رمضااااااااااااان احلى في السوداااااااااان ,,,,,,,,,

والله الواحد لف الصداقة دي كلها ما لقى لي ليمون .. الليلة ما عارفين نعمل مع الآبري جق شنو ؟ كرعينا ديل حفين .. كدي انشوف احمد فضل الله ده ممكن تكون شجرتم فيها ليمونات ... الله ابارك فيك آ الضو فكيت الحيرة ... قول لي امك برجع ليكم الماعون بعد التراويح .. يلا يا احمد نتلاقي وقت الفطور .. اوعك تقعد في صينية ناس صديق صالح .. كان عملت خيانات الليمون ده اسمك في .. قلت لي الليلة الفطور علي ناس منو ؟ احمد ود الفضل ... اكان كده النعيمية تقول وا غربتي .. اسرع استحمى ساي ما افوتك ملاح الروب ده والله هو ما ملاح السرور ... ما تنسى القهوة قول لي عواطف بت الضو ما تكتري الجنزبيل .. قلت لي محمد فضل الله الليلة فاطر في فريق الشيخ ؟ قول لي والله الدواح حقو في كرعي .. وقول لي عوض الليلة الاذان محمدك .. عمار فاطر في الرجابة افتح الجامع من بدري ... ابوي ده ما اكورك فيك .. الشئ السباتات دي مارقناها من اسي ليه ؟ الشمش لسة حارة .. عمك السر ده اظنو اليوم ده قارص معاهو مارقن من هسي ... والله عمك نور الدايم امس جاب ليهو حلاة عرديب الجماعة رقدو بيهو براهم .. غايتو انا جازفو لي كباية .. عليك الله فطور ناس عمك الطيب الصديق متين ؟ دايرين نضرب القراصة الحارة ديك ... بالله قول لي امين مصطفى خلي الحاجة تظبط ملاح اللوبة .. موش فطورهم بعديكم .. آه بعد ناس عمك اللمين موسى .. بالمناسبة انت الخميس ده احمد ما بجي من الخرطوم مع متوكل ياخ والله اشتقنا لي شديد .. ات وليد تية ده الليلة ما قال فاطر معاك .. كيف ما صايم ؟.. والله صحي انت بتعرفو زي جوع بطنك ... لكن انت ما فيك حسنة كلو كلو انا كل يوم امد ليك في العصاير المظبطة الشكية لي الله يوم واحد ما تباصي لينا حاجة لابد جمب صينيتكم دي خايفا تعير ..... ( الف رحمة ونور عليك يا عم فضل الله )