كدي "أمسكو" دي "قبال" ما أجيكم "صاد"

الفصِل مليان "إقنت"
التلاميذ "يطقطقو" في الأجوبة
"يفقهوا"في القول رافعين "الأصابع"
للفوز بفرصة حلحلة "عُقد" الأسئلة
إلا البخيت "يتمطق" مشغول
يغازل في سندوتشات "الرضية"
ولسان حالـها
(( والله يا البخيت الليلة كان "تشمـها قدحة" ))
(( و لبنك هدا طرفي منو ))
والتلاميذ "يكوركو" (( استاد استاد استاد ))
والبخيت في عينيهو "عالم تاني" إلا القراية "ياخلاني"
"هينان" هو فاضي
ما من العصر مع "الغنم"
يربط
ويحل
ويحلب
ويصرِر
ومرة مرة يتاوق لعيال الكورة بي فوق الزريبة
كتب الاستاد مسألتين في السبورة "المغوبشة"
والفصل (( استاد استاد استاد )) إلا البخيت
الاستاد وقف "جنبو" وحب يداعبو عارفو ما ناقش
قام قال ليهو "كدي قوم إنتا آآلبخيت"
(( أنا يا استاد ؟؟))
(( آآآآي إنتا يالبخيت حِل لينا واحدة ))
وقف البخيت متساند على الدرج المتهالك
(( أحِل ليك ياتا فيهن يا استاد ؟؟))
الاستاذ قال ليهو " حِل لينا أم إضنيناً بويض دي))

وجاي (صاد) متين آآآلبخيت.

حمدالله ع السلامة يا حبو
ومتين لميت في البخيت دا

وحلاها ....... بعد التحية

البخيت وين

وين يا حبو ما جيت صاد تكون قاصد ضاد ياربي

ناجي وورقة وصلاح وعشي أكان لوكتو "السمك" ما أحسن
الإستعجال شنو ؟؟
المهم الحاجات متداخلة بشكل عجيب
وإطلاقاً ما ركزت علي شي غير الحكي
مرة أضحك ومرة أبكي ومرة تغلبني الحكاية
نو جرائد نو نت "سم تايمز" تي في
نـهايات أغاني وأغاني وهينين من "الداعية" هاني سلامة
بسبب "الأزمات" إبتعدنا عن "الكدر"
ما عدا "كوارع" لزوم "خواطر فيل ما بعد العيد"
في العيد الماطر تعطلت الحركة وصعب الإنتقال
ويومـها هاك يا نيفاشا بمشاركة كل الأحباء دون "وسيط"
وبدون شروط" وبدون رعاية دولية
السحب تغسل في السما و"تشُر" فينا عقاب الموية
فشِرقت مدن وغرقت بيوتات قرى الرايحين
وقالدت قوى الطبيعة ممتلكات الأهالي لأيام وليالي
وحامت الطوافات والمروحيات توزع في نظرات "الولاة"
"يايييييييييييييي معقولة دي موية مطرة أمبارح ؟؟"
لا يا مولاي إنـها "إنـها موية فول بوش السنين الفاتت "
وركت شاحنات الإغاثة الجاية من برا "والجوا حمدو في بطنو"
وتلقف محتويات شحنات الغوث غير المتضررين من البدناء والموالين
توزعت القلوب بين الواقعين في أحضان الموية
والمشتتين في البصات والمركبات لاحقين العيد مع الأهل
وبين أولئك الكايسين في زحام الأسواق التي لا تعرف الرحمة
ويقوم عليـها ولدان لا يرعون للحق العام إلاً ولا ذمة
بفكرهم الثاقب تحولت خيران الموية للممرات الجوية
تصب المطرة في المستشفى غرباً وتلتحم مويتا بموية جهات الكنار
وعلي الموية المجتمعة بالطرق غير "المشرعة"
أن تلتزم جانب النظام الموضوع على "عجل الحديد"
وتركب الهواء وتمدد كرعيـها وتـهبط بسلام جنب البنطون
يعني خور يقدل في السوق تاني مافي إلا "الخيران الصديقة"
تبخرت فسحات وميادين اللعب لـهواً وفرحاً وكرها
وصارت للمُنقلا والسيجا والهوبا "أقرب"
ياكافي البلا قطعوا عشمنا في
شليل وين راح أكلو التمساح
وشليل وينو أكلو الدودو
وفي
هودنا يا هودنا
ما شبعت يا جنا ؟!
احمد ربك تشبع يا جنا
وكذلك
ﻳﺎ ﺍﻡ ﺍﺣﻤﺪ ﺩﻗﻰ ﺍﻟﻤﺤﻠﺐ
ﻓﻮﻕ ﺗﻮﺏ ﺍﺣﻤﺪ
ﺍﺣﻤﺪ ﻏﺎﻳﺐ ﻓﻰ ﺍﻟﺮﻛﺎﻳﺐ
ﺟﺎﻧﺎ ﻛﻠﺐ ﺳﻨﻮﻧﻮ ﺻﻔﺮ
ﺣﻠﺐ ﺍﻟﻨﺎﻗﻪ في السنقاقة
وتنتـهي بالسؤال "بتريد أمك ولا أبوك ؟؟"
وديفنتلي حا تكون إجابتـهم "أراضي السوق"
وفي مسرح الخرطوم مدني "التراجيدي" المجاور
أبدع رجال المرور في دوزنة موسيقى "الطوف" التصويرية
وياقلبي لا "تحرِن"
بعد ما فارقت مرحلة الحُزن فراق السوق لي جمالو
المهم تكمل "الضللة" ننشر بين مكيف ومروحتين
وفي التلت الأول من الليل نقج الاضنين لسماع الحكي
وعندما كان الموضوع عن السر قدور وتلقائته
فقد حكى لنا أحدهم حكايتين قال بأنـهما متداولاتين / تان

الأولى عن أدروب اللظهر في التلفزيون لأول مرة
شائل ربابتو وقاجي خلالو ومن الإضاءة العوينات بقن بِلي
مقدم الحلقة "الحريف" الأنيق أبشعراً مسبسب سألو وقال ليهو :
دايرنك تكلمنا في إيجاز عن السلالم الموسيقية
وعن السلم السباعي وتداخله مع موسيقى السلم الخماسي
كمان تشرح لينا التعقيدات البتصاحب عادة النوتة الموسيقية
واللبتجعل في إتساق اللحن مع الكلمة شئ من الصعوبة
وبرضو تكلمنا عن إنسياب اللحن والجمل الموسيقية
وكل ذلك وفق رؤية الموسيقيين الاوربيين موزارد وبيتهوفن وباخ
فهل ممكن تكلمنا عن هذه الجزئية ؟
أها أدروب صنقع ودنقر ونطط عويناتو وقال ليهو :
والله باااالغو ..
وتوشك خش في الربابة ترم ترم
ترن ترن
ترم ترم بدا يغني

واحدة تانية عن حزلقة حسين خوجلي صاحب قناة أمدرمان
قالوا مرة إستضاف الفنان حمد الريح
ومن قولة تيت خت لي حمد السؤال بالطريقة الحسين خوجلية
أستاذنا الفنان حمدددددددددد
جزيرة توتي
تلك الجزيرة الساحرة الفاتنة المترجة
التي يلفـها ويطوقـها النيل الأزرق من خاصرتـها في حنان
ويغازلـها الأبيض بعيونه الخجولة
ويلامس أطرافـها بأهدابه الحريرية
جزيرة توتي عندما تشرق عليـها الشمس
فإنـها تشر عليـها خيوط الحرير وهي تجلس في كبرياء
تلك المدينة الفاتنة التي عندما تودعها الشمس عند المغيب
تكتسي بالجراح
فماذا تعني توتي لفناننا حمد الريح ؟
حمد الريح "ياحليلو" غلبو البسويي
فقال "والله نحن لمن كنا صغار في طفولتنا
كنا بنركب العجلات وطوالي نجر بيـها ونمشي سوق توتي
حسين خوجلي إبتسم بطريقته العجيبة ديك وقال ليـهو
"أستاذ حمد الله يديك الصحة والعافية رايك شنو نسمع أغنية

وخش في ...
أوع ليل
ليل
لييييييييل العربة "الفورووووووووووووويل"
أوعة شيل العربة ينسيك ريحة الطين في حروفنا
والفسيحات البئنن ديمة حازات في نفوسنا
والبلاش والضيم خزازاً في القليب
بالملح بلل حلوقنا
نحنا راجعين في المغيرب
المغيرب المغيرب
للديار وللسوق العصير
مــا حد يشوفنا
لا نشوفوا
لا يشوفنا
نحن "صادين" في المغيرب
ونواصل

وبالمناسبة كنا نتابع وفي المخيلة "جالوص" الفنان الرايق

.......

وأنا ظني ظنيتو للنيل

غريق في النيل

و الليل ولافي بألو بيت

ساكت يغنوا على القمر

واجعني في البحر السكات

سكتني في الوجع البحر

يا بت صباح الطير

وين البلد ركت

ما عاد هواك يفتح في الكتمة

شباك النزيف

وين تكيتك في الغيمة شطيف النجوم

ريف الجسد صدرك سبلوقة اللبن الخريف

داسني فيك نضر

والأنبياء فأتوا

قاعدين في ضل النار

داسيني فيك نضر

في غفلة جو الكفار

وطارت حمامة الغار

لاقوني ناشف ومر

ما ذنب جاد الطار

لو غنوا بيهو شتر

ما تخافي الله معاك

وكل الملائكة سمر / عاطف خيري

استاذنا المحبوب التهم سطورك فى شراهة فاقت تلك التى ابديتموها امام طاجن السمك ( خصمتك بالرسول ماتطول الغيبة ) فارواحنا تهفو لهذا الجمال فى ثنايا يراعك

يا جي تي إفتقدناك بشدة
وتذكرناك مرارا بس ما كان عندنا حظ في المشاوفة
أهو حذرتك أعملي حساب "الشوك" الصغار المحشو في سمك السطور
تسلمي عزيزتي الفاضلة ولك التحايا والود

المحبوب أحمد الأمين كتب:: يا جي تي إفتقدناك بشدة
وتذكرناك مرارا بس ما كان عندنا حظ في المشاوفة
أهو حذرتك أعملي حساب "الشوك" الصغار المحشو في سمك السطور
تسلمي عزيزتي الفاضلة ولك التحايا والود

#ff3333]]
تسلم استاذنا ونتمنى ان نراك قريبا فى احسن احوالك ... يا المحبوب أخوى ماتخاف على من الشوك الصغار ( لقمة كسرة ) مدردمة تفى الغرض باقى انا متعودة دايما

[/size]

ياخوي ما تكب لينا شنو كل مرة فاطينا ؟؟
فاطنا يا فاطنا
فاطنا بت النبي "هيق"
أفطك ؟؟
ما قلت شوف عيني "الحبيب" بحشمة قال الروب
والتوب كاس جمالو زينة يالمحبوب
أسي بذمتك إنت بتنفط لي ؟؟
أفطك كيف وانت "الدافع" ومُسامِر
وكيف اصبر وعارف نفسي ما محي الدين صااااااابر
أكب ليك من السلم التعليمي دا ؟؟
قال جاب سنة خامسة وسادسة
شفت الطمبجة دي كيف ؟؟
ومن ديك وعيك
أسي إنت عارف ديل وصلوها وين ؟؟
ولو علي أخليـها علي رابعتا "العدوية"
تشاتر وتفتكر توزيعي اتبدل
وقايل كاسي مال لي سواك واتحول
وحاة قعدتنا وحياة الموبايل الأول
بنكب تاني لو زاد الجوال وطول
أفطك ؟؟
المرة دي فطيتك صاح ولا ما صاح ؟؟
أها المرة الجاية بنطك رايك شنو ؟؟
كدي إنتظرني دقيقة نشوف الفيلم البولندي دا
أعمل حسابك ما تمش تـهابش تكتسح العِراق دي
وحات النبي الساعة بقت واحدة
والله واحد
بس الحمد لله صليت العِشا وشديت العشا
بجيك سريع وما بتأخر
كالمدو شنو كمان ؟؟
أنا زمان لمن أجري بالونق الشمال
والله بي نيفاشا ما تلحقني
نعل ما إتأخرت عليك ؟؟
بالله الحكومة دي كان نورت لينا منافعنا دي مالو ؟؟
ما مالنا وعوائدنا ورسومنا الكرتونية
جانا "الهـبِر" شايلو اللئيم
فى الليل "يكوس" في الخمايس
لطش "الجُزر" بكت "الغروب"
وسالت دماء الناس جداول
بس تفلح لي في دا بس
سمعت بي المشجع الهلالابي مع رئيس نادي الهلال ؟؟
الرئيس قال في إحدى اللقاءآت الجماهيرية"
"رئيس الهلال" ما تجيبوا لينا الهوا
"والحمد لله قدرنا نكمل مشروع إنارة الاستاد
وإستعنا بالخبرات الالمانية والكورية "
المشجع "شب للرئيس" وكانت حارقاهو ثلاثية عمار خالد وسامي
"والله ما تغلب المريخ لو نورت السكن العشوائي ما تستمر خلي الاستاد"
ياخي إنت ما حضرت "أيام" زمان
زمن مستني عودة قلبي راجع
كنا بنرسل ليـهو بقلوبنا الرسائل
ميتين الإس أم إس والواتساب والواسطات
يا حليل أيام "السكو سكو"
أسي بتعرف السكو سكو ولا ساي ؟؟
طيب شنو شابكنا كب لي كب لي ؟؟
يكبك في شالا شحدت ربي عليك
وقكتين ما بتعرف السكو سكو !!
أووووف دي لزوما شنو ؟؟
المحيرني "الطُمام العام" هو البقى شغال "سكو سكو"
مزازين بينا وبالبنيات
مرة طرحة
ومرة أمجاد
ومرة كيس نايلو لو في جيبك شايلو
أنطك ؟؟
أقرأ ليك ؟؟
تتصور مرة شايل لي إستم
قايلنو "موبايل" من أبو "بستم"
جروو وراي تلاتة التقول أنا "ساكواها"
جنب السكة حديد وقفت
وكرطع
كرطع كرطع شربتو وهن واقفين يعاينو
واحد منهم قال الحمد لله كدا بقت " حيازة وشُرب"
ولمن حاكموني وعاقبوني بالجلد علي الحيازة
قلت للقاضي طيب ما بتكافيني علي الشربتو بالجد ؟؟
الله لا تريحهم تخيل غيرو الكرستالة بواحدة "شغالة"
مالك من ما جبنا سيرة "الطُمام العام" بقيت تتململ ؟؟
ما تخاف أخوك أمن الملعب كويس
الجلاكين البرا ديل مدورين ضمنا
وأنا هنا "مُضمِنا"
وياضيفنا لو زرتنا
لوجدتنا نحل نضبح الخروف
ونكرم ضيف المنزِلِ
إنت صحي "منازل" بت السارة ختبوها ؟؟
بركة الأبتو
قول في مجلس اللوردات !!
شنو يعني عضو في المجلس "الوطني" !!
يعديـها ليـها كلـها "نوم" !!
وإن صِحا من النوم يقعد يساكك في "المخصصات" !!
أغني ليك
هدا كبيت ليك
أديني التربيزة دي يا حليل زمن الجركانات
طق طق
الطق طق
هلا قمر بين الأسحار
مالو الليل بقى لي نـهار ؟؟
"نـهرك بلا يخمك ما تشيل معاي الصلاة علي النبي "
يا حبيب مالك
مالك محتار ؟
العروس قمرا
والعريس سحار
مالو الليل بقى نـهار ؟؟
الطق طق
طق الطق طق.
عليك الله أسمع دي بالتم تم
تطق تطق تطق
إشتقت لي وصالا
دي قست علي مالا
مشغولة في دلالا
أقول ليك حاجة ؟؟
قوم رص لينا العشا
العيش في الكيس قطعو صغار في صحن
وموية الفول في الكيس التاني كبـها فيهو
أعجن معاهو الدكوة المصرورة في الكيس داك
البهارات في الكرتونة التحت التربيزة
والشطة الخضراء في حوض التلاجة
وباصر لينا حبة زيت سمسم من الدكان كان فاتح
ولو لقيتو "قافل" جلي
أنا ما عارف سمو "بوش" لي شنو ؟؟
إتعشى وقوم قج معاي الناموسية دي
باقي المحلية قبال كم يوم رشتنا بالباعوض أبو لستك
السكو سكو ما بسكو

يعلم الله يا المحبوب شدة الكبر ما دخل بقيت الوقعه البقعها فى كرسى الكمبيوتر اصبر عليها لحدى ما اتسند واقوم تانى ...
الا فى مواضيعك استعدل قعدتى عشان عارف قعدتى بطول وما احلاها قعدة .. تسلم على المتعة لكن ما عافى ليك تعب استعدال قعدتى ..

تسلم يادكتور وليك وحشة
انا حتي ما عافي ليكم رحلة سابينا الفاتتني وفاتنانا
بالمناسبة إحتمال نجي "عروبا" قريب
باقي دايرين نتحمدل السلامة لكيت ميدلتون
ضربوا لينا كلمونا بالولادة بس ما قدرنا نقطع الاجازة
أها بالمرة إمكن نغشاكم إنتو وسابينا نسلم عليكم في طريق "الرجعة"

البوست غتس وبقى يقابض بذبد البحر
زول ساي يرفعوا مافي يا كافي البلاء ؟؟
أكان رفعتو مالكن قبال ما نجيكم "مصدومين"
أسي كان رفع "دعم" عن "محروقات" كنتو إتحزمتو وإتلزمتو

في موقف الباظات "تيت تيت" "تيت تيت"
طوالي بتذكر "سيمفونية" :
"دور بينا البلد داك
أحرق الجازولين
يالبابور جاز
في الكبري دور بي
البابور جاز
للمطار عرج بي
البابور جاز
أريتو كان طار بي
البابور جااااااااااااز"
سفر !!
سفر !!
"صفر"
ياناس ما "تـهجسوا" ماشين وين في النـهار دا ؟؟
الناس فايرة التقول كاتبنـها ناس أكشاك "الجبايات والرسوم"
والباظات "عنق عنق عنق" إيذاناً بالقيامة
شنطتي "وشني طك"
كرتونتي و"كيسك"
بقجقتي ومخلايتك
والباظ "عنق عنق عنققققققققق"
والمساعدي روحو محرقاهو
والسايق رايق وسجارتو قصبة
والنضارات الشمشية تقول من حرس الرئيس
بقدرة واحد أحد وجدت تذكرة في مقعد النص
قدامي واحدة
كأن مشيتـها من بيت جارتـها
مر السحاب لا ريث ولا عجل
يكاد يصرعها ، لولا تشددها
إذا تقوم إلى جاراتـها الكسل
قعدوها في التلاجة
شمرت التوب إتقاء كدوبة غتاية التلاجة
ياخي ما خلاص قوم بينا الحر دا ما فسخنا
والسواق ولا في بالو "مشوار"
إستعدل المرايات بـهدوء وبدأ "يكاوي"
"عنق عنق عنققققققققق"
الحركة التجارية في الموقف مزدهرة
التجار شباب زي الورد وغير الجامعيين "يمتنعون"
ومن الزحام "تحبس" نفسك في مانـهاتن أو وول ستريت
والأسعار وشمس "موقف الباظات" للحام "سيان"
وأي واحد من البائعين يقنعك بأنو ببيع برأس المال
مناديل ورق
وموية زرقا
وبسكويت محشي
وبرايات وأمواس حلاقة ولبان شِكلِت
وملابس داخلية ترميك في شوك "النظام العام"
صحون "بالمين" وجرائد رياضية
وعنوان واحد لكل الجرائد
"بويا يقدل في حواشة الرشاشات"
"الحضري يدردق بمزاج في ميدان تلاتة العدوية"
ومع الجرائد الرياضية مش حا تقدر تفتح عينيك
والفضل للرقابة القبلية والجهوية
طيب مالكن ما راقبتو "الير" موك ما تاح تراح رموك ؟؟
إلا لكن الجرائد الاجتماعية موجودة بـ"كشااااافة" حال
طلاق فنانة مشهورة من زوجها التالت عشر الكاتب الصحفي
والسبب عمود
عمود بيت بكا أم عمود جريدة الله وحده أعلم
ضبط لاعب كورة موهوم في حالة "سُكر"
سكرتير نادي مغلوب يتزوج من ست الشاي في النادي
"شاي بشة
وبيت عشة
نبنيـهو بمزاجنا والممطورة تترشة "
ممثلة مغمورة تتزوج من سايق ركشة !!
طيب مالا الرقشة ؟؟
والله بقت زي الكرسيدا "السمحة وسمح سيدا"
وكمان في درجة واحدة
وكان زمان بغنو للكرسيدا فاليوم أرخي أضانك
وحا تسمع وداد الكلاكلات "تصدح" بـ
"بلة يابلة ....
دق الرقم جلى....
بلة ود عشة....
السايق الركشة....
دق الرقم طشه....
بلة ود عايد ....
دق الرقم زايد....
بلة الجموعي ....
بكاني بي دموعي....
بلة ده الهندي....
دق الرقم عندي....
بله ده الحنان ....
الساكن أمدرمان....
بلة ود عشة....
دق الرقم خشه....
الليلة يا بلة ............"
حليل زمن عصي الدمع
شيمتك "الصبر" بووووشك برا الشبكة
أما للإتصالات نهي عليك ولا أمرُ يا بلة ؟؟
وتظهر ليك كمان بعدا كلو "لمن" تبكي مجلة سيدتي
صورة الغلاف "سرير برا لحاف"
إيلين خلاف
"الراس كاشف والصدر مغطة
البطن فاضية
والاسكيرت جكسا في خت ستة"
وأصوات الكاسيت والسيديهات والامبي سريز
إخلاص مايرنو
وعزالدين الدروشاب
وفضل الله القماير
وتسمع من بعيد ومن عدة أجهزة "غُنية" طلال المايقوما
"دق الباب بشده ..
جريت مستعده...
قايلاهو الحبيب ..
لقيتو سيد العده ..
خلوني منو الساكن مناطق الشِدة"
"عنق عنق عنققققققققق"
ياخوي ما رفعت دعمنا
ودليت دمعنا
وفورت دمنا ما تقوم بينا
وأنا فرحان بتذكرة النص
وبمقعد النص
"أحب النص"
والركاب فايرين وأنا أغني
"تقوم بينا
تقوم بينا العربية
تودينا للسادة
عربيتو القيافة
خطراتا كشافة
وفايتا الناس مسافة
تقوم بينا كب..
تقع بينا رب ..
تودينا للسادة.."

إنتو السادة دا منو ؟؟

العربية الماشة للسادة في عطبرة
محطة التيمان

» الاتحاد الاوربي ينعي الانتخابات قبال يوم الدفن "عدال القُصص أب قُصة عوجا !!
» ياورقة منتظرنك لكن قبال ما تصلنا كدي "إتصبر" بالكليمات ديل
» "ود أبعشة" العريس "الشِفِق" لبس الهدوم قبال تِتغسِل تِتفشه !!
» اهلك قبال تهلك // السكر بالضمة //مص مص يامصريين //الفطور طرشق
» أول حالة زواج "ملك يمين" في مصر قبال كم يوم في التلفزيون وعلى الهواء مباشرة "فيديو + صور"