الليل ليل العديل والزين
والليلة العديل ويا رسول الله
رددنـها قريبات ود أبعشة بأصوات غير متناغمة
والحنة "خضرا" ملت صحن الطليص الأبيض أبزيقاً "ظهري"
وجنب الصحن كورتين "ِصغار" واحدة "سرتية" والتانية موية
والمبخر نارو "قاجة" والدخان "يعلو ويهبط" توجهه أنفاس الحضور العبقة
مبروك يا العريس السيرة والحنة
ولي بيت الحلال ليكم بنتمنى
و"ود أبعشة" إتوهط "قعد" في نص عنقريب "القِد" الماخمج
فوقو المرتبة أم ملايتن بيضا ومطرزة بالحرير الأحمر
ومن فوق ليهن فرشوا "البِرِش"
معمول من سعف ملون ناعم وأملس يلمع زي الحرير
والنسوان "إتراصصن " قعدن على "مقربة" في "العناقريب"
ومجموعة من الشباب ضاق بيـهن البكان ووقف بعضهن سادين "الحيط"
حيطاً مشرتم لكنو "مليس كرت" وريحتو "ضاربة" شدة ما هو جديد
والبـهناك للحيط "كاسن" داير زي الصلاة على النبي
"بِكري" إتشالبو زي "الحاجة السمحة"
لا صوت لا حِس إلا "أبو الشهيق"
لكن هو "شيت" نصاح ؟؟
وقريبات ود أبعشة لا هماهن ولا خساهن يرددن
تتبارك عليك ويومك يبقى سعيد
وتبكر بالوليد والفايدة تملا الاييييييييييييييييييد
ودأبعشة أكمل ترتيبات الحنة والعرس على أحسن الوجوه
قبضتو أمو صرفة الختة الكانو خاتنـها مع ناس "النخيل"
مشى السوق و"فضلة خيركن" إشترى تلاتة جلاليب بيضا
واحدة للحنة
والتانية ليوم وقفتو
والتالتة ليوم السيرة
ولمن إستلم الجلاليب "سرح بوشو"
وساقو خيالو
راكب حصانو وشايل سيفو
هلالو في راسو مربوط بلونو الدهبي
والحريرة في يدو
وينقز من قدام والسيرة وراهو
"دا اليوم الدايرنو ليك
يا ود أبعشة مبروك عليك"
إستلم من الخيات التلاتة جلاليب
وكان ما حدسوكن معاهن عراقيين ساكوبيس "خفاف" زي ورق سجاير البنسون
وكمان معاهن "جوز سراويل طويلة" وجوز قصير وشبشبين "سود"
واحد للحنة والتاني للوقفة والسيرة
وقبال ما تمسى وتغيب الشمش في هذا اليوم الميمون
ومن شدة الإستعجال
ما إنتظر "فشة" الملابس
وقرر يتحنن بيهن بي جدتن
الأمسية "بـهيجة"
و"الخلوق" متلملمة
من كل "صوب" يحضروا حنة "العريس"
ولعوا الرتاين وختوها في الترابيز نورت تقول كهربا من الرصيرص
دخل "جوة" الاووضة وفتح كيس "الهِدوم" وطلع الداير يلبسن للحنة
إستحمى وعلى "عجل" لبس وجا مارق
وصورة "إرقية" تجي وتفوت في راسو بعيد من ناسو
"يبشر" وفي سِرو يردد
"تم دور وإدور
عم نورو شال
فات الحلة نور
زي بدر التمام "
جمب العنقريب "تكو" ليهو تربيزة حديد "ختا" فيها كرعينو المحننات
معلقات "يحنن"
من بعيد لاحظ لي "حفيظة بت الناير" تتكشم" خاتا توبا في خشما "البرا سنون" وتعاين
تتبع "خطى" نظرات عويناتا "الدقاق" وفي بالو "لسانا المتبري منـها"
وسأل نفسو "المرا دي ما نصيحة بتعاين ـ فرق ـ الكرعين المحننات دايرة تصل وين ؟؟"
قلبو أكلو
صنقع ودنقر وتحسس هدومو "داخلي وخارجي" وإتعجب !
"ياربي دي مالا ؟؟"
هز يدو وصاح ليـها "أبشري آآآآآ خالتي حفيظة أبشري بالخير "
قامت وعدلت توبا وجاتو قريب تزغرت "أيوي يو يو يو يو "
وددنقرت في راسو قالدتو
إغتنم الفرصة وقال ليـها "بتعايني مالك ؟؟"
ولمن كان عندو شك في "مرمى" نظراتا
زاد قال ليها وهو متاكد من خبثها "وحات النبي جبتهن سروالين
لبست واحد والتاني هداك جوة قايلاني بلعب ؟؟ "
وأطلقت ضحكة خفيفة وإستسرتو قالت ليهو ..
"عاد ما دام جبتهن سروالين مو واحد مالك جايي أمفكو بالجلابية والعراقي ؟؟"
"نزل كريعاتك ديل مشتحن كدي ..."
"قوم علي حيلك ألبس ليك واحد وتعال آآآآآآآآ عشاي"
موضوع: "ود أبعشة" العريس "الشِفِق" لبس الهدوم قبال تِتغسِل تِتفشه !! 
الأربعاء 26 ديسمبر 2012 - 11:01
