خلعة وهضربة وكهرباءزايدة

خلعة شديدة وهضربة وكهرباء زايدة
نعم فى شلعته وجهجهة ومرمطة وشفقةحايمة ذى ابو الفرار فى شمس نهار حار. لكن مقدرة مع الظروف الاقتصادية الصعبة .لكن انتو ما ملاحظين فى شوفونى عجيبة حايمة يعنى تلقى الواحد حتى وهو بصلى يتلفت يمين وشمال زى الرايحه ليهو حاجة ويتنحنح زى النبقة القافلة ليهو حلقو.
وبعدين فى كمية من العقد النفسية العجيبة الواحد تلقى مهندم ولابس كويس ومتعلم وذو منصب لكن يخرم ليهو تخريمات تقلب قندران وتلقاهو جاك من الاخر ومرق جواهو لاقل انتقاد فى عمله او وظيفته.
ظاهرة تانية عجيبة السب والشتم فى الاماكن العامة وفى الصحف وفى النت والتعريض بالناس لاتفه الاسباب فى شنو ماتعرف.
الاغرب مراهقة كبيرى العمر الواحد تلقى عمرو خرتماية سنة وهاك يا صبغة وماسك ولبان و مبارات البنات المراهقات دون حياء او خجل. والعكس ايضا الواحدة تلقاها اقدم من ام رقيقة وتتمايص وهى ماشة مشى العقرب.
الكضب..الكضب ..اكثر من بعوض والى الخرطوم...مسئول يكضب والناس تكضب بس جمهورية الكضب..فايروس ما تعرف..واحد كضاب عطس عادى البقية ما تعرف.
النت..النت..ومواقع التواصل الاجتماعى ياخ معقولة واحد تلقى اسمو ابشنب وخاتى صورة كاظم الساهر واجهة..او (هناية) وتلقاها خاته صورة نانسى عجرم..وده كوم وتلقى الواحد ساكن فى ام شتتوها وما عيب طبعا وكاتب الاقامة روما والعمل نيو جيرسى العمل طبيب اسنان وهو اسنانو واقعة.
وفى لغة عجيبة بكتبوا بيها والله ما بتتفهم ..هم عارفنها وليها رموز.
ده كوم والمجموعات كوم مجموعة مناصرى التجديد ومجموعة الفقر ولا القهر وبطولات عنترية ومجموعات عنصرية وسكسكة وهجيج والله حاجة تهرى الفشافيش.
طبعا غير الاحتيال بالاسماء المستعارة لمحالتجارية او منتجات وكرور .
والاعراس والاتراح والافراح وظواهر والله الواحد لمن يحضرها يحس بانه وافد وبكره من الصباح يمشى يجدد اقامتو فى بلدو ..معقولة بس.
الكراهية..يعنى انتقدنى خلاص انت عدوى اللدود واعمل على مسحك من على وجهة البسيطة..واقتتال بين الناس وجرائم قتل..زوج زبح زوجته..وزوجة عضت زوجها فى ركبته..وابن يقتل اخية وامه وابيه..وقبائل فى بعضها تقتل فى بهائم او مرعى..فى شنو؟؟
عدم الرحمة..الرحمة بقت تفتش ليها وتحن ليها الناس بقت خشنة وانعدمت المرؤة والرحمة والشفقة والتعاون والتحاب والاخاء ..غابة ..غابة فيها وحوش..يا اخوانا الوحوش فى غابة الدندر انغرضت وهاجرت وفزت ..وبقت الوحوش والمفترسات الادمية تحوم المدن والارياف فى شنو .
يعنى الواحد الا يمرق الشارع وهو عامل ساتر وشايل درقة وطبعا متحصن وبعد داك ما يتكلم ولا يتونس ولا اقول ليكم يعتكف فى كهف يرجى يومو.
اها بعد ده كلو السبب شنو والسبب منو؟؟

الله عارفو.

للأسف يا مجدي هناك أزمة في كل شيئ في هذا الزمن العجيب ، فالصدمات تأتيك من أقرب الأقربين والفلوس تغير نفوس الكثيرين وحال الناس طين في طين وكيف ما يكون طين والناس بعيدة عن رب العالمين ،دحين أسأل الله يسهل أمور الناس أجمعين ويبعد عنهم كيد الكايدين.
وجدي

وجدي يوسف علي حسن كتب:: للأسف يا مجدي هناك أزمة في كل شيئ في هذا الزمن العجيب ، فالصدمات تأتيك من أقرب الأقربين والفلوس تغير نفوس الكثيرين وحال الناس طين في طين وكيف ما يكون طين والناس بعيدة عن رب العالمين ،دحين أسأل الله يسهل أمور الناس أجمعين ويبعد عنهم كيد الكايدين.
وجدي

والله يا مجدى ويا وجدى
حالة من الاحباط اصبحت سيدة الموقف
ولا زال البحث جاريا عن بلة

طبعا بوست يمرض وما فيهو حاجة تطمئن لكن يا العشى يا خوى محرك البحث ده فتر وخرخر ..قايتو احنا بنحفر والباقى نشوف اخرتو وكلو بيد الله

الله يهون القواسئ

سبحوهـ بكرةً وأصيلا .
( سبحان الله وبحمدهـ )

سبحان الله والحمد لله ولا الله الا الله والله اكبر ولا حول ولا قوة الا بالله...وربك يهون القواسى يا العسورابى

» الكمامات في طائرة الرئيس الجاية من إثيوبيا ما قربت تجنن ناس هي لله هي لله "خلعة بالصورة"