هضاريب حمي

فتاح يا عليم مع النباه الاولاني
قامت الحاجه وحلبت الغنيمات
وصررت ام التومات
لمت القشقش
ونفخت النار
ختت اللبن فوق النار
ومدت يدها نحو المسواك المغزوز في الراكوبه
وجابت التبروقه والابريق لابو العيال
وصلت واتركعت
وجابت الشاهي لابو العيال
وتوهطت جمبو
وسالتو عن مشهادو وزراعتو
واجاب بالحمد والشكر
واتنحنح وقام علي مشهادوا ووضع اللبده ومانست الحاجه جابت الكوريه فيها حرف كسره بايت مع شطيطه ومليحه
وناولا الحاج حق الملاح والذي منه
ومرقت معاهو لما ركب حمارو وتاكت الباب
ولمت الفرش
وصحت الشفع
عشان الشاي والمدارس

قام الشفع وكل واحد طس وشو بمويه والتفوا حول النار
لا ليأتو منها بقبس او خبر يقين وانما الدفويه
باقي الدنيا سقط
وكل واحد عاوز كبايتو مليانه
وكل واحد عاوز قعر رغيفه
شربوا الشاي وكل واحد درع مخلايتو
وصوف قاموا علي المدرسه

اها قامت الحاجه علي الغنيمات عشان توديهم الراعي
لكن تذكرت الليله الراعي داير حق الشهر
خلتهن في محلهن
ولملمت البروش
وضايرت العناقريب
وقامت علي العواسه
الحمد لله عاست الكسره
وشالت ليها جمرات من تحت الصاج
عشان توقد بيهن نار الملاح
ختت حله الملاح حق الفطور
وجري علي سيد اللحم
قبال ما يعزلوه ويتركوا ليها الجلاوه والسحلي
هناك قابلت ام الحسن والحرم وعشه وخوله
وكيف اصبحتو
وشالت ربع الكيلو وشحدتو طايوقه لزوم الصاج
وجري علي البيت

سوت الفطور وغسلت باقي المواعين
وحشت بصل ملاح الغداء
لانها قبيل عند الجزار واعدنها النسوان ماشات بعد الفطور
لحواء
مرقت من بيت الحبس
وصل الشفع ورصت الفطور
وسالت الاولاد اها مدرستكم زينه سمحه
نط علي يمه قالو لينا جيبو جنيه الشهر
ومحمد قال نحن برضو
قالت ليهم اصبروا بعد ابوكم يجي
يمكن يومين تلاته يصرفو ليهم
فطر الاولاد ورجعوا مدرستهم
ولملمت الحاجه مواعينها
وختت ملاح الغداء
وبقت منتظره نسوان المشوار

تأكدت بما لا يدع مجال للشك ان دوت كوم ولادة . ويا بخت الحصاحيصا ببنيها

انه الابداع وفقكم الله وتاكد يا ابوسماح قد استمتعنا حقا بالسرد السلس ...

وقد عشنا السيناريو بكل متعه اتمنى ان تواصل

قبل ان يصل نسوان المشوار قامت كبت جردلين مويه في التيبار
ورمت باقي الاكل للغنيمات
وقفلت التكل من الدجاج والكديسه
وختت مفتاح البيت في صدرها وتحركت مع الوفد

وما طولت مع المشوار
باقي ليها شويه شغلانات بالبيت
عندها عيش مغسل ومشرور فوق الراكوبه
وحبه باميه مقطعه ومشروره
المهم رجعت البيت قبل رجوع شفع المدارس
واطمانت ان كل حاجه في محلها
فقدت الريكه ووجدت الكسره مغطيه كويس
والملاح ما جاتو عوجه
والغنيمات اكلن وعقلن
اها عندها باقي زيت فتقتوا وباقي هديمات عاوزات خياط وترقيع وقامت باللازم
ووصل الاولاد من المدارس وجدعوا مخاليهم وجري علي الزير البارد
وطوالي فكروا في التشرك للطير جوار الزريبه
والحاجه غمدت علي بال ما يصل الحاج من الحواشات