عضو جديد لنج

أخواني وأخواتي ،

السلام عليكم ورحمة الله وبركاته

ورمضان كريم وكل عام والجميع بخير

تقبلوني بينكم حتى نساهم جميعاً في إثراء هذا المنتدى بكل ما هو جميل ... فمدينتنا المحبوبة في انتظار ثمرات التلاقي في مثل هذه الفضاءات الاسفيرية كل يدلو بدلوه وكل يشهد بشهادته حتى ننهض بمدينتنا فكرياً وثقافياً وتنموياً ..

الشكر للأخ بكري عثمان حمد ولكل أعضاء الإدارة

وتحية ود ومحبة لجميع الأعضاء


التقي محمد يوسف
الحصاحيصا - الامتداد

وليد العشي كتب:

مرحب بيك كتير يا اخونا التقى
طولنا ما شفناك
واصل معانا المسيرة
وراجينك

مرحب بيك أخي وليد وأنا جد سعيد بينكم .. أنا ما قاعد أغيب كتير من البلد قبل أقل من شهر كنت في السودان .. لكن يبدو أنني غير محظوظ ... ولكن هذه فرصة لنلتقي ونتواصل عبر هذا المنتدى الوريف ..

حسن وراق حسن كتب:

شكرن يا التقي
مشرف الموقع الذي يزدان بوجودك !!
يا التقي نحن ابناء مدينة واحدة ونحنا وبكري اخوي وضياء عدوي من الجلاكين وكذلك حسن كيشو والآخرين المختفين حقو توصلونا معاكم وزي ما بقولوا اهلك الشايقية :
انت هيل منو؟؟ كان ما نكون دخلناك في حته تانية!!
لك كل الحب والاحترام [b]

هلا وغلا صاحب الكاميرة السنينة .. أستاذنا حسن وراق .. أنا أصلاً من قرية دلقة الحلاوين وسكنا الحصاحيصا سنة 1999م - بحي الامتداد جوار مسجد عمر بن الخطاب / نادي الامتداد .. إن شاء الله كدا أكون جيت في الحتة القاصدها .. وشكراً على الترحيب ..

راشد محمد الجاك كتب:

رمضان كريم عليك ياالتقى ومرحب بيك كتيير بيننا واضافة لهذا الموقع وهذه المدينة المعطاءة ...

شكراً أخي راشد .. وأتمنى أن أكون عند حسن ظنكم بنا ..

emo كتب:

مرحبا التقي ومنور المنتدا

مرحب بيك يا دكتورة .. والمنتدى منور بأهله الطيبين ..

وشكراً على الترحيب

صفوان فاروق كتب:

اهلا بيك وياالف مرحب

شكراً غزيراً أخي صفوان على الترحيب .. وربنا يديم المحبة والتواصل ..

لحظة بس .. نسيت أقول ليكم أني هلالابي أصيل بس ما متعصب شديد .. أنا عارف مثل هذه المعلومة كان مفروض تأتي متأخرة شوية عشان الجماعة ما يتعصبوا ويبخلوا عليّ بالترحيب لكن تقولوا شنو الصبر قِسَم .. ههههههه

بكرى عثمان حمد كتب:

مرحب بالأخ التقى.. ونرجو ان تكون اضافه نوعيه للمنتدى ..
مرحب بالهلالاب .. مادام معاك ناس ابوشمه مابجيك عوجه ..
كدى اول وتبادى شوف لينا حكايه تامين الموقع .. وبعد داك نشوف البحصل شنو ..
ياوراق التقى زول نسيبى .. يعنى عنده حق الفيتو!!!

مرحب بيك يا دكتور بكري .. وشكراً على منحك لنا حق الفيتو .. لكن إلاّ أجِّرْهُ ما بستفيد منه هسي إلا في معارك هلال مريخ مرة كل خمس سنوات ..

بالنسبة لتأمين الموقع زي ما قلت ليك هنالك حل جيد بالتحويل إلى نظام vBulletin بدلاً من النظام الحالي phpBB .. كحل إستراتيجي .. أو الاستمرار بهذا النظام الحالي ومصاقرة الهكر وعمل الاحتياطات الأمنية المتمثلة في التحديث كلما ظهرت نسخة جديدة لسد الثغرات ، وعمل النسخ الاحتياطية من قواعد البيانات بصفة دورية لا تزيد عن الأسبوع ..

وإن شاء الله ما حا نقصر لتقديم أي مساعدة بهذا الخصوص

الرشيد حبيب الله التوم كتب:

مرحب بالأخ/ التقي
و طبعاً الدار ديارك مدعوماً ذلك بحق الفيتو من طرف الأخ بكري عثمان حمد و صلة النسب التي تجمعك به، أما كون أنك هلالابي، ربنا يصبرنا عليك و يصبرك علينا..؟؟ ها..ها..ها
و مرحب بك مره أخري من كل الأعماق..
و دمت

مرحب بحبايبنا المريخاب .. شكراً أخي الرشيد على الترحيب .. طبعاً السنة دي ال-فيها اتعرفت ربنا يصبرك في الأربعة سنوات اللي جايات .. لأنه الممتاز بنفكو ليكم كل خمسة سنوات .. والأبطال دي أصلاً شهراً ما عندكم فيه نفقه ..

تحياتي

عبداللطيف عوض الله عبدالل كتب:

مرحبا بالاخ/ التقي محمد يوسف منذ فترة طويلة جدا لم التقي به

وانشاء الله تكثر من الطلة علينا في المنتدي

الأخ العزيز عبد اللطيف .. مرحب حبابك وفعلاً طولت ما قابلتك إن شاء الله نلتقيك عبر هذا الحوش الفسيح ..

عبد المنعم سيد احمد كتب:

مرحبا بك ..فى ديارك العامرة
والتحية عبرك للاهل بحى الامتداد..مقرنا ومسكننا
نتمنى لك اقامة طيبة لمزيد من التواصل

مرحب بأخونا عبد المنعم .. وشكراً كثيراً على الترحيب .. وانا سعيد بأن ألتقي بناس الامتداد عبر هذا المنتدى حتى تتواثق الصلات والمعارف ..