قليبي رهيف .. وما بقدر علي الهبباي في عِز "الطيف"

خميس يمشي ساي مافي
لازم تلقى حاجة تكدرك
يعني تسييح ليك كدريك
خفت أقول "رُكبك"
يقومو واحد من ناس "لوكو حرام" يركبنا التونسية
بصراحة صدقت فعلاً إننا رهيفين خلاس
لوح التلج نكسرو بي سنيناتنا ديل
يعني شنو غير الرهافة ؟؟
المناسبة مقال لكاتبة بحرينية "صحفية"
الخلوق من شافت الصورة
هديك الكتابة شغالة تش
وطقطقة الكيبوردات في الواق الواق تسمعا
والحالة صورة يعني إن جات السودان "زائرة"
القيامة بتقوم والدم بحصل "الرُكب"
الله يكفينا شر الرُكب اليومين قالوا حايمات
وكمان مُعديات
تقعد جمب واحد في "أمجاد أو ركشة" وهو مصاب
طوالي ينتقل ليك الفايرس وركبك "تسيح"
ودا كلو مامن الرهافة إنتو قايلينو من شنو ؟؟
وشدة ما رهيفين الطيف يوقف الناس علي قنقرة ضنبن !!
الطيف "الكُضُم كُضُم" دا
ياما كتبنا فيهو أشعارا
روايات وقصصاً ومقالا
واغاني كشفت للناس حالا
طيفك مرة جاني
أطربني وأشجاني
جدد لي أماني
وليه ما شفتو تاني أنا أنا أنـــــأ
يا منى عمر وزماني
أهديتك أغاني
نزفت بالمعاني
بسمة تزيد جناني
ونظرة كمان عشاني

ولا داك الجاري الواقعة مابرفعا
ساكيلو طيف الليل كلو عشان يجبرلو خاطر
وهو يردد
اقيف يا طيف
اقيف وارجانى
وين فايتنى عابر
شين حارس وراك اناا تانى
يانى معاك مسافر
حتي الطيف رحل خلاني
ماطيب لي خاطر
لا لا لا تقول لى بمشى و اجيك باكر
يبقى انا ما الم فيك تانى
مين عارف المصاير
هاك اسمع رنين الحانى
و ابقى معايا ساهر
خفف لى قليل احزانى
ياما انا عشت صابر
شوف كيفن يسوى زمانى
ديمة على جاير
من مر العذاب خلانى
مجنون قالوا شاعر
شوف الليلة كيف بستانى
ده الكان ماشى ناضر
من حر السموم بيعانى
طيرو يفر يهاجر
احوم و ارجع اصد لبكانى
مقطوع راسى حاير
وين احبابى وين خلانى
عاد يا الله قادر
ما عارف العلى ترانى
فوق كرعي ساير
ابكى و اسولى فى اوزانى
اشعار مالا آخر
بس يا طيف عليك احزانى
لى شوية كابر
عشان خاطر قليبى
عشانى لحظات بس تخاطر
اه يا الله قادر
حتي الطيف رحل خلاني
ماطيب لي خاطر

أها ومصداقاً لغناء محمد كرم الله دا
جدن لينا كان قلبو رهيف خلاس
في مناسبة كان راقد في الحوش جمب خشم الباب
البجي داخل لازم يمر بيهو
زي ناس القبانة
دخلن مجموعة من "الطيفات" زائرات
سلمن عليهو وطايبنو
من السلام "اليدين ترينات عجبنو "
ولمن دخلن "بي غادي" صاح لي بتو
ياكلتوم ياكلتوم طريشتي
جاتو جارية مالك يابا في شنو ؟؟
قال ليـها ديل منو الدخلن عليكن أسي ديل ؟؟
قالت ليهو دي ما زينب مراة حاج النور
ومعاها الرتينة بت الضو والسارة بت العاقب
قاليـها "أجري بسرعة جيبي ليهن بيبسي من الدكان "
"ويكون بارد من التلاجة"
ضحكت وقالت ليهو سمح
بعد فاتن جات واحدة من ناس قرع ود العباس
سلمت عليهو ويدها ناشفة "عود"
طوالي كورك ياكلتوم ياكلتوم
تاني جاتو جارية مالك الليلة يايابا في شنو ؟؟
أها دي منو كمان الجات تنكاش دي ؟؟
قالت ليهو دي ما رقية بت جلال
طوالي شالت هم البيبسي
لكنو قال ليها أمشي كوركي للعازة بي فوق الحيطة
جيبي ليك منـها ليمونة كان بقى عندها
وسوي ليـها موية ليمون التشربا وتمش علي أهلا الدنيا ليل
ياحليلو الماحضر جنس الصورة دي

قليبي رهيف .. وما بقدر علي الهبباي في عِز "الطيف" Image

قليبي رهيف .. وما بقدر علي الهبباي في عِز "الطيف" Image

ما الناس كلـها هديك "مكسرة"
وللتعترا كتبت مقال وفي جريدة بلدا
مافي جرائدنا البقت تقول بتوزع عرقي
كل يوم كشة ومصادرة المعروضات
أها قامت كتبت عن الشأن السوداني قالت تشوف عوالم تانية
وزرزت وزير خارجيتنا جنس زرزرة
يا الفعلتك ويا التركتك
وأريتا كان مازرزرتو
يلا تعال شوف السجع
والجناس والكبكبة
واحدين يكوركو "والله كلامك صاح"
وواحدين يصفقوا ويهللوا ويكبروا
المعلقين فاقوا الآلاف في الراكوبة
لمن هي ذاتا نشرت تعقيب تاني
وشكرت الخلوق الإتخمخمت جاتا "عِمي ومكسرين"
قالت تلفونا لم يتوقف عن "الأنين"
والايميل يملا ويفضي
تركو الطرح
ومسكوا في طرحة الصحفية
الأعمى شائل "المكسر"
ياناس دايرين تفوتو علينا الصحفيين مالكن ؟؟
وبالطريقة دي والله صحفية واحدة تكتب في شأنكم مافي
قبال دا جاتكن وزير خارجية موريتانيا
الناها "المابننساها"
بت مكناس تذكروها ؟؟

قليبي رهيف .. وما بقدر علي الهبباي في عِز "الطيف" Image

ما وزارة الخارجية رقدت رجيجة
إشي شعراء
وإشي كُتاب
والبتكلم عن العلاقات الأزلية مع دولة موريتانيا الشقيقة
والبقول ليك شارع الشنقيطي محمية موريتانية
وسفير "من جماعتنا" متقاعد "يعني مكسر" قالوا يهضرب قال :
ما كنت أعرف كيف الشعر لولاها
حتى تبدّت ولاحت لي ثناياها
فقلت برق بدا أم أنّ بي سنة
أم أنّ ما كنت قد أبصرته فاها
إلى قوله
أسائل الناس عن قلبي
وأحسبه قد ذاب في حُسنها أو عند يُمناها
وأسأل الله أن يرعى مودّتنا وهل يخيب عُبيد يسأل الله ؟
ولا داك الكتب :
حـــي الشنــاقيط وحــي فيهـــم الناها =
وحي ربوعاً ارضعت افضالها الناها
اصـــل الاصـــول ابـــاً والام زينتهـــا
عُـــرب اللسان بافريقيـــــا تبنــاهــا
وقصائد البحرينية إن ما نزلت في اليومين الجايات لوموني
ودا الصحافة ولا بلاش
مش زي صحافة ناس فيصل محمد صالح وعووضة ووراق وحيدر المكاشفي ومحمد سليمان وشبونة
الله يكشف حالكن أنعمنكن كاشفين حال ناس "لوكو حرام "
أنا كان محل تيتاوي والله طوالي أشطب قيدن وأرطـــاح

لكن ما حلاتا بي نعلاتا

تختالي في موكب جمال
شايلك نغم
وتصولي حافيك الدلال
اللي ظلم
وانا قلبي زي هدهد حزين
يا سبا
شال النبا
ومن بعد اوهام السنين
يا سبا
دا الحب صبا
احيتي في قلبي الامل
واعدتي لي نوري الخبا
اه يا سبا
وانا اه ياسبا

اه يا سبا ريدك سباني
يا واحة يا فيض من اماني
ياروح حنينة مهدهداني
يا درة في ثغر الأغاني
تختالي في موكب جمال شايلك نغم
وتصولي حافيك الدلال
اللي ظلم
وانا قلبي زي هدهد حزين
يا سبا
شال النبا
ومن بعد اوهام السنين
يا سبا
دا الحب صبا
احيتي في قلبي الامل
واعدتي لي نوري الخبا
اه يا سبا
وانا اه ياسبا

سر الغرام في وجنتيك
والريدة طائعة تحن اليك
وقلبي الموله بين ايديك
اديهو من عطفك حنان
واسقيهو من ريدك جنان
خليهو يفرح من جديد
ويغني ليك احلى النشيد
احيتي في قلبي الامل
واعدتي لي نوري الخبا
اه يا سبا
وانا اه ياسبا

ياورقة ما شفت مداخلتك عفوا ياخي
العتب علي الدفاع بالنظر
كنت بتأمل في كلام الزول دا
وبنات الرضي صاجاتني
دايرين يلعبو تخيل
أمانة جاتك الليلة يوم لِعِب ؟؟
المهم خليك قريب ومعاك الازعاف
كلام عجيب
ياخي لمن وصل
اديهو من عطفك حنان
واسقيهو من ريدك جنان
أنقر ما مديت يدي ؟؟
أدينا إن شاء الله ما تنينا

بصراحة البوست إتلخبت علي
ما عارف شايفو بقى مقلوز
واحد ساي يستعدل لينا البوست مافي ؟؟
يمرقنا من جنس الورطة دي
وزي الطلعت عالي بي نمرة اربعة
والله يستر ما يجي في غفلة رقيبي يقول داير الرخسة
زي صاحبن لينا جا يقطع السكة حديد بنمرة اربعة
العربية طوالي رترتت وبطلت
والقطر كابسو
يالله شال العربية شيل مرقا من المازق
جاهو بتاع المرور كان مراقب الشروع في الحادث
وقال ليهو ادينا الرخسة
صنقع دنقر وقال ليهو
بالله أسي الدخل دا في دا شنو ؟؟
ياخي انا مرقت لي من قطر قدر دا تقول لي جيب الرخسة ؟؟
معليش يا سبا الحب صبا

» رداً للجميل ،، لبكري عثمان حمد ،،
» ترحيب بقدر الحب
» الي (كازيول) حي العمدة معاداة الشيوعية شعرا ماعندك ليهو رقبة !!
» [size=24] أقول انساك وعارف انى ما بقدر[/size]