بلف عوض وجمل ود قلبا

ناسنا ديل "ما بنجيب إسمهم هوى الدنيا ومتاعا رسمهم"
قاعدين في طربيزة كتشينة اليوم كلو
الصيف والخريف واحد
ما جايبين للدنيا خبر
يجرجرو ساااااااااااي ويفتحو
وأي واحد منـهم تلقاهو قافل "جوز سيري" والبائظ "جوكر"
وبعدا يلهلهو "جر ياخي نحن قافلين " مستعجلين للفتوحات
"ياخي ما كتلت لي الشائب دا في يدي"
وتلقى الورقو سمح يغني
"الشائب دا الله بيني وبينو ...
تطير اللبرة وتقد لي عينو ..."
وداك بـهناك
"غطي لي الدامة دي ياخي "
"خمسييييييييييين .....
وعلي الطلاق لو جدعت طاقيتك كانت تفتح"
ولمن يؤذن الآذان طوالي الورقو "كعب" يرمي ورقو ويقول :
"كدي النقوم نصلي ونرتاح منـها"
والصلاة على "النبي" الكان بقول "قم يابلال فأرحنا بـها"
أها جماعتنا ديل هدا شغلهم
شائب وبلي ودامة ودوامة
كل ما تنكرب الضغطة
يرمو الورق وطوالي يجي الإقتراح
"أقفل ياعوض ريحنا منـهم"
وعوض دا للذين لا يعرفونه هو سباك المواسير
البوزن البلوفة
البلف "بقى" داخل أي موضوع "غصب حسنة"
والماعاجبو يشتكي لإدارة التعليم بالمحلية
لو الكلام عن سياسة بسمارك الخارجية نعرج على البلف
نفتتح كشك للتوتو كورة في الوادي الأخضر نلف للبلف
نوافق على "سد النهضة" نذكر المصريين بالبلف
يرتفع الدولار ويمنع المركزي إستيراد السلع ندخل البلف
تضغط الجبهة الثورية وتنشط على تخوم المركز يظهر البلف
تموت غنم زهرا وتلحق الصح السبب البلف مش النتف
حتى أغنيتنا المفضلة بقت :
" إن ما بكيتك سنا
وخليتك باقي العمر
تتشهى فوق الهنا
أنا ما بكون أنا

ما بنخليهو البلف
وما طالبني احلف
وانا الوعدي ما بخلف
خليك هناك تتلف
وانا بـهناك بنسف
أبعبص في البلف
وتلف وتلف وتلف
وتجيني مذلووول هنا
أنا ما بكون أنا"

وأول أمبارح في حفلة في الديوم
الحفلة "رابة" والجماعة شغالين بدل النبق النبق النبق بقت
" البلف
البلف
البلف "

ياربي دا من البلف ولا الولف ؟؟
حتى والي الخرطوم "الله يرحمو" نسى الخريف وبقى في البلف
وحسب سودانتربيون
"ولاية الخرطوم عقدت اجتماعاً موسعاً برئاسة الوالى ...
واتخذت حزمة من التدابير والاجراءات ...
لمعالجة تداعيات قرار الحكومة القاضي بقفل البلف ...."
غايتو بقت علينا حكاية جمل ودقلبا المتداولة في الأسافير
ود قلبا قالو متعود على السقوط في إمتحان الإنشاء
مع إنو الإنشاء من أسهل الإمتحانات في جميع المراحل
الحكاية دي ما وقعت لمدير المدرسة في راسو ولا في "كراسو"
وقرر يستدعي معلم الصف ويستفسره عن هذا "السقوط" المتكرر
المعلم أوضح للمدير السبب وقال له :
((ود قلبا دا في كل مرة نقول ليهو يكتب عن أي موضوع ..
يدخل لينا في موضوع آخر .....
وعلى سبيل المثال طلبنا منه أن يكتب عن فصل الربيع....
فكتب فصل الربيع فصل جميل ...
تتفتح فيه الازهار وتكثر فيه الاعشاب.....
والأعشاب ياكل منها الجمل ....
والجمل حيوان اليف يستخدمه البدو في التنقل وحمل امتعتهم ...
والجمل حيوان صبور يتحمل العطش لعدة ايام ....
ويمشي على الرمال بكل سهوله ويلقب بسفينة الصحراء )).
ومثال آخر يا سعادة المدير
طلبنا من ود قلبا أن يكتب عن اليابان واليابانيين وصناعاتـهم
فكتب:
((اليابان بلد متحضر ....
ويصنع اشياء كثيره مثل السيارات ....
والسيارات توجد في المدن وتساعدهم على التقل .....
ولاتوجد عند البدو ......
لان البدوي يستخدمون الجمل ......
والجمل حيوان اليف يستخدمه البدو في التنقل وحمل امتعتهم....
والجمل حيوان صبور يتحمل العطش لعدة ايام ....
ويمشي على الرمال بكل سهوله ويلقب بسفينة الصحراء)).
وقال المعلم للمدير "حاولنا معاهو لكن بدون فائدة"
"مش كدا وبس
تخيل ود قلبا كمان إشتكاني لإدارة التعليم"
وكتب ما يلي :
((السيد مدير التعليم
تحية طيبة وبعد ....
أكتب لكم هذا الخطاب متظلماً من معلم اللغة العربية "الإنشاء"...
فقد ظلمني كثيراً فكلما أكتب عن موضوع يمنحني صفر ....
وصبرت عليه كصبر الجمل .....
والجمل حيوان اليف يستخدمه البدو في التنقل وحمل امتعتهم ...
والجمل حيوان صبور يتحمل العطش لعدة ايام ...
ويمشي على الرمال بكل سهوله ويلقب بسفينة الصحراء)).

وفتحت الحكومة البلف بعد أن أغلقه السيد رئيس الجمهورية ! وده يا محبوب فيلم طويل وممل أشبه بكرتون توم وجيرى فى الطول مع فارق إنو حلقات توم وجيرى لايُملّ منها،وطبعاً يا محبوب الحكومة لها سوابق مع موضوع البلف ، فقبل موضوع بلف البترول ، كان فى بلف الموية عندما أدعى أحد المسئولين بأن المعارضة بتلعب فى بلوفة الموية فى منطقة البرارى حتى تدفع المواطنين للخروج !

هسى سد النهضة ده ما بلف للنيل الأزرق ، وما بعيد بعد شوية فى أطار البلوفة والسدود دى تسمع بأنو جنوب السودان حيعمل سد ، واللى بيلعب بالبلف بيحترق .

» كن قلبا نقيا وانسى الجراح
» قصة البوست الذي خدع المفسدين في وحدة الحصاحيصا الادارية (ضيع عليهم الملخة )وجمل الحصاحيصا ( توجد صور ومستندات وتجاوزات)