سواسيو وجداد وديوك الكترونية

[اليومين ديل فى حالة مزارع جداد الكترونى منتشرة والظاهر عليهو مشروع دراسة جدواهو جايبه نتيجه وكده.
واخير واحسن فى الانتشارمن جداد الوالى المتعافى الله يطراهو بالخير اول وزير ياكل جداد على الهواء مباشرة فى دعوة لمحاربة اللحوم الحمراء..وشان ما نطش خلونا فى جدادنا الالكترونى.

الحكومة الله يطراها بالخير طبعا حولت مزارع الدروشاب والحلفاية كلها الى مزارع بلوكات خرصانة اتخيلو واطة قريرة خضراء ومزارع تحول الى ماهى عليه وطبعا الحكومة قبل اصدار اى قرار تدرس تماما كيف ترد على منتقدى القرار يعنى مثلا ..المزارع متاخمة للسكن وعاملة ازعاج ووكر للصوص والبعوض وكده حكومة ممسحة بى زيت ما بتبقض .
نشطت حكاية الجداد الالكترونى والجدادات الالكترونيات والديوك الالكترونية ايضا.
يعنى تلقى ليك جدادة الكترونية شركة يعنى ما جدادة بلدية لا ..لا اقصد يعنى جدادة معلوفة وليها جضيمات وكريمات و تعمل ليها صورة من العصر الذهبى طبعا وتنتظر الديوك الالكترونية التى ( تليك) لخبر وفاة حبوبة الجدادة او الديك الالكترونى.
او تلقى ليك جدادة عاملة خبيرة تجميل او مستشارة تجميل وهى ذاتها عايزة ميكانيكى عمرة وسمكرجى.
فى جدادات ساكة الوجهاء وديل ( ام سكاكات) ما تشوف ليها ديك الكترونى لازم يا اخوان يكون ديك عجوز وتعمل ليهو طلب صداقة يقوم الديك الصورة بتاعتها ما تعجبو ...ويرفض يضيفها ولمن تتكرر معاها الشغلة تغير الصورة والاسم وفى جدادة حايمة بى كم اسم لكن ناسية تغير الصورة عزبت حنان (الاد) بتاعنا.
فى جدادات صغنونات يعنى سيو سيو الكترونى وده خترى تلقى السيسوة تنطط من تويتر لى الفيس تعذب( الماوس) لمن تلقى ديك يفجخ احلامها تحت كرعيعهو.
فى جدادت عاملين ركوز فى صفحات فنانين معينين يعنى جداد حبشى نافش ريشو واحمر واسود وازرق وده طبعا ممكن قابل لل(زقنى) ومن زقنو فتلو.
فى جدادت تكاكى عند ناس وتبيض عند ناس يعنى تجكس الكترونيا وهى متزوجة ..وما تقولو لى مافى ..عييق..ما قلنا الاسم والصورة مستعارة.
فى جدادات تكاكى بس ..يعنى شلة جدادت الكترونيات ويحبو يعملو مقالب فى الدليوك الالكترونية ويقرقروا عليها ومتخصصين ديوك عجوزة او ديوك شليقة.
فى جدادت لا تكاكى لا تبيض وديل الواحدة تلقاها عاملة ناشطة المهم اى ( نشاط) يعيد اليها بريق انثوى مفقود او ايام عبثت بجمالها او شواكيش عبثت براسها او عرست ليها خرتماية عرسة وطرشقت وده جداد عدوانى جدا ده لا يبيض ولا يكاكى ولا يتونس ولا يتعرس يعنى شغال نقر ..ونقر ..فى الريسن لمن يعمل (كوكة فى الراس) للديوك الالكترونية.
وفى جداد لاحم يا اخوان هوى الما بتخافو الله ..يعنى تلقى ليك جدادة الكترونية وصورتها..صدرها بره وزراعينها بره ..واحمر شفايف وحلق من الاضنين لى الكرعين.. ايووووووووووة..صورتها عديل كده واسمها عديل كده وعاملها (اد) لى ابوها.
فى جدادت شرك ومصدية ايووووووووووووة ...عشان ما (تليكو) ساى يا الديوك.مصيدة مصلحة لها او لغيرها يعنى جدادة ( سفرى) .
وده لزوم توعية طبعا ...للجنهم جداد .
الديوك ليها يوم لحدى ما نجيه