وزير "التعجين" قائل رقبتو "كمال عبد الوهاب" صرح بأن السودان حا يكون في مصاف الدول العظمى بي "ختة" !!

التصريح في الراكوبة حيث افاد بانه لن يهدا له بال ولن يرتاح !! بسبب عائدات ضلت الطريق لجيب المواطن
"كأنو نحن ياهو البالنا رائق وفائق وكمان مرتاحين" وهو براوو "الفي الدنيا ما مرتاح"
نحن سبب همومنا عائدات كتيرة ضلت الطريق ودخلت جيوب الحاكمين وجيوبنا مليانة هواء وتصريحات
لكن السبب في همومه هو "زي ما قال" هــم المواطنين الشايلو وحائم بيهو في مناطق التعدين والتنقيب !!
حريف والله
المواطنين مساكين مرقوهم من مناطق زراعتهم لا يدهم ولا كراعهم خلوهم يزازو بالخلاء
عشان كدا الراجل دائر يتحرفن بجنس تصريحو الهبوب دا
عائدات التعدين كيف حا تدخلها إلي جيب المواطن مباشرة يا كمال "الأجسام" ؟؟
وأريتو كان إكتفى باللفة الحريفة دي اللما بصدقا هو ذاتو
كمان "توقع أن ينضم السودان إلي قائمة الدول العظمي" !!
كلام كبار كبار المابعرفو يصدق
طبعا علي كيفو هو الكلام بي فلوس ؟؟
كمان قال "الكلام دا في المستقبل القريب العاجل"
يعني ما المستقبل القريب الآجل ؟؟
وكلو "بفضل المعادن التي يمتلك السودان احتياطيات كبيرة من جميع أنواعها"
مش بفضل سياساتو بتاعة الحقن الزمان ديك
وشدة ما كان جادي قطع "في مفتتح زيارته لولاية البحر الأحمر بأعادة تنظيم قطاع التعدين الصغير بالولاية"
تخيل دائر يبقى مع العظماء بالتعدين الصغير الزي غربلة عيش الفتريتة
عشان كدا إقترح "تكوين صندوق اجتماعي تشارك فيه كافة الشركات العاملة بالولاية"

والله ياهو البضحك
بالمناسبة الصندوق البتكلم عنو الوزير دا هو اسم الدلع لما يعرف بـ"الختة"
أها وبعدين ؟؟ يا كمال تعدين ؟؟
غايتو من كلامو دا واضح بانو مافي "صرفة كاش"
خدمات بس يعني تدفع نصيبك وتنتظرو خدمات
كمان خدمات لكافة مناطق التعدين والقرى المجاورة
حظ الناس الماداخلين في الختة دي تجيهم الصرفة خدمات في صمة بطونهم
عشان كدا وصف صندوق الختة "بغير المسبوق"
طبعاً غير مسبوق ف"الحمد لله" كل الدول العظمى ما فكرت قبال دا في مثل هذا الإقتراع وإلا ما كنا حصلنا"هم"
شفتو الهنا النحن الفيهو دا ؟؟
عموماً الله يكون في عون سكان تلك المناطق المنكوبة بجنس الوزراء الموهومين ديل
ونوع خدماتو دا
دحين ما زي خدمات عائدات البترول الزمان ديك ؟؟
نصيب الناس منها شنو يا كمال عبد الوهاب ؟؟

قال انه لن يهدا له بال ولن يرتاح أن لم تدخل عائدات التعدين إلي جيب المواطن مباشرة

الخرطوم في 16-1-2013م (سونا) - توقع وزير المعادن كمال عبد اللطيف أن ينضم السودان إلي قائمة الدول العظمي في المستقبل القريب بفضل المعادن التي يمتلك منها السودان احتياطيات كبيرة من أنواعها .

وقطع عبد اللطيف -في مفتتح زيارته لولاية البحر الأحمر التي ابتدرها صباح أمس إلي حاضرة الولاية وتستمر يومين برفقة وفد كبير من الوزارة- بأعادة تنظيم قطاع التعدين الصغير بالولاية بجانب تكوين صندوق اجتماعي تشارك فيه كافة الشركات العاملة بالولاية لتقديم كافة الخدمات لمناطق التعدين والقرى ، واصفا الخدمات التي سيقدمها الصندوق بغير المسبوق لأهالي تلك المناطق في جميع القطاعات " تعليم ، صحة ، مياه".

وأكد عبد اللطيف حرص الدولة على دعم فطاع التعدين التقليدي عن الذهب ، مشيرا إلي ان عائدات التعدين يجب ان يستفيد منها المواطن . وقال انه لن يهدا له بال ولن يرتاح أن لم تدخل عائدات التعدين التقليدي إلي جيب المواطن مباشرة حرصا على دعمه ، وزاد هذا الشأن " شايلين فيهو سيف ". الراكوبة / 01-16-2013 04:43 PM

» قمر صناعي مخصص لمراقبة كافة التحركات في السودان "البرقد في حوش يلوم رقبتو"
» باع ثلث السودان، بعد أن كان أكبر الدول العربية مساحة،
» السودان في قائمة أسوأ الدول من حيث انعدام الأمن الغذائي
» إذا لم ننتخب المواطن عمر احمد البشير من ننتخب
» معهد دولي متخصص : السودان أكثر الدول العربية تعاسة