واحده ممغووووسه من الرجال

واحده ممغووووووووووووسه من الرجال جدا

--------------------------------------------------------------------------------

السلأم عليكم ورحمة الله
اختنا دى ممغوسه جدا من الرجال لأنه فى زواجها ألأول اطلقت فى الطريق من الكوافير الى مكان العرس . وفى المره الثانيه اتزوجت وايضا طلقت بعد ماسرق منها زوجها كل ماتملك . واتزوجت فى المره
ألأخيره وايضااطلقت لأنه زوجها قال هى بتششششششششششخر كتير
لذا كتبت ألأتى عن الرجال
من زماااااااااان وانا الرجال ديل رافعين لي الضغط... راس كبير على الفاضي: ! عليك الله رافعين نخرتم على شنو الناس الجضومم بيقوم فيها شعر ديل؟؟ الواحد فيهم لو غشيتي زي الشافع بيتغشى ليك...
الفصل الأول:قبل الزواج:
اسمعي يا عسل... ايه رايك نمشي المطعم الفلاني... قلتي غالي؟؟ ما في شي بيغلى عليك يا اعز الناس ... بعد الزواج : نجيب فول من الفوال البرة ليه؟؟ انا جايب ليك قدرةاكبرمن راسك من سوق ليبيا بالشي الفلاني عشان نخسر قروشنا عند الفوال؟؟ مرة مسرفة!! لا .. و الظرافة قبل الزواج: انا بصراحة ما بحب الملاح والحاجات دي بحب البيتزا والمعجنات وهو كان شمه ريحة ام رقيقة حيلو يبرد ويجري عليها واهم شي يشتريه في عفش البيت الصاج...
واحلى شي لما يقول ليك قرووووووششششششي وانا حر فيها : ياخي يقرش حلقووووومك ( سوري على الدعوة دي بس من زماااان نفسي اقولها ).... المرة من الفجر تصحي الاولاد تحشي السندوتشات تعمل الشاي تنضف البيت تعمل الاكل وهو يجي الساعة 3 من الشغل ويعمل فيها بني الاهرامات براااااه : تعبان وزهجان و ما داير يعمل اي شي .... مرتو بعد شغل النهار دا كلو تغسل عدة الغدا وتبدا تقري الاولاد وبعدين شاي المغرب بعدين العشاء يعني قروشششششو دي: شرااااااااااكة بينم امال هو متخيل انه اتخلق عشان يتخدم بلووووشي.... دقيقة اشرب موية باردة واجي ريقي نشف من الغيظ.
المهم :
الفصل التاني:طلباتم الغريبة :
الواحد ياخد بت الناس من بيت اهلها و يكون داير يبكي من الفرح ما مصدق انه رضت بيه.. بعد شوية يبدا النقة: نكدية.. سمينة/ضعيفة ... ما بتهتم بنفسها ... بيتها مااااا نضيف شديد... طبعا مفروض النهار كلو زي تور الجر ...الاولاد لازم تقريهم يطلعوا من الاوائل والبيت يكون زي القصور ( وهو كان قالو ليه جيب ملاية جديدة يقرب يبكي!) و مفروض يكون شكلها يكون نانسي عجرم( او هيفا وهبي عشان المكسرين في هيفا ما يزعلو) وهو كان قالت ليه كوفير ساااااااي يسمعها بيان تفصيلي بالمنصرفات عاد هو تعايني ليه تلقي الصلعة لياقة القميص بي ورا والكرشة مدورة وكبيييييييييييييرة و ما عاجباه مرتو !
الفصل التالت: التعامل :
طبعا الرجال بيحاولو يقنعونا انه اسهل طريقة للتعامل معاهم الكلمة الحلوة والدلع ... عشان تدلعيهم طبعا ... الواحد يعدل نضارتو ويحك جلحاتو و يديك نظرة حنونة ويقول ليك: عارفة دايما بيقولو الرجل ( مش الرااجل) زي الطفل كل شي ممكن معاه بالكلمة الحلوة واللطافة .. قال يعني هو لما كان طفل كان بيعاملوه بالكلمة الحلوة واللطافة ( شوفة عيني امه ساكاه طول النهار بالسفنجة) .. اسمعي يا اختي نصيحة مني للتعامل مع الرجال: دايرة منو شي: قولي اول شي بأدب ووضوح رضى رضى ...ما رضى: صري وشك لما يبقى زي الخيارة النشفانه و حمري ليه بعدين ارفعي انبوبة الغاز بيد واااااحد ونزليها( أنبوبة فاضية طبعا بس انتي ما حتقولي ليه )) وبعدين كوووووركي وقلبي ليه القديم والجديد ...و بعدين بكل لطافة ورقة وحنية كرري طلبك ! و ان شاء الله حيحصل.



منقول

ايات سلامات
ما تكونى انتى .

ايات السلام عليكم
رمضان كريم
والله ميه ميه
اتخيل لي الحاجه دي حاصله ميه بالميه
دكتور فتحي الربع كان بقول لينا لاثابت الا التغير ( يعني اي شئ بتغير وماكل الحاجات بتشبه بعض )
لكن انا بقول لاثابت الا التغير +لاتغير في الرجال علي مدي القرون ومدي العصور وكلهم بشبهو بعض بنسبه مائه بالمائه مش اي حاجه حسب كلام دكتورنا ماثابته ونسبه التغير فيها وارده لكن لا في حاله الرجال ماف تغير
وشكرا ليك
ايمو

ايميو
سلام
للدرجه دى موقفك من الرجل ،لكن فى دراسه بتقول انو الرجال زى البصمه لاتتشابه ابدا . بعدين معقول جمال جكسا بتكون زى خلف الله .مع تحياتى لعم خلف الله وجمال وكمال وحاجه صفيه وعمره مقبوله انشاء الله .

السلام عليكم عبد الوهاب كيف حالك هم بخير والحمد لله وتسلم يارب
والله جمال جكسا وخلف الله بتشابهو
انا غايتو ضدد الدراسه دي
بعدين انت اخدت موقفي بالجه ا لسيئ ليه ؟ ( الفي راسو بطحه بحسس عليها )
امكن انا قصدي بتشابهو في الحاجات الجميله وله شنو ؟
والله انا اتخيل لي المصبرني عليكم ان خلف الله و جمال وكمال وحسين وقدوره من جنسكم
وتسلم

ياايمو الموضوع دةماعندو علاقة بي الكديسة لما ماتلقا اللبن؟؟

بالله عليك
والله هو اللبن الايام دي ذاتو بقا مقطع والكديس الاستيل الراقيه الظريفه مابتشرب لبن ماصحي

سمح بطلي نونوة لانو في نوع من الالبان مدتو منتهية وبجيب اخرتك وهو زاتو مابدو لاي زول ياسيامية

ياجماعة الهدوء الموضوع ماموضوع لبن عشان الحكايه ما تمش بعيد
الموضوع الممغووسة شديد دي وين ومنو

ايمو بطلي الجرسه

بس ورونا نعمل شنو مع الجربغة في رمضان ,,شمال يمين يمين غرب شرق شمال
ولي قدام

الشباب .......الممغسين
والشابات .........الممغوسات

شكرا على المرور واسفين على التمغيس

ايات سلامات وكل سنه وانتى طيبه .بالصدفه دخلت على موقع يفيدك جدا فى الموضوع ده ارجو الدخول (نسيان دوت كوم ).

نسيان دوت كوم

مجموعة دراسات فى مفهوم النسيات تخصصه نسائى بحت كيف تنسى المراءه رجلا عاش داخلها ...احبته...اخلصت له...ربما تزوجته...وخذلها
هى دعوه لكل امراءه تبحث عن النسيان وهو داخلها وهبها الله نعمته وتخلت عنها بدافع ماسوشيه لاشعوريه سببها لها وهم الحب وجريمة الاستمرارفيه حتى بعد النهايه.....

الكاتبه احلام مستغانمى