أن ابرز ما يميز ناس الصداقة خفة الدم والروح وحضور البديهة ولا يؤجلون طرفة اليوم الي الغد لأنهم قوم تسري الظرافة في كيميائهم ..أهلنا في الصداقة لا يغضبون وان اضطروا لذلك فبسخرية يحسدون عليها.. أذكياء يختاروا اقصر الطرق لطاعة الخالق بدون تذمر وتشدد كما يفعل الادعياء الاغبياء . السخرية والتنكيت والتبكيت وحضور بديهة زاخرة بالسربعة والتقريق والملح والحكاوي الطريفة ،إنهم يختلفون عن الجميع تعرفهم من حديثهم خفيف الروح الذي لا يسبب عسرا في الهضم ولا ( يضرس ) السامعين..في هذا الشهر الفضيل ، رحمة الله تغشي شيخنا وابونا وصديقنا أحمد ود الامين (الجراد ) شيخ ظرفاء الصداقة وعوض الامين ومحمد ودتاي الله الذي ارتبط بهم وكثيرون هم الذين يوزعون الفرح ويرسمون الابتسامة في وجه هذا الزمن العبوس.
نواصل

من ظرفاء الصداقة اخونا عدلان محمد عدلان والذي يعرف ب (عدلان الخاشوقجي ) أثري أثرياء الصداقة بالطرافة والنكات الطازجة التي تتساقط من حديثه الشعبي العذب.لا يمكن ان تمر دقيقة تجلس اليه في مجلسه وانت تقاوم الضحك المعافي والتبسم الجميل ، للرجل مقدرة فائقة في صياغة حديثه في قالب جاد من شدة الهزل والعكس الصحيح يحكي ولا ينفعل ضاحكا ليترك ذلك لمستمعيه الذين يعملون حسابهم لان بعض الضحك ما يشرط وهو يدير جلسته بحكمة ، حديثا حلوا يعلو وينخفض ضحكا يخاطب العقول لان موسوعته الشعبية في الثقافة والتثقيف تجعلك تندهش لذاكرته الفوتغرافية وهو يرسل الحكاية القصيرة كالشولة والنقطة علي سطر الحديث .
يحضر عدلان الخاشوقجي من الصداقة لقضاء بعض حوائجه الا أن مجلسه مفهوم عقدو رائق عند خديجة الفوراوية ست الشاي في زقاق كافتريا شيكان عند حضور (عدلان الخاشوقجي ) تحضر معه حاشية من المعجبين وبعض شلة الفطور الذين (يكبون الزوغة ) من فطور الحلة التقليدي وفي ذهنهم المفاضلة بين صاج السمك وفسيخ المعلم حمزة وفول بابكر محي الدين واذا كان الجيب عمران وخمران فلا يترددون من ورقة الرياضي ليزبط لهم سلطته المميزة مع كافة طلبات الفراخ المشوي وأحيان يبعثون برسول يحمل عدلهم لشراء لحمة تقوم خديجة الفوراوية بتزبيطها

في مجلس عدلان الخاشوقجي لن تجد مقعد فاضي وفي أحدي مرات تواجدي في مجلسه لم اتمكن من احضار كاميرا دوت كوم حتي لا تفوتني روائع عدلان وحتي لا يقوم احدهم باحتلال مقعدي .. مجموعة من ناس الصداقة يتحلقون حول ودعدلان عند خديجة الفوراوية ست الشاي التي تتحين وصول عدلان ..ابرز رواد المجلس (سرار) الترزي من اهالي الصداقة يعمل في نفس الزقاق ترزي بلدي وابو رزقة كهربائي بالمعاش وبعض من اهالي البطاحين وابي فروع وعمنا عبدالرازق والد الاساتذة الاخوان عاطف وعفيف وعاكف بالاضافة الي البصير الشعبي دكتور زكريا السباك وضحكات تنبعث من مجلس عدلان تلفت انتباه المارة تجبرهم التمهل في المسير كنوع من (الاستشمار) السريع ع الماشي ..خديجة الفوراوية طفت نار الشاي حتي لا تذهب مويتها علي سراب انهماك الحضور مع عدلان الذي لا يجتمع عنده (كيفان ) لا جبنة ولا شاي لانو براهو كيف كامل الدسم يغني عن الشايهات والقهاوي .
يحكي

يحكي عدلان متذكرا وفاة زوجة صديقة الترزي سرار الحاضر في الجلسة ، . كان عدلان في البيت يجلس الي زوجته يرتشفان البن والشاي فاذا بمايكرفون المسجد يزيع خبر وفاة زوجة سرار وبصوت واضح الا أن زوجته سألته ..الزاعوه مات منو ؟قال ليها بقيتي طرشاء خلاص؟الماتت صاحبتك خادم الله بت علي مرت سرار ياالله جهزي حالك الموت جاييكي بدأ بي صاحبتك ....
() اثناء جلستنا تلك حضر ولد سرار الكبير وسايق معاهو بتو الصغيرة قام سرار سأل ولدو (البنت دي موديها وين ؟) وهنا تدخل عدلان قائلا ؟ يكون جالبها السوق مالك عليهو..
() حاول سرار يغير الموضوع سأل ودعدلان قائلا له ( انت سعر الحبل في اراضي الجروف بقي بي كم ؟؟وقدام ولد سرار عدلان قال ليهو (يا ود الغلفاء تكون داير تاخد ليك مرا بعد ما كتلت امو ؟؟
لود عدلان حكم مأثورة يطلقها اثناء حكاويه منها :
() الاولاد الشطار من بدري تلقاهم باينين وظاهرين .. الولد مما تلقاهو يشتري الزلابية ويغمس في السكر اعرفو ح يكون شاطر ونبيه ومما تلقاهو زول طعمية يغمس في الشطة ماترجي منو عمار واخير من بدري تشوف ليهو بهايم يرعي بيهن ,, الناس في الحصة منتبهين مع المدرس تلقي الولد البليد يتوحوح من الشطة لامن الدرس يفوتو .
() الزول مما يتكلم ويغمض في عيونو اعرفوا كضاب والزول مما يتكلم ويتلفت اعرفو خواف
() في إحدي المرات ذهب عدلان الي طبيب الاسنان لمراجعة اسنانه قام الطبيب زجره قائلا (امشي طلع سفتك دي وغسل خشمك ) رد علي الدكتور ..(أخاف بدور تبوسني ؟؟)
عن الزمن الجميل تحلو حكاوي عدلان :
() علي الطلاق يا جماعة زمان مافي زول برقد مستشفي الا يكون فلسان واللا مقطوع ما عندو أهل البلد مليان مريسة ولحم المرض يجي بي وين !!
() الجماعة يتغالطوا في ايام زمان والخير الباسط تدخل عدلان بالقول .. علي الطلاق يا جماعة ما طالبني حليفة .. زمان كوم أم فتفت في ودالسيد كان طلعت فوقوا تشوف محطة قنب .
() اثناء الحديث والونسة جنب خديجة الفوراوية وقف أحد ناس قرية البطاحين معتذرا قال ماشي يشوف ليهو تيراب عيش.. قاطعه ود عدلان قائلا يازول اقعد قبلك زارع العيش تسوي بيهو شنو ؟ وقت منعو سوات المريسة شن طعم زرعة العيش ..

المرة القادمة ستنقل لكم الكاميرا كل شخوص مجلس عدلان الخاشوقجي اثري ظرفاء الصداقة

ياورقة لك خالص الشكر على الكلام الطيب في حق الناس الطيبين ربنا يعافيك ويعافيهم
وقد أنعشت روحنا بهذه الإطلالة "الحميمة المنعشة"
وخالص تحايانا لكل الناس بالمنطقة وناس الصداقة وخالنا العزيز عدلان ربنا يديم عليه الصحة والعافية
ونسمع الحكي ......وواصل

التحية والتجلة لك استاذنا حسن وراق وانت تتحفنا كل يوم بالرائع والجميل ورمضان كريم على ناس المنتدي وكل الاهل بالصداقة.....والله نسأله ان يمد في حياة العم عدلان .......... وهاك دي والعهدة علي الرااوي

ركب العم عدلان والمرحوم عوض الامين والمرحوم الجراد الركشه اول ايامها الجديده وكانو من ذوى الحجم العائلى فضحك عباس ودعدلان وقال لابيه ممازحا يابا اكان ادشيتو اياها المنقلبه بيكم

» فل مون دوت كوم جلسة ما منظور مثيلا ( توجد ص +س ) ممنوع لاقل من 50سنه
» نابغة من قرية الصداقة يحرز الترتيب الاول علي نطاق السودان وثالث العالم في مسابقة اليوسي ماس (توجد صور )!!
» نصائح للصائمين لتجنب الانتفاخات وعسر الهضم
» خبر طازج...تزوير على المكشوف بداية رماد البركان....
» جلسة ما منظور مثيلها (إعادة)