عشان ما يجي واحد ويقول دي مجمجة
هي مكتوبة في العنوان بالخط "الفرفارة"
الصادق المهدي بالإكسبريس الفرفارة ودوو كوبر
بس عشان "نهر" غنماية الرئيس
البقت بقدرة الجهاز "المقتدر" زي "كلب الست" زي ما قال نجم
ابراهيم الشيخ محاكمتو يوم الخميس
ووين ؟؟
في النهود
مشى لحضور فعالية من فعاليات تنظيمو
وكلمة من دا وكلمة من أبولادي يوم الدين طوالي "الشرز"
ودا وأبولادي يوم الدين بنجيـها عُقباتن
لكن الله أعلم يكون قال تك للغنماية معقول يكون ماعارف ؟؟
على الأقل براعي قانون الملكية الفلكية وكدا
المهم أي زول يعمل حسابو
داير تنضم في بقر المتعافي تنضم زي ما عايز
لكن غنماية المك ما تهبشا وما تقول ليـها "بِغِم"
وإن أكلت كسرة غداك ما تسألـها أحسن ما تتكسر إنت "حتة حتة"
وإن كمان "لِحست" خدك الأيمن تقوم تدير ليـها الأيسر "كان في"
وأحست تكون بي خدود "ملحوسة" في ظل هذه الظروف "المنحوسة"
أي حاجة سريعة تاني تجليـها
لبن في النار إن فار وإدفق ما تقول "فار سريع"
فار فرفارة مالا ؟؟
أوعك تقيف في البنطون وتقول مسافر بالبص السريع
أبدن تخليك عاقل
وطوالي تقول ماش بالبص أو الحافلة البتفوت رفاقتا وتجدعن تخليهن بعيد
شفت ليك جناح في مباريات كاس العالم لو بطير ما تقول سريع قول فرفارة
مضارفة المؤمن على نفسه حسنة
واحدة زوجـها إسمو "مالِك"
تأدباً ما بتجيب إسمو كلو كلو
مرات تقول "دا"
ومرات أبولادي
قالوا مرة تصلي جهراً وفي ناس قاعدين
وفي الفاتحة لمن وصلت "مالك يوم الدين ...إذكرت
طوالي قلبتا "أبولادي يوم الدين"
وأخرى زوجها يدعى "الإمام"
مرة دا ومرات أبولادي
جوهن مداحين
وفي أثناء المديح المداحين قالوا للقاعدين "صلوا على النبي" يعني شيلو معانا
"من مكة سافر قام
قاصد مدينة أبشام
بريدك يا الإمام "
أها لمن وصلت "سوبا قلبت هوبا" وقالت
"من مكة سافر قام
قاصد مدينة أبشام
بريدك يا دا "
شفتو جنس الأدب السريع دا قبال دا ؟؟
موضوع: لمن تصل سوبا طوالي تقلب هوبا وتقول "الدعم الفرفارة" 
الثلاثاء 10 يونيو 2014 - 13:06
