الحبوبة :
يا بت ماشه وين جسمك ده جت مكشوف
أ حفظيهو العليك ما تخلي غيرك اشوف
أ كان هسي الولد شايفاهو فيك ملهوف
بعد ياكلك لحم تلقيهو منك اعوف
<<--------------------------------------->>
البنت :
يا حبوبه هوي بس جيلنا نحنا مغاير
وقت ما نفوت عديل صحباتنا فينا تعاير
الزمن اختلف داير القــــــــــوام الفاير
و بعد نقشر لبس نبرز معـــــاهو ضفاير
<<--------------------------------------->>
الحبوبة :
يا بت شوفي هوي درب العوج فوتيهو
في وش الغلط بابك عليك سديهو
ناهينا الشرع من العرض نـــــرميهو
مذكور في الكتاب لو مره بس اقريهو
<<--------------------------------------->>
البنت :
يا حبوبه بس ياهو اللبس و الموضه
ماك بتشوفي كيف الجامعه عامه الفوضه
لبسي عديل سمح من غيري ما مرفوضه
أ كان فيني الغلط من بدري كان مقبوضه
<<--------------------------------------->>
الحبوبة :
ها يا سجم الرماد ما تبقي ساي غبيانه
لبسك كان زمان كان قالو تب عريانه
أ كان في الدنيا زول ما قال عليك غلطانه
افكري لي الحساب والاخره كيف نيرانه
<<--------------------------------------->>
البنت :
يا حبوبه زين الفايده من خبراتك
ادعيلنا الصلاح يوم ما تحيي صلاتك
أ كان شايفه الغلط وعينا احنا بناتك
وباكر ننصلح خصينا في دعـــــواتك
<<--------------------------------------->>
الحبوبة
ما تقوي الرويس تمشي الغلط بالعنيه
و ما تبري العوج تنشغلي ســـــاي بالدنيا
احفظيهو الكتاب ما تحاكي لبس الغنيه
خلي العفه تاج و الجنـــــه تبقي المنيه
<<--------------------------------------->>
البنت :
و من اليوم كمان انا لبسي تاني عبايه
ما دايره الكريم ما دايره حتي مرايه
صديقه السوء كمان من هسي ماها معايه
و الدنيا التطير والجنـــــه تبقي الغايه
<<--------------------------------------->>
الحبوبة :
الشيطان زمان لي ربي قال بغويهم
علا الصالحين من الغلط بسنيهم
اتباع الرجيم في النار هناك برميهم
علا الفائزين جوه الجنان بئويهم
<<--------------------------------------->>
البنت :
يا ربي العطوف من العوج احميني
والشطيان رجيم في دربو لا ترميني
امشي علي السراط قبر الرسول وديني
و في جنات الخلد من النهر اسقيني
موضوع: يا حبوبه بس ياهو اللبس و الموضه 
الأحد 30 ديسمبر 2012 - 20:41
