خبر طريف ,, ركشة تتحرش بقطار في قارعة الطريق وتراوده عن نفسه في مزلقان الحلة الجديدة (توجد صور )

الخبر ..ركشة تدقش قطار .
بعد تزايد حوادث الاغتصاب قام قطار بضاعة (صايع و سوابق ) باغتصاب ركشة (مفعوصة) تحرشت به في مزلقان الحلة الجديدة فور مزاد ولان الركشة عكليتة اشتبكت مع القطار (المرٌّ) الذي خجل من جرأة الركشة وقام بسحبها بالاحضان بعيدا عن عيون الفضوليين الذين ينتظرون عبور القطار ، لياخذ منها قبلة في الظلام الواقع شمال نادي المريخ قبالة كبري حنفي حيث افتضح امرهم والقت عليهم شرطة امن المجتمع القبض متلبسين في حالة اغتصاب بعد ان شاهد الجمهور (مرود) القطار في مكحلة (الركشة) التي انكسفت وعملت (زغبير) حتي لا يقام عليها الحد بالجلد بعد ان تبين انها لا تحمل نمرة يعني غير مٌحْصَنة.
(سائق الركشة محدي محمد احمد (النجدي ) جزار سابق خفيف الظل زرته في مستشفي الحوادث وهو صاغ سليم لا يشتكي منه عضو تم حجزه كاجراء تحوطي ، حلف بالسماء والطارق والنجم الثاقب ان القطار غلطان ثم غلطان عندما انفرد به وجذب الركشة من قٌبٌل مع سبق الاصرار والتحرش لانه لم يتنحنح بصافرته .المرأة التي كانت بالركشة اخذت لاجرا كشف موجات لانها حامل ولا تعاني من شيئ أما سائق القطار يعاني من ارتجاج سبب له صداع حاد بسبب قوة عين ركشة ( متدربة ) تحرشت به وفضحته امام حركة المرور امسية الجمعة بعد صلاة العشاء حيث عملت الركشة بقول ود ابوزهانة ( بعد العشاء مافي اختشاء )
حمدالله ع سلامة حبيبنا النجدي والمرأة التي استاجرت الركشة الي الامتداد

[img]

خبر طريف ,, ركشة تتحرش بقطار في قارعة الطريق وتراوده عن نفسه في مزلقان الحلة الجديدة (توجد صور ) Dsc05918s

[/img]
الركشة مع القطر في عناق وفي غزل
[img] خبر طريف ,, ركشة تتحرش بقطار في قارعة الطريق وتراوده عن نفسه في مزلقان الحلة الجديدة (توجد صور ) Dsc05921r

[/img]
(الشهرة متاعب ) تعب شديد
[img] خبر طريف ,, ركشة تتحرش بقطار في قارعة الطريق وتراوده عن نفسه في مزلقان الحلة الجديدة (توجد صور ) Dsc05925

[/img]
شهود عدول شافوا كل حاجة مرود في مكحلة
[img] خبر طريف ,, ركشة تتحرش بقطار في قارعة الطريق وتراوده عن نفسه في مزلقان الحلة الجديدة (توجد صور ) Dsc05922g

[/img]
النظام العام في موقع الحادث والقطر في خطر ما ضرب بوري للركشة

اولا الف سلامه للصديق النجدي
وبمناسبة انه القطار بقي مافيه بوري والله العظيم في اخر اجازه لي كنت مستاجر سياره كليك وكان معي ابني مصطفي وذهبنا الي السوق لي بعض الاغراض وشربنا ليمون من بوكو وعند رجوعنا امام كافتيرياء سكينه ونحنو نقطع السكه حديد انا زاهب علي طرق الزلط الكبير وركشه داخله السوق والله لا انا لا الركشه ماشفنا القطار وهو لم ينبهنا بالصافره التي كانت زمان تصحينا من النوم وانا الحمدو لله خرجنا انا ومصطفي ولكن تكسرت العربه وبتاع الركشه في خبر كان هو وركشته والحمدو لله اتكتب لنا عمر جديد انا ومصطفي ابني واخر كان راكب في الركشه وبعد دي كله ناس القطار قالو دايرين تعويض في تاخير القطار لمدة خمسه دقايق والدقيقه يالف جنيه لولا تدخل اخي العقيد سعد بكش مدير السكه حديد بالسودان وافرج عني انا وابني بضمانته والحمدو لله
وطبعا ظرفاء المدينه لمن جو اتحمدلو لي السلامه قالو لي في واحد بصدم القطار الا اكون سكراز وبالمناسبه لو لا تدخل اخي العقيد سعد بكش كان اهطوني اورنيك كشف السكر من المستشفي وانا والله من ما الله خلقني لم اشرب خمر ولا سيجاره حمراءخليك من الخضراء

غايتو يا ورقة إتورطت ورطة "السواد" في هذا البوست
وأتمنى من الله أن يجعل لك "مخرجــــــا"
وجاييك بالرااااااحة

((.........بعد تزايد حوادث الاغتصاب قام قطار بضاعة (صايع و سوابق ) باغتصاب ركشة (مفعوصة) تحرشت به في مزلقان الحلة الجديدة فور مزاد ولان الركشة عكليتة اشتبكت مع القطار (المرٌّ) الذي خجل من جرأة الركشة وقام بسحبها ......)).

منو القال ليك الركشة إتحرشت بهذا القطر ؟؟
مش ممكن يكون القطر هو من تحرش بالركشة ؟؟
ليه "رميت" اللوم علي "الركشة" المسكينة دي ؟؟
وإنت بالذات عارفا لا حيلة ولا قدرة كافي خيرا شرها
وتعبانة وشقيانة "تجر اليوم كلو الواقعة ما بترفعا" !!
تقوم مع النباه وما ترجع البيت إلا أنصاص الليالي
تمشي بي قدرة قادر والمسئولين يعجبوك "غضوا" الطرف عن كل المخالفين بس بقو في المسكينة دي
إن مشت بـ"الظلط" ووب
وإن مسكت "الدقداق" الرووب
تتنقز زي كورة التنس لمن "شراشيفا" تقع وبعد دا كلو مساسكنـها زي العاملة جناية
ولمن "يتحرش" بيـها قطر ليهو "شينيبات" تقولو عليـها هي المتحرشة
ذكوريين ليس إلا

نجي لـ"جريرتك" التانية وهي رمي "المحصنات الغافلات" من الركشات دون البصات والحافلات !!
وبتصريحك الثابت بالكتابة فإنك قد رميت هذه الركشة بجريرة عظيمة
وأنت تعلم بأنـها من "المحصنات الغافلات" فعارف دي عقوبتا شنو ؟؟
المهم فأنت مطالب بأن تأت بـ أربعة "شهود عدول"
وعدول دي إلا يكونوا من سائقي "التراكترات والبولمنات"
يعني "سواويق" النيسانات والسياحيات شهادتهم في الركشات "مجروحة"
فيا إما تأت بالأربعة يا تلزمك "الجلدات"

ورقة
ياخي ركشة
ومرقت ليـها من حادث قدر دا ومع قطر كمان يعني لا هو بص ولا حافلة ولا لاندروفر
تقول ليـها حمداً لله على السلامة وبركة ال الله سلمك ومرقك ....
ولا تفضحا جنس الفضيحة دي وتسلط عليـها ناس النظام العام ؟؟
فلو مرقت من "الوقعت فيـها" فما أظن حا تفلت من "ناس الترخيص"

أولاً سلامات لاخونا النجدي ... واجر وعافية انشاء الله

يا جماعة قطر ... و مافي زول يجيب .... خبره والله قطارت الزمن بن فشنك زمان القطر كان لما يجي الشوراع المحيطة بالسكة حديد كلها تهتز من جبروت قسوته على الأرض.

بعدين قطر يدقش حافلة مقبولة .... باص ما في مشكلة ... بس ركشة حارة شوية ...
في الحالة دي يا المحبوب الركشة هي التي تحرشت بالقطار ...

والله زمان عشنا وشفنا .... اما بالنسبة للشهود بي بندقيتهم موجودين

فعلاً النجدي والمرأة ربنا كتب ليهم عمر جديد
وحمداً لله على السلامة
أبورائد كيفك ياخي
طولنا ما سمعنا "صوتك" الإنتحابي
والليلة جائي "تنتحب" على "القُطارة" ؟؟
وكمان تسأل عن السبب !!
ما كلو من "العجوز" أمو

يا أخوانا نسوي شنو ؟
مرة تجينا طيارة بي فوق..
ومرة يجينا قطر بي تحت....
الحمدالله البنطون ما عارفنو وين ؟
ربنا يستر علينا من {الفرطاقات}.

يا محبوبنا
سلام شديد
تحياتي لكج .. نقول ليهو شنو الحكاية
ويا بورائد ذكرتني قصة ودعمنا خواف شديد جايي مسافر من مروي بالطيارة وفي مطار الخرطوم لساتك الطيارة حصل عطل و مانزلو وفضلو لافين في الجو حتي يكملو البنزين وينزلو بدون لساتك واخونا بقي قشفاش وضرب الجرسة واخيرا الاطارت نزلوا طبيعي حلف ما يركب طيارة وحضر الحصاحيصا وفي رجوعه حصل حادث بشع راح ضحيته بعض اقرباءنا وعبدالحليم علي طه (الحافلة الشهيرة قرب المسيد) شاف المنظر كان في البص التالي مباشرة حلف ما يركب بص وقال قطر بس وهو في الخرطوم قطر كريمة عمل حادثه الشهير انحرف ودخل البيوت وماتو فيه عدد من الناس اخونا حلف من القطر ووقف علي حيلو وقال يعني الواحد بعد دا الا يركب براق طبعا دا قبل شريان الشمال وظهور الركشات

المحبوب الحبيب ...

ولله ما غيبنا إلا الشديد القوي .... لكن معاكم بي قلوبنا ومحاسيسنا النبيلة

سيد حسن تعرف ... مرة بعد الحليم فكش لما كان في الادارة المركزية هو ناس جميل الجلي والشباب الخطرين ديل ...

عبد الحليم نزل من الأندروبل بتاع الأدارة قامة دقشته عربية بتاعة واحد ود جيكس عربية سنينة قاموا ناس جميل يسكلو ا ... كتلو كتلو الرماد في خشم امه السجم علينا ... الراجل يتاع العربية اتوهم قام شال ليك عبد الحليم فكش وطيران على المستشفي .
وناس جميل وراه سكلي شديد ... المهم عبد الحليم فكش عاش اجمل ايامه في المسشتفي اكياس فواكه وفطور من كهران وعصائر وباطسة وناس جميل ياكلوا ... ويوم ما طلع من المستشفي كان مهرجان خروف قدر الضربة ومعاها ظرف لزوم معليش واكتل الموضوع وناس جميل قاعدين يعانوا ساكت .

الجماعة ضربوا الخروف ولما فكش غدر بيهم من الفله الفي الظريف ... طلعوا دعاية قالوا فكش صدمة العربية العربية ما صدمتوا ....

ههههههههههههههههههههههههه
الله يجازيك يا بورائد
اتخيلت المنظر بضحك لحدي اسع وناس البيت قالوا لي مالك
قلت ليهم جميل الجيلي سواها
حلو ة يا بورائد

يا حسن وراق الحكاية ما عايزه ليها مرود في مكحل ، الحكاية واضحة شوفو القطار دا خشمو ادشدش شديد لامن شفايفو وقعت وبعد دا تقولو شال الرقشة بالاحضان؟ حرام عليكم طوالي لبستو المسكينة التهمة

» نسوان الحلة الجديدة حاجة تسر العين (( توجد صور ))
» الشبيبة-اهل الحلة الجديدة-معتصم جعفر((صور وحاجة عجيبة))
» اعضاء الحلة الجديدة بدوت كوم
» فور مزاد الحلة الجديدة (المحلية كملت الناقصة )
» اركويت ,السوق, الحلة الجديدة , الإمتداد وبالعكس