بعد التعديل.. برنامج أغاني و أغاني (نسخة 2013م).. دعوة للتقييم..

إنقضى نصف الشهر الفضيل متمنياً أن يتقبل الله تعالى صيامكم و قيامكم و طاعاتكم..

و بعد..
أتابع مثل الملايين و يومياً برنامج (أغاني و أغاني) الذي تقدمه قناة النيل الأزرق منذ أعوام و الذي أتى هذا العام مغايراً تماماً من حيث المؤديين الغنائيين و تغيير جلد (الحرس القديم) ما عدا الفنان جمال فرفور و فهيمة عبد الله و طه سليمان ، هذا إذا إعتبرنا أن (الحرس الجديد) من بين تلك المجموعة (المبدعة) التي كانت تشارك في البرنامج بالغناء و (إطراب) المشاهد..
و إن سعى مقدم البرنامج الأستاذ السر قدور و من يقفون معه على تغيير (شكل) البرنامج، إلا أن بعض من يشاركون فيه بالغناء، يظلون خصماً على البرنامج و (إزعاجاً) للمتابعين له و الذين قد يجدون في قفشات و قهقهات الأستاذ السر قدور (طرباً) و إمتاعاً أكثر مما يؤدي بعضهم و الذين يحولون إسم البرنامج ل(أعاني و أعاني).. حتى محتوى البرنامج نفسه أصبح في جُل الحلقات مجرد (تكرار) لنماذج الحلقات السابقة في الأعوام السابقة..!!
شخصياً، إستمتعت بالحلقتين التوثيقيتين عن الراحل الأستاذ أحمد الجابري و الحلقة التوثيقية عن الراحل التاج مصطفى، بجانب أغنية (وشوشني العبير) في الحلقة التوثيقية عن الأستاذ ابو أمنة حامد و التي أمتعتني فيها كلمات الأغنية و أوركسترا البرنامج (المميزة) أكثر من غيرها.. بجانب هذا، أرى أن المبدع مصطفى السُني و أحمد المأمون و الأستاذة زحل أدم و الأستاذة نسرين الهندي يمثلون إضافة مميزة للبرنامج و يصنعون الفارق (المطلوب)..
لست بالناقد الفني أو الدارس للموسيقى، بل مُجرد مستمع و متلقي (عادي) و أشهد لنفسي بذلك.. مجرد إنطباعات (مُتابع)، أتمنى أن تكون موضع نقاش مع الذين يخالفونني الرأي قبل الذين يشاركونني ذات الرأي..
و دمتم

افتكر ان البرنامج توثيقي اكثر من انه تطريبي
لذلك الاداء يغلب عليه الاحساس الخاص بكل فنان
ولكن يظل المدعو معتز صباحي هو السؤال المحير بلبسه وادائه
وللاخرين راي اخر جدير بالاحترام

الاستاذ الرشيد
رمضان كريم
اين انت يا رجل؟
لابد تحت سنون السر قدور دا عشان عارفو ما بعضي ؟
اسمح لي بالمداخلة:
عملية التنوع فرضتها ظروف من رحلوا نادر خضر ومحمود ع العزيز وغياب مجموعة لم يؤثر كثير لان التطريب لم يغب ونحن نستمتع بالقديم المعتق باصوات واداء جديد
اقول ليك صراحة اعجبني جدا المطرب الربط راسو نسيت اسمو يغني بطريقة فيها شخصيته

الرشيد كل عام وانتم بخير
لابد أتاريك فوق رأي
والله متابعين أغاني وأغاني بالبلف
إجي جمال فرفور طوالي أقفل يا عوض
المهم البرنامج مفرق علينا شوية
حلقات التاج مصطفى والجابري تظل الأميز
رغم فزلكة المغني المحجب "صباحي"
الرابط راسو وفاكي حنكو التحت
والله لمن غنى للجابري إلا قفلت الصوت
الزول دا عندو مشكلة مع تحريك فكيه "تضرس"
جايب ليهو طريقة قاطعا من راسو
غايتو هو ومعاذ جايين بحساب قدور لجماهيريتهما
ولحدي الآن التفوق "في رايي" لأحمد المامون"
ومصطفى السني ومنى حسن جمعة "مجدي"
أحمد المامون لحدي الان متفوق على الكافة بالملهمة
ومتفوق مع منى عندما حققا أحلامـهما وكل عاشق عقبالو

يا الرشيد ، كل عام وانتم طيبين ، إن نسخة 2013 ينقصها الابداع
كثيراً ، الأ انى بحكم العادة متابع البرنامج ، واحياناً ازوغ منه !!!!
واتابع باستمتاع الفنان السنى مصطفى حتى وسط كل هذا النشاز.

من قبيل افتش فيها
وعشان تاني تبقى في متناول الشهقة
حققنا احلامنا وكل عاشق عقبالو
احمد المامون ومنى "حسن جمعة"
الدقيقة 9 من فيديو الحلقة (11) كاملة

الرشيد يا خي مالك علينا ؟؟
كنا بعيدين ونسمع بالبلف
والله يستر ما تكون فوت حلقة اليوم (14) مع عبد الرحمن عبد الله
بدأ فرفور بمشاترة رمية من حتة و"ضابط السجن" في حتة
ورغم هبوط أسهم زحل ونادر في ثنائية ست الفريق
إلا أن طه سليمان إلتقط القفاز وشقيقيش ما أراد ودانا
وإيقاع النوبة إهتزت وإرتعدت له الفرائص
ساعدته الفرقة الموسيقية بإجادتـها التوزيع والاداء
ومساعدة الحضور "الشيالين" في اداء جماعي متناغم للغاية
وجدي الريل أبو قزيمة نقلتنا إلى رهيد كردفان
كردفان الممحنة تراوح بين نارين
فيا نار كوني برداً وسلام على كردفان
كردفان التي تدخر كل هذا الجمال

طه سليمان "شقيش "
حسب رايي فهو نجم هذه الحلقة
الدقيقة 27 فيديو الحلقة (14)

ياخونا سيد البوست دا مشى وين ؟؟؟
خليتنا زي جمال فرفور مستلمين برنامجك على حسابنا
على كل حال دي آخر مداخلة لي وكل عام وانتم بخير
وأتمنى ألا تطول الغيبة وأن يطيب الحضور واللقاء
المهم إنتهت قبل شوية الحلقة (15) مع الطيب عبد الله
وبعيد عن الغناء فقد أظهرت الحلقة مأساة المبدعين في هذه البلاد
مبدعون بحق وحقيقة إضطرتهم ظروف الحياة للهجرة والغربة
وعادوا بعد ان تقدمت الأعمار وإنقطعت الأواصر إلا من قليل
عاد الطيب عبد الله وله من فنه ما يردده ويجتره الوجدان في أسى
وعودته وظهوره في البرنامج زاد من هول المأساة التي تغنى بها قبل هجرته
والغريب عن وطنو مهما طال غيابو
مصيرو إرجع تاني لي أهلو وصحابو
ينسى آلامو وشجونو ينسى حرمانو وعذابو
إلا قلبي يا حبيبي في هواك طال أغترابو
وبالفعل فقد عاد و"بح" صوته وتمنى في نهاية الحلقة أن يعود تاني ليواصل المسيرة
ومع أمنياتي في تحقيق ذلك إلا ان الصوت "راح" في غياهب جب الغربة
وضاع معه ذلك الألق والحس الراقي الشفيف
وليل الفرح ما زال أهزوجة يتغني بها المحبون العاشقون وفي القلب جرح نازف علي باب الفرح
بدأ "كالعادة" الشريك "المفوه" جمال فرفور يغمض ويفتح في عينيه سبة بلا سبب
أعقبه معتز صباحي وغنى بطريقته العجيبة الحيرت الطيب عبد الله ذاتو وهو أصلاً محتار "والله غالب"
بعدهما تألق مصطفى السني وأعاد المسار للجلقة بجديته وإنضباطه المعهود
وخرج لأول مرة من جلباب أبوداود وأدى نبع الحنان بطريقته "هو"
يا عالية يا نبع الحنان
ويادرة يا ست الحسان
أنا حبي ليك فاق الظنون
وإخلاصي باقي مع الزمان
وأطرب وكفى ووفى
لحن الختام السنين العشت فيها معاك هنايا أداها طه سليمان ومشاركة الطيب عبد الله
وقصرت إمكانيات طه في أداء الأغنية وعجز الطيب بسبب صوته من إعادتها سيرتها الأولى
والله أيام يا زمان نبكي نتحسر عليك

حكاية المحبوب مع فرور ذكرتني حكاية حسن كدوشة مع اللاعب زاهر اب يايات

سألوه يوم قالوا لايه الشفيع ده لعاب ولا ما لعاب

قال : والله زاهر ده كان طلع فوق الكفر برضو ما لعاب

حسع أستاذنا المحبوب ده كما اده فرفور هبشة ولا بعلق علي الباقيين

رأي الشخصي أن نجم الحلقات ود المامون الذي آجاد وامتع

الماقدرت ابلعه نهائي ( معتز صباحي ) ده إضرس عديل كده .

يا منصوري "جيتك تاني"
الغريبة جمال دا أنا مكجنو بي رواشتو دي
ما بتكيف للفنان المدووش
بالله شوف السني لما قام بشر
السر قدور قرب يديهو شبال بي جبهتو العريضة دي
غير كدا لو لاحظت ما حافظ كثير من الأغاني الإتصدى ليها
وبركز "في الفعاليات الأخرى" على الحضور دون تقديم شغل خاص بيهو
كدي قارنو بدفعتو ناس محمود ونادر عليهما رحمة الله
بعدين أسي دقوشة منو أنا ولا إنت ؟؟
نتكلم عن الباقيين في صمة خشمن ؟؟
ما جمال "مبارك" دا دائما ببدأ "الترويس"
عرفنا القراية بعين واحدة لكن سمع بي أضان واحدة "إطرشنا"
وعشان ما تزعل من مزاح الصباح المسمش جداً جداً
أسمع السني في الدقيقة 23 الحلقة (15) وقول النصيحة
كلمني مالك بـ"الهجو مكضمني" قول يا حبيبنا المنصور دائماً إن شاء الله

يكفي إنك اعدتنا إلي نبع الحنان وبصراحه جضمها وجضم حنان حنانها

هي الغنية ذاتها جاهزة اضافة إلي انه مصطفي متمكن وحاكر الشغلانة

دقوشة فينا منو ؟ أكيد يارئيس أنا

شاخور لمن مشي للرئيس نميري قال لايه عايزين 105 الف عشان نتم

مسجد المريخ .

الرئيس قال لايه 105 الف ساهله لكن بتخت في المئزنة شنو ؟

قال لايه ما صقر الجديان يارئيس . صباحك ورد .

يا غالية يا نبع الحنان
يا حبيبو يا ست الحسان
انا حبي ليك فاق الظنون
واخلاصي باين وباقي مع الزمان
خليني جنبك ياحبيبة
قلبي مات ماتقولي الوداع
خليني انسى عذاب سنيني
قضيتو من هم وضياع
خليني اشعر بي وجودي
وانسى ايام الضياع
خليني احيا على امل
ولقياك لوك بالخداع
غصبا عني يا املي وحياتي
ولقيت خطاك سايقاني ليك
غصبا عني يا املي وحياتي
و قولي لخطاك طال سايلاهو ليه
نسيت مشاعري كل لي
برضو اللي في دمي بيسلم عليك
وحيات شبابي يا حبيبة
سعدي وشقاي انا بين ايديك
دايرك تكوني شريكة لي
واكون معاك واخلص اليك
دايرك تكوني شريكة لي
واكون معاك واخلص حبيب
يا غالية يا نبع الحنان
يا حبيبو يا ست الحسان

مصطفى السُني و أحمد المأمون و الأستاذة زحل أدم ( ديل تمام )

لكن ابو عمه حمراء دا بوظ الغناء وامبارح الطيب عبد الله كان عاوز يفكه بالمايك

المحبوب أحمد الأمين كتب:: ياخونا سيد البوست دا مشى وين ؟؟؟
خليتنا زي جمال فرفور مستلمين برنامجك على حسابنا
على كل حال دي آخر مداخلة لي وكل عام وانتم بخير
وأتمنى ألا تطول الغيبة وأن يطيب الحضور واللقاء

سلام الله عليكم..

أستأذنكم و خصوصاً المشاركين في هذا البوست بالتعقيب أولاً على مداخلة الأستاذ المحبوب..

أستاذي الجليل..
أقسم لك بالله تعالى أنني أعاني مشاكل تقنية في الحصول على شبكة إنترنت فاعلة في السودان حتى أتمكن من التصفح و المشاركة في منتديات بلدتي الحصاحيصا و المواقع الأسفيرية الأخرى.. و لكن هيهات..؟
في الحصاحيصا شبكة الإنترنت حدث و لا حرج، غاية السؤ حتى في المقاهي المحدودة العدد هنا ، أدرجت هذا الموضوع قبل بضعة أيام و كنت حينها في الخرطوم من جهاز لابتوب و أقسم لك بالله أنني جلست قرابة الثلاث ساعات حتى أتمكن من إدراج مقدمته التي لم يسعفني حال شبكة الإنترنت من متابعته و التعقيب على المداخلات الأخاذة التي أدرجتها أنت و الأخوان الكرام.. و الله لدي الكثير مما أود أن أكتبه و أقوله في هذا البوست و غيره و لكن واقع الحال يغني عن السؤال..؟ شبكة الإنترنت و الهلال الكبير و الحكومة، كلهم في الهواء سواء.. ياخ أنا ذاتي بقيت (طاشي شبكة) و مخليها ذي ما تجي تجي.. يعني حا تجي أكثر أو أسوأ من الجاتنا كلنا..
أما الشئ الذي لا أقبله و أرفضة البتة هو (حردان) أستاذي المحبوب للبوست و إعلانه مغادرته.. و الله و الله و الله لو غادرت هذا البوست، غادرت أنا تلقائياً المنتديات و سوف لن أكتب بها مرة أخرى .. و ها أنذا أوكل لك أمر هذا البوست لتديره كيفما تشاء أنت و الأخرين لأن فكرة البوست أساساً قائمة على ما يكتبه البورداب و ليس ما يكتبه شخصي الضعيف..
فليقبل أستاذي المحبوب إعتذاري و ليدعنا نستمتع جميعاً بما يكتبه لنا في هذا البوست و غيره تماماً كما نستمتع بالسر قدور و أغاني و أغاني.. و هذا إعتذار مني للجميع دون فرز..

أخيراً .. لازم تعود..

و دمت ..
و دمتم جميعاً..

اولا حمدا لله على السلامة
ويبدو انك طاشي بوشك
ياخي اقرا الكلام كويس
حردان شنو ؟؟
لو الجبال تحولت عن ارضها
عن حبنا لهذا الموقع لا نتحول
ياخي قلنا ان شاء الله ما تطول الغيبة
وان يطيب الحضور واللقاء تفتكر يا الرشيد افندي بمن يا الدر الماليك تمن ؟؟
واكيد الاسبوع الجائي حنتقابل
بالله مش كاني بقرأ الغيب ؟؟
اها انت جيت أكدت بان الطشاش عام
نشيل معانا إنترنت ولا ايه ؟؟
وغاية المنى ان نلتقي بناس الداخل وجها لوجه
وأكيد حضور زاهي وبهي
وإلى اللقاء
وكدي النعز الرسول عليه الصلاة والسلام
حلقة الليلة حضرتها طشاش كنت معزوم فطور وأهل البيت ماسكين الريموت وأنا قربت أموت !!

أنا شخصيا لا أستمع وما بحب ما يسمى - معتز صباحي - كده لوجه الله - وأكاد أموت غيظا عندما يحرك حنكو اﻷسفل كما يحرك الترزي رجليه ، طبعا حب الناس مذاهب لكن السر قدور شطح كثيرا عندما أضاف هذا المعتز ربما ليكف العين عن البقية - وكمان الطرحة الخاتيها في راسو دي لو مشى بيها فرنسا ح يجيبوه صاد ( وضاد ) كمان ، ﻷنو متحجب ،
غايتو يا المحبوب هناك من يطلق عليه اسم فنان ولكن هو من جهة والفن من جهة ؟ وحرم وعلي الطلاق لو كنت عازف لن أعزف لهذا المعتز -- ومعليش يا معجبي معتز صباحي -
ويا عم صباحي أمسك ولدك عليك نحن ما ناقصين ؟؟

استاذنا الرشيد والمتداخلين لكم عاطر التحايا وارقها ورمضان كريم وتصوموا وتفطرفوا علي خير
والله يا اخوي موضوعك رائع وجميل وانا في رائي الشخصي عن البرنامج والله كويس وما فيهو كلمة عدا - المكمل طرحنا من السوق-- والمدعوة فهيمة عبد الله وانا عي صعيد شخصي ما بطيق اسمع صوتم - بكون ماسكة الريموت مجرد ما بدأت المدعوة فهيمة تغني بحول لقناة تانية او احسن لينا نمشي قناة قوون نسمع حنان بلولو وانصاف خميس (مدني ) -- نسرين الهندي ومصطفي السني بالفعل رائعان و متمكنان ويجبروك علي الاستماع لهم

كمال ود التقيل كتب:: أنا شخصيا لا أستمع وما بحب ما يسمى - معتز صباحي - كده لوجه الله - وأكاد أموت غيظا عندما يحرك حنكو اﻷسفل كما يحرك الترزي رجليه ، طبعا حب الناس مذاهب لكن السر قدور شطح كثيرا عندما أضاف هذا المعتز ربما ليكف العين عن البقية - وكمان الطرحة الخاتيها في راسو دي لو مشى بيها فرنسا ح يجيبوه صاد ( وضاد ) كمان ، ﻷنو متحجب ،
غايتو يا المحبوب هناك من يطلق عليه اسم فنان ولكن هو من جهة والفن من جهة ؟ وحرم وعلي الطلاق لو كنت عازف لن أعزف لهذا المعتز -- ومعليش يا معجبي معتز صباحي -
ويا عم صباحي أمسك ولدك عليك نحن ما ناقصين ؟؟

بالغتا يا كمال
معتز صباحي سيثبت لكم انه فنان مميز و كبير ولونيته في الاداء سوف تحتل الساحة فقط المطلوب عدم الانشغال بالمظهر الخارجي للمطرب وما يميز معتز شخصيته التي استطاع اثباتها بجدارها وهكذا بدأ محمود ع العزيز وخضر بشير وحركة وغيرهم

سارة عليش كتب:: استاذنا الرشيد والمتداخلين لكم عاطر التحايا وارقها ورمضان كريم وتصوموا وتفطرفوا علي خير
والله يا اخوي موضوعك رائع وجميل وانا في رائي الشخصي عن البرنامج والله كويس وما فيهو كلمة عدا - المكمل طرحنا من السوق-- والمدعوة فهيمة عبد الله وانا عي صعيد شخصي ما بطيق اسمع صوتم - بكون ماسكة الريموت مجرد ما بدأت المدعوة فهيمة تغني بحول لقناة تانية او احسن لينا نمشي قناة قوون نسمع حنان بلولو وانصاف خميس (مدني ) -- نسرين الهندي ومصطفي السني بالفعل رائعان و متمكنان ويجبروك علي الاستماع لهم

الاستاذة سارة
رمضان كريم
حقيقة حب الناس مذاهب
لكن المطربة فهيمة لم يحالفك التوفيق في الحكم عليها وهي صوت مميز وطروب وحنين و محتشم
بس يا سارة تكوني مكجناها ساكت او بتذكرك واحدة كوج ولكني استطيع القول لو كان هنالك ترتيب في الصوت والاداء تاتي فهيمة في المرتبة الاولي في الاصوات النسائية مع نانسي عجاج وسمية حسن واسرار بابكر وسميرة دنيا

يا وراق أنا قلت حب الناس مذاهب وربما ترى في معتز ما لا أراه .... لكنه سيظل في نظري فنان غير مهضوم ؟

اها يا اهلنا وصلنا وين ؟

» السر قدور - نسخة هذا العام من برنامج ( اغاني واغاني ) جأت بشكل مختلف
» ودسلفاب تحيي الذكري السابعة عشر لرحيل الفنان مصطفي سيداحمد في برنامج ضخم (توجد دعوة وبرنامج)
» سير ٠٠سير ٠٠ الى الامام ياريس سير
» أجمل ماقيل في المرأة(موقف التعديل)
» كشف بالاسماء النهائية (لاسياد الحصاحيصا),,معلمي الحلة الجديدة (للاضافة او التعديل النهائي))