سلام ياناس الحصاحيصا ..سلام

ياسلام
قابلت الدكتور الصديق الانسان بكرى عثمان حمد هاشا باشا وفرحان ..وبطريقته المحببة اللطيفة فى الكلام قال لى يازول نحن عملنا موقع للحصاحيصا منها واليها ..وقعدت افكر تذكرت ذلك المكان الجميل ابو شجرات سامقة التى تراها من بعيد على ضفاف شارع الظلط وانت ماشى على مدنى ..ومرات يقيف البص حسب مزاج السواق فى واحدة من الكافتيريات تفطر,او تتغداء ودايما مع رغيف حنين كدا, ومرات تشرب الشاى بالنعاع .إذن بيناتنا الملح والملاح ...لاحولا واتذكرت مرة زرتها مع صديق وزميل عمل(خط انابيب البترول) سيد حمد احمد حمد النيل - كان ما اكون ملخبت فى اللاسم الزمن طال والمسافات- إذن انا من الحصاحيصا ..ياربى بعرف الصحفى هاشم كرار ؟ ودى هوادة , وعندنا قريبنا محمد الكودة فيها وكمان اهل..والثابت فى نفسى قصة من التاريخ حين قامت السلطات الاستعمارية في رفاعة بسجن ام سودانية خفّضت بنتها خفاضا فرعونيا ورحلتها سرا الى الحصاحيصا وخطبة الاستاذ محمود محمد طه القوية فى مسجد رفاعة للدفاع عنها ومشاركة اهل الحصاحيصا فى اطلاق سراحها..وكدا اصبح بيناتنا التاريخ الذى احبه وعندها حسيت انى الزين...
وكان الزين مثل الديك بل أجمل
مثل الطاووس البسوه قفطانا من
الحرير الابيض, ومنطقوه بحزام
أخضر,وعلى ذلك كله عباءة من المخمل الزرق
فضفاضة يملأها الهواء فكأنها شراع
وعلى رأسه عمامة كبيرة تميل قليلا
الى الامام , وفى اصبعه خاتم من الذهب
يتوهج فى ضوء الشمس نهارا, ويلمع
تحت وهج المصابيح بالليل, له فص
من الياقوت.
كان منتشيا دون شرب من الضجة
الكبيرة التى تضج حوله ..الخ الخ
الطيب صالح
دى كان شعورى وانا اقرر التسجيل معكم فى موقع
الحصاحيصا ..شايل معاى سلام ياناس الحصاحيصا ..سلام
ومعكم ان شاء الله وبه التوفيق والسداد والرفعة لموقع الحصاحيصا
ملحوظة للتعارف ..
اسمى عمر ادريس
من الحجير مركز مروى ..اقيم بفيلادلفيا
وبما انه للسلام والسؤوال عن الحال..الحصاحيصا - الاسم - جا ومن وين وبعنى شنو ؟
ولكم جميعا تحياتى والشكر الجزيل لدكتور بكرى

يا سلام يا عمر...
مرحب بيك و انت تلبى الطلب بالانضمام ...
حالتى انا بكوس فى الطريقة التربطك بالحصاحيصا و تاريك انت مربط بالربيط دة كلو .. اها انا تنازلت من رضاعتى حقت البلد معاك .. لكنك برضو بتلقانى مربوط معاك بالربيط الجبتو براك انت...
يا ناس الحصاحيصا يكون الاسم القاصدة عمر هو سيد عوض!!!
عموما ارجو ان ترحبوا معى بالاخ عمر و توروهو نحن منو و نحن شنو جينا من وين و اسمنا جانا من وين ...
بكرى

فعلا يا دكتور بكرى ..هو سيد عوض له واسرته التحية والسلام
وشديد الاعتزار على الخطأ غير المقصود
الغريبة قريب دا قابلته فى الخرطوم واتوانسنا ..لكن تقول شنو بس
على البتاع الاسمو الزهايمر دا .. يمسك جارك تجى ماشى يخليهو يتلحك؟
Rolling Eyes

الود والتحايا

سلام ومرحب بالاخ عمر إدريس

طالما البص وقفك فى كافتيريات الحصاحيصا وفطرت وإتغديت، أكيد بتكون بعد الفطور او الغداء شربت ليك قزازة قزازتين مُشبِعات من (فُرات الحصاحيصا)، وبكده بتكون إنت بقيت أخونا فى الرضاعة. بس إن شاء الله زوجتك ماتكون من بنات الحصاحيصا، عشان مايلموا فيك مولانات الزمن الهمج ده ويمسكوا فى كلامى القاطعو من رأسى المدوقس دا، ويقلوا ليك لازم تطلقها لانها اُختك فى الرضاعة Smile

.

اما بالنسبة لإسم الحصاحيصا من أين جاء، يقال والعُهدة على القائل (القائل دا، انا ذاتى ماعارفو منو (لاقاك ذى اللفحى دا Smile

)). ملحوظة قبل ما أبداء التنظير وهى: المرجو التصحيح إذا كانت الرواية التالية غير صحيحة او إذا كان هناك شخص يعرف رواية او معلومة أكثر دقة وصحة فاليتكرم لنا بها.

المهم الرواية بتقول، طبعاً زمان الناس كانت بتبارى مجرى النيل عشان يتخيروا لهم سكن او منطقة يقطنوا فيها وطبعاً خيارهم للنيل من أجل الماء. ولكن كانت المشكلة انو المناطق الحول النيل مليئة بالارضة، وطبعاً الارضة معروفة بأنها تأكل الأخشاب، وبما انا المبانى فى القديم كانت عبارة عن رواكيب وقطاطى وقصب، كان عليهم ان يتخيروا مكان ليس به أرضة او قُل نسبة قليلة من الارضة، ولكن السؤال هو: كيف كانوا يعرفون فى القديم ان المكان هذا او ذاك ليس به أرضة؟. طبعاً زمان كان لافى أشعة ليزر حمراء وللا خضراء ولا كان فى (أرضة تلسكوب)، ولكن أعمامك الشفوت ديل كانوا تفاتيح، فكانوا يجمعوا كمية من (الحصي أى الحصحاص) فى شوال بتاع خيش او شئ شبيه بذلك ويتركونه يوم او يومين فى المنطقة التى يريدون السكن فيها، فإذا جائوا ووجدوا الارضة قد أكلت الخيش وتركت الحصي/الحصحاص ذهبوا لمنطقة اُخرى متابعين مجرى النيل، فيقال عندوا وصل هؤلاء الشفوت التفاتيح عند منطقة الحصاحيصا الحالية، وطبقوا نظريتهم بتاعت الحصى والخيش دى، وجدوا فى اليوم التالى ان الارضة أكلت جزء قليل جداً من شوال الخيش بمقدار خُرم كدا، فتدفق من الشوال القليل من الحصى/الحصحاص، فأراد البعض منهم (وديل كانوا فارات داقسين ساى) ان يواصل فى البحث عن منطقة اُخرى، ولكن كبيرهم التفتيحة الذى علمهم الشفتنة قال لهم: أذهبوا انتم وأتركونى أنا هنا جنب حِصيحِيصاتى ديل (وهى كلمة لتصغير كلمة حصى او حصحاص (طبعا انا قادى عربى، ماعارف التصغير الصحيح))، يعنى بالعربى كدا قال ليهم: شتتوا إنتو يافارات وخلونى انا جنب حِصيحِيصاتى ديل، وكان يقصد بأن هذة المنطقة بها قليل جداً من الارضة وهى صالحة للسكن. وعندما يُسألوا هولاء الفارات ديل عن كبيرهم كانو يقولون تركناهو جنب حِصيحِيصاته هناك، او إذا اراد البعض زيارته او الرجوع له كانوا يقولون أيضاً: نحن ذاهبين اليه عند حِصيحِيصاته وهكذا دواليك إلى أن تحول ألإسم بِقُدرة قادر إلى الحصاحيصا Smile

.

يعنى كدا إنتَ أخونا فى الأرضة، أقصد أخونا فى الرضاعة Smile

.

لك الود من كل فجٍ عميق
عثمان حمد عثمان حمد

شكرا كتير ياعثمان كتر خيرك على الترحيب والتداعى الجميل والمعلومات الوافرة
بالله موضوع اسم الحصاحيصا كدا ؟ يعنى المثل " الارضة" جربت الحجر عندو
علاقة بالحصا برضو؟.على باليمن جبت حديث كدى نمشى نبحت ونجيك ..
بعدين شوف روعة البدايات دى.. اول شى ..البروف بكرى عثمان حمد
يجيك بعده..عثمان حمد عثمان حمد لامن خلوتنى اغلط فى اسم صاحبى سيد عوض
واديهو ليك حمد من عندى ..
وبالمناسبة دى قالوا ياحبيب فى الحصاحيصا ولا العقدة - تحذر امريكا - ماعارف
واحد عمك شفت وبتاع لبط اسمو حمد مجنن الجماعة , لكن بحكم الجيرة
والقرابة مادايرين يشتكوه لمحكمة العمد ..لكن فى النهاية فاض بيهم وودوه ..اها لما وقف
قدام المحكمة وداير ينضم ..شيخ البلد رئيس المحكمة قالوا حرم ولا كلمة .. انا سااااااامعبك ياحمد
دحين وفى رواية اخرى ممكن اعدلها واقول - حرم تواصل كلامك السمح - وساااامعبك
يا .. عثمان حمد عثمان حمد
سعيد والله احادثك واكون معاكم
وكدى نسمع باقى التحليلات ..ونواصل
ودى وسلامى للمعاك

الاخ عمر..
هناك مواضيع كثيرة كتبت عن اصل كلمة الحصاحيصا.. و اظن ان للاخ حسن وراق موضوع فى موقع اخر عن اسم الحصاحيصا .. يا ريت يقلعو و يجيبو لينا بى هنا..
ما تطول الغيبة
بكرى

تشكر يادكتور ..وهاك ناس الحصاحيصا ديل هدية

اولا مرحب بيك ياعمر فلادلفيا وهاك الرمية دي:
شكرا يا كمال اولا علي الدخول
وشكرا ليك يادكتور ابراهيم انا عارفك ضقالي اصيل ودباسي ((نص مكنة)) الله يرحم الوالدعرف خارطة طريقه مبكرا ويرسي اولي لبنات الانصهار بين الدباسين والشوايقة ليخرجكم الينا (( دباقية او شواسية )) الام سليلة سلفاب والوالد من رحم الضقالة...
وبالمرة عشان نوصلك يا كمال لحدي اهلك الدباسين اولا بالتبادي ورينا انت زي ما بقولوا الشوايقة:
انت هيل منو؟؟ وزي ما بقولوا اخرين معرفة الرجال كنز ..
والدباسين هم من اول القبائل الرعوية التي جاءت من الرميلة وكاب الجداد وبتري استقرت بالمنطقة قبل قيام المشروع .. والمنطقة تقع بين حدود الحلاويين في الشمال وبين الشنابلة في الجنوب وفي رقعة صغيرة اراضيها لم تكن ذات اهمية حتي يتنازع عليها الشنابلة والحلاوين واشتهرت تربتها بالحصي.. في هجرة الدباسين وترحالهم مع البهائم استقروا غرب الحصاحيصا في الميعة التي تقع بالقرب من ودالسيد والقوز وابي جويلي (( كما افاد بذلك المؤرخ عثمان عباس)) وانتقلوا الي موقع المستشفي الحالي وجزء منهم اقام في منطقة الضقالة الحالية.. وعندما قدم احد امراء المهدية ومن بيت المهدي وهو الاميرود ادريس وهو جد حاج علي الحسن وقريب آل دناقلة الحصاحيصا الوداعة عثمان وحمدناالله وسلمان ساتي والد مولانا الصادق وكل اطرافهم الخليفة بشير عثمان وآل كولا وفضل الله حمد والكثير من القاطنين بالحي الشرقي والذي كان يعرف بالديم لازدهار تجارة البحر ووجود اربجي اكبر موقع تجاري ومن المستشفي انتقل بعض من الدباسين الي الاقامة بالقرب من النيل الازرق في الحي الشرقي الحالي. من الشخصيات الاولي التي هاجرت الي الحصاحيصا الفكي الزوين وهو جد الدباسين بالحصاحيصا ومن شجرته تنامت فروع وبطون وانتشروا في احياء الحصاحيصا ومن الافادات التاريخية هنالك بعض من يشير اللي ان الشيخ القرشي ود الزين((طيبة)) صلي علي الفكي الزوين عندما ادركته الوفاة ويقدر ذلك قبل حوالي 300 سنة.عند قيام مشروع الجزيرة وقبله عند بناء الخزان (( سنار)) مر خط السكة الحديد بالحصاحيصا لينقل احتياجات الخزان بدأت الملامح الاولي لتطور الحصاحيصا وبدأت هجرة القبائل الاخري وخاصة الحلاوين والشكرية وتزاوجو بالدباسين واستقر جزء منهم بالحي الاوسط وبردب بردب وعند قيام مشروع الجزيرة بمختلف اقسامه ازدادت اهمية الحصاحيصا الاقتصادية واصبحت تحفز هجرات العديد من القبائل الاخري واول هذه الهجرات كانت من منطقة الجعليين (( العالياب والزيداب)) لنقل تجربة المزارعين هنالك بوصفهم اول من زرع القطن في مشروع الزيداب الزراعي.الهجرات الاخري كانت من قبائل الشمال حيث مارس التجارة خليط من الشايقية والبديرية الا ان القطاع الاعظم من اهل الشمالية عمل باقسام المشروع في المحاريت والجلوجيا والهندسة الزراعية والآبار والري وسكة حديد الجزيرة والمحالج وهم خليط من قبائل الشايقية والبديرية الدهمشية والرباطاب والانقرياب والعفاض وقليل من الدناقلة والمحس والحلفاويين وجميعهم من قبائل الشمالية والذين كان يطلق عليه الشوايقة اجمالا وهذه القبائل قدمت الي منطقة الحصاحيصا للعمل والتجارة واصطحبوا معهم ثقافات متعددة في اساليب الحياة وجميعهم من مجتمعات زراعية تعرف حياة الاستقرار وتنتهج اساليبه في البناء والسكن وعرفوا التعليم عن طريق الخلاوي المنتشرة في مناطق الشمالية فاصبحت المنطقة بوتقة انصهار لكل المكونات الثقافية والخلفيات الاثنية بموروثاتها المختلفة وطبيعي جدا في مجتماعتنا .. مراحل الانتقال والتعايش وقبول الآخر تمر عبر سلسلة طويلة المعاناة والصبر والافرازات السالبة وكل منا يعتز بذاته ونفسه واسباب اخري افرزت العديد من الآثار السالبة في قبول الآخر ولعبت الانتماءات السياسية عامل لآخر في تأخير قبول الآخر وعمدت الانتماءآت الطائفية والسياسية في ازكاء روح القبلية من التباعد والتباغض والذي لا معني له بين بعض السكان الا ان التواصل بين الاجيال وانتشار حركات الوعي في المدارس والاندية ودور العبادة خلق شكلا من الاانسجام والقبول والحميمية والتوادد بين الجميع ولعل هذا هو حقيقة السحر والابهار في المجتمع الحصاحيصي الذي يلفظ كل اشكال الماضي السالبة من اجل حصاحيصا واعدة بالمني والامل والغد المشرق وكلنا اهل نذيب الانتماءآت القبلية التي لم تعد ذات بال خاصة بعد ان تم تداخل وتزاوج الاسر في الحصاحيصا التي تتجه نحو قبيلة واحده وهي الحصاحيصا فقط..
ودام صفاك موفور
حسن وراق حسن

عدد المساهمات : 26
سجّل في : 28 يناير 2009

والله داير اقول ليك حاجة
علي بالحرام انت وبكري وهاشم كرار بيناتكم شبه عرفتوا من كلامك..
بعدين ذكرتني فلادلفيا وناسا الحلوين من صديق عبد الهادي لحدي اوكاش واوشيك والاخت مريم محمد الطيب والبقية
وبالمناسبة اذكرك بي قصة سجن محمود محمد طه الكلام دا كان في 1946 تقريبا والبنت التي رفض الانجليز ختانها كانت الممثلة فايزة عمسيب طبعا ما مثلة الدور ولكن علي الاقل اسي فايزة سنونه وقعوا وبقت حبوبة وتكون من مواليد40 ما كبيرة يعني 120 سنة الا خمسين كدا..
بعدين زي ما قال ليك عثمان حمد اصل الاسم هو مقتبس من الحصحاص ويقال ان الفكي الزوين احد زعما الدباسيين وهي قبيلة رعوية سكنوا المنطقة وكانت مليان بالحصي وسماها الحيصحيصه وهكذا كتبها الانجليز علي محطة السكة الحديد
والله اعلم
تحياتي ودام صفك موفور

» ياناس الحصاحيصا القاعدين فى الخرطوم اعملوا حسااااااابكم
» اصحوا ياناس الحصاحيصا
» سلامات ياناس الحصاحيصا دوت كوم
» المفاجاء ياناس الحصاحيصا ايمو جات
» رياض الاطفال ياناس الحصاحيصا