حديث "أبان" عيناً قوية قبال كم يوم لـ"الرعية"
الرعية الما سمعت بي الهوت دوقز والبيتزا قبال دا زي ما قالوا
وفعلاً والله ما سمعنا بيهن إلا في عهد السمك لبن تمر صيني
والمؤكد في ناس سمعوا باكتر منهن بحكم الأوضاع
الاستاكوزا
والروبيان
والفراخ وكرات السمك المقلي
والمعكرونة بالباشمل
أوراق العنب المحشية بالتونا والزعتر
والإسباغيتي بالصلصة البيضاء
عصير التفاح والاناناس والفراولة
الكابتشينو
الاسبريسو بالحليب
طيب ....
من زمان ما كان تفصحوا عن "الميل" لمؤائد الكفرة والملحدين
شابكننا الميل أربعين الميل أربعين ؟؟
"البياكل بضاري دِقنو ؟؟ "
يعني "لمن تنزنقوا " هي لله هي لله
وفي "اللغف" تبقو برلسكوني وجورج "كلوني"
وحديث النبي "عليه السلام" عن "القديد" طلع بندق في "بحر" ؟؟
عندما دخل عليه "الإعرابي" الذي اختلجت أضلاعه ومال وإضطرب
فماذا فعل النبي عليه السلام في مواجهة الاعرابي البسيط ؟
قربه منه وربت بيده على كتفه وقال له :
"هون عليك ، إنما أنا ابن امرأة من قريش كانت تأكل القديد بمكة"
فلم يقل "إبن إمرأة فازت بجائزة السيدة العربية الاولى ....
ولا امراة حصدت جوائز رائدات العمل الطوعي ..
"محننة ومدخنة زي البابيلي تشبه الزينة "
ولا قال إبن إمرأة بتاكل الهوت دوقز في شيكاغو وشواطي فلوريدا ....
والبيتزا والاسباغيتي في روما وميلان ...
فالكلام "الغليظ" البباعد بينكم وبين خلق الله لزومو شنو ؟؟
وإن كنتم دعاة دولة الرسالة ما تبقوا علي "القديد"
"إقدد إضنيكن ديل قولوا آمين"
مالكن ومال البيرقر والهوت دوقز والبيتزا ؟؟
عواطف مرة قامت بدري "ذات عيد"
الجراد "بشد" في حمارو ماشي السوق
قالت ليهو "يابا عليك الله جيب لي باتيستا"
إستغرب في الكلمة وقال ليها "قلتي شنو ؟؟"
رددتـها عدة مرات لمن حفظـها
المهم
قال قضيت شغلتي في الجزارة وإتوجهت لود حميد
"هازول البت دي الليلة من الصباح قالت دايرا ليها باسطة للعيد"
قال
"ودحميد بكرمه المشهود وزيارتي المفاجئة...
قعدني في عنقريب كان في صالة دكانه ...
جاب لي كباية شاي وكيلو باسطة ضربتو ...
وعبأ لي باسطة صينية كاملة في كيسين ..."
طبعاً جا البيت عواطف سألتو "إن شاء الله جبتا لي الباتيستا؟؟"
قال ليـها" ودحميد عباها لي في أكياس وقرش ما شالو مني هاك "
وسلمها الكيسين عشان ينفك من طلباتـها
قالت ليهو "يابا أنا قلت ليك جيب لي باتيستا تجيب لي باسطة ؟؟"
وللذين لا يعرفون الباتيستا والكرمبلين والتريفيرا
فدي أقمشة كانت تقع فيها النفوس وتقام ليها الولائم
الولائم التي يقيمها الرعاة مطلقو الدقون في حدائق الرويال بالم وظلال أشجار الزيزفون
يمزو بالبيتزا والبيرقر والهوت دوقز ويتعشوا بشية الضان المتورت
تاركين الناس تلهث وراء لقمة العيش يلتحفون الجوع وتعتصرهم آلام المرض
إتبجحوا وما بتنجحوا كان رفعتو كبري شمبات
موضوع: إن عرفنا بالهوت دوج والبيرقر والبيتزا ؟؟ نحن والله الباتيستا والكرمبلين عرفناهن داكي الليلة دي 
الإثنين 23 سبتمبر 2013 - 17:46
