الأشتر ... وسيد الرايحة يفتش خشم البقرة

__________________________________________

غايتو القروش لامن تدخل جيب صلاح ود عمي ده (كأنو دخلت القبر .. مرقة ليها تاني مافي !!) .. الزول ده أيام تغيير العملة قروشو ما طلعت وفي زمتي دي في مره كدي طلع جنيهات طلعن من زمن (نميري) .. و (الجنيه) لامن يطلع من جيبو تسمع الجنيه يعطس .. جيبو ده تبارك الله زي (باب القاعة) الخشوش بقروش والمروق بلوش ... عندو (جزلان) كدي لو فرشو في اشللة دي (يصلوا فوقو جماعة صفين ) عامل ليهو(سستة) بي رقم سري . وكاتب عليهو بجمبة ( جزلاني الجوه وجداني بريدو) وبالجمبة التانية ( الروح تروح مامشكلة ــ القروش تروح هي المشكلة) .. وإن الله كتبه عليك أشحدوا جنية .. عليك أمان الله (سيئأتو) ما بديها لي زول .. أمو مره شحدتو (خمسين الف) أداها (تلاتين الف) ورقد عشرين يوم ميرود.
في يوماً كدي وفي نص اللجازة ليلت المدرسة ونحن (عطال وواقفين حال) قلت كدي أنسوي معروف في صلاح (البره الزمن ده) .. باقي قمة الرومانسية والترفيه عندو لامن يمشي (مشرع البنطون) ويشوف (الحمير) نازله وطالعة دي عندو ولا (لوحة بيكاسو) .. وقلتلو : أجنا ما تجي ننزل الخرتوم وونجم لينا يومين كدي ونملي عويناتنا في المناظر ديك وفي بنوت الخرتوم الملونات زي الرسم .. أهان ومن سمع البنوت (فنقل) لي عيوناتو خلف خلاف .. وظبط طاقيتو أداها برمتين لا جوه كده .. وقال لي : والله اللشتر تكون رفعت روحي (المعدنية) في السماء ده .. وأوعدك أردها ليك في (حوض زراعة أو مشكلة) .. طبعاً ده كل البعرفو في الدنيا (حواشة .. ومشاكل) ..
ومن دغشاً بدري ركبنا باظ البلد وإندرجنا لي الخرتوم وبال صلاح محمل بالأحلام الوردية وسرحان مع (غنم إبليس) وفي بنوت الخرتوم (المقلوظات) باقي لامن يشوفن (شلاليفو يقعن لاعن كم الجلابية) . ونحن في نص الطريق والباظ يودع في المسافات الخالية ومنظر الحلال وشفع الغبش الفتارى و(زولي) منجم خالس تقول راكب (اللوفتهانزا) .. علا ما قطع سرحانو ده إلا الكمساري ( أصلو بقولوا الكمساري مكروه لي حاجتين .. بقطع حبل أفكارك وبشيل قروشك) ..
قال لي : اللشتر ما تدفع أنا بديهو .. ودخل يدو في جيبو (ودي من الحاجات النادرة جداً).. أنا قلت الزول ده علا أكان دايرني أودي (الإستبالية) ياربي (ميرود ولا قرصتو نصيبة) .. أكان فجعتن طرم وشيهو قال لي : الله يا الأشتر أنا ما نسيت ( جزلاني) في البيت !! . وطبعاً معناتو (عصر علي جيبي أنا) .. داير يعمل فيها (ثعلب سنة تالتة) بس طلعت أحرف منو قلتلو : مامشكلة نشوف التكلفة كلها كم ونقسمه النص نتفسح أخوان ونتحاسب تجار.
وصلنا الخرتوم وفي نص السوق العربي هجمت ليك معنوياتو بي (قزازة ستيم) وطيرته ليك (شيطان جوعو بي (سندوشتي حق شاويرمة) وهو تبارك الله مسك ليك (القزازة) زي (البزة) وراسو (زي شوكة السواني) يتاوق في خلق الله وماسك السندوشتي بيديهو الاتنين زي (بندقية العسكري) تقول في (ضرب نار) .. قال لي : اللشتر جنس الخرتوم دي صعبة على ناس البلد .. عليك أمانت الله البجي فيها يتطرطش بي وشو .. والله أنا أكان قعدت هنا أسبوعين بس (اسيح مكنة) هسي لينا نص ساعة (رقبتي قربت تنحلج) ..
أهان قمنا مشينا (السيلما) في نصت نهار في (قاعة الصداقة) وقطعنا التظاكر ودخلنا مع العالمين (الداخلين كلهم ناعمين وطاعمين ولامعين) علا نحن زي الداخلين نبيع (تسالي وقصب) جلابية صلاح من وراء لون ومن قدام لون زي (فنايل الموردة) ودخلنا وقعدنا في كراسي كدي أكان قمت (إتمقيت) ساي تلقاهو مافي (يطبق) بالله زي (القلوبية)
صلاح قال لي : أزول دي (تلاجة موز) وبعد شويتين كدي في نص الفلم أعاين في صلاح ألقى ليك ضربو (الهواء الصاقط) و (الطراوة) ليلت المكيفات وزولنا شبعان لي خط ستة (مو بقروشي).. ومع التعب أكان نام وشبع (شخري) وبالله (الناس قايلين ناس القاعة يكونوا شغلوا الجنريتر من شخري صلاح) .. وجات الإستراحة وهو نائم قمت مشيت شربت موية وجيت وهو نائم .. أهان الفلم إنتهي صحيت صاحبي ودايرين نمرق .. فجاءة كدي قام (يصيح) ويولول : اللشتر (جزلاني) سرقوهو (ناس الخرتوم ديل الضيف ما معرفوهو؟؟) وقربت تجيهو (جلطة) .
قلتلو : إنت أجنا منو نصيح قبيل ما قلت نسيتو في البيت .. قال لي : لقيتو ملصق في الجيب التاني (الله عاقبو في وقتو) .. يمكن إنسرق منك وإنت نائم .. قال لي : مابقى إلا إسرقوني جنيات الخرتوم ديل وقام حلف يقيف جمب الباب ويفتش أي زول مارق بره .. غايتو ما قدرت أمنعو ولا أقنعو .. ووقف في الباب ملاهو تب .. وفتش ليك الحاضرين كلهم وما لقى عندهم شئ وحلف كمان يخش يفتش ( بطل الفلم) و(الخيانة) قال شاكي فيهم وطبعاً شان أفهمو إنو الممثلين ديل مو قاعدين معانا هنا وإنو ده فلم بجي في (شريط) ح يشوف الكلام ده بعيد وزي السحر وبقول أنا (بكضب عليهو) و(يلبع بي اشللة) لامن جونا (بواليص) القاعة قعدوا يقنعوا فيهو وهو مصر يفتش قال : أنا فتشت الخلق كلها ما بقى إلا (البطل والخيانة) .. الجماعة قاموا يفتشوا تحت الكراسي لحدت ما لقوا (مخدة صلاح) واقعة تحت (مدنكلة بالقروش) .. أخونا صلاح في اللحظة ديك قلبها (فلم هندي) جنس (نطيط وعرضه) .. بالله زي نهاية الفلم (لامن الأم لقت أولاده الراحو منها وهم سغار) وأدوهو (جزلانو) ومرقنا بالله طابيهو ما فضل ليهو إلا (يرضعو)..
قلتلو : بالله عليك يا (مقطوع الطاري من صحك بتدور تفتش الممثلين) قال لي : والله أفتش أي زول وبقولوا : (سيد الرايحة يفتش خشم البقرة) .