بعناك للمجهول.. وقبالا بعنا وطن

نتح الحنين جواي.. طراني حلتنا
زمن الجمال والخير.. أيام مسرتنا
شجر العشر والنيم.. المالي سكتنا
صوت الصفق والريح.. وأغنام زريبتنا
ضل الضحى الممحوق.. وكبابي جبنتنا
الضحكة والترحاب.. وبواقي ونستنا
والوقفة جمب الباب.. لي ناس معزتنا

عايشين على الموجود.. حابين بساطتنا
يوم كنا متكاتفين.. و(الجد) منارتنا
والقمرة عز الليل.. ضوّت رتينتنا
نسمة دعاش الصيف.. وريحة زلابيتنا
أمي بتسوي الشاي و(حبوبة) حجّتنا
وهسع بقت في الدار..(يا ويح نخوتنا)
وشكراً لأهل الدار.. الداروا سوءاتنا

{ حبوبة وينك وين؟.. حبوبة والله زمان...
كاتلني شوقاً ليك.. ولي حضنك الدفيان
منك عرفنا دروس.. وروينا ريد وحنان
بي توبك المعطون.. غتيتي كل بردان
ودعيتي بالتوفيق.. وحصنتني بالمنان
عفواً.. ملانا غرور ونسينا كل الكان
لا فهمنا درس البر.. لا قيمة الإحسان
وعرفتي درب الدار.. وضاع مننا العنوان

{ (حبوبة).. زوريني.. أنا داير أحجيك
بي قصة الأحفاد.. الخانوا ماضيك
صغرت مروءتنا.. وكبرت مآسيك
لا سدّ جوعك حن.. لا لهفه ترويك
لاهين ورا الدنيا.. ومرات كده نجيك
لا بنفهم أحزانك.. لا بندري بالفيك
ولو يوم ظلمناكي.. عدل الله راجيك

{ الغول ختف فاطنة.. وما فينا أي حسن
ملينا من عجزك.. فتشنا ليك سكن
وكل ما يطول عمرك.. حتشوفي ياما محن
إمكن نزورك يوم.. لو مرة بس أمكن
لو سنحت الأحوال.. ولقينا باقي زمن
بعناك للمجهول.. وقبالا بعنا وطن[justify]

الحلوة ما بتتعوض