أعاصير الخريف هولتنا بلحيل ملقلقة عينا في "أسمنت الفيل" تطعن في "جالوصو" ماصتو وبشتنت "ضُلُو" والمسئولين "يلوصو" ولولا براعة المحلية والمعتمدية وتجار المحلبية كان لملمونا من "بُتري" وحسب كلامن في إعلامن فقد كانوا للخريف "داباردا " تصب بي هنا الموية تشتت من هنا أُمال إيه ؟؟ مش عملوا مجاري من الخرصانة والاسمنتي ؟؟ طيب !! اللـهم إلا تكون موية حوشك ما دايرة تمرق أها في الحالة دي أجهزة "الدفاع بالتنظير" تسوو شنو ؟؟ موية "عاشقة" ليـها بيت وعايزة تموص جالوصو ؟؟ بالله عليكن المسئولين كان لاصو خاتيين ؟؟ الله يديـهن العافية تب ما قصروا معقولة يقصروا ؟؟ شوف جنس التعب دا هو العليـهن شوية ؟؟ عمارات الخيران ودكاكين الحيران وأكشاك الحبرتجية والنسوان والنصيحة ديك البريد الشيخ أنا ببني ليـهو "جناية" الشيخ "طهروا" طهروهو وفرحت أمو الشيخ "طهروا" والبنايات في سِجِلو إتلموا الشيخ "طهروا" والبنايات في سِجِلو إتلموا العديلة لييي الليلة سار في السوق زي بت ود أعمو البنضورا لييي لكن برضو وعشان نكون "موضوعيون" الماعندو صبابة في البيت المسئولين عننا جابو ليـهو الصبابة المصري الببيع في العدة بالأقساط المميتة "قلب" صبابات البحر قبقبو وترسو بالشوالات إلا يطلع لي فوق خيام الإغاثة جـهزوها كيمان كيمان للطواري ومواد الإغاثة أمانة ما فتحت محلات موية المواسير وموية الصرف وموية الخريف أصبحوا في الشراب سيان المستشفيات وقفوها على قنقرة ضنبا تحسبا للحوادث ومن جيوب عقارب المصابين نجيب "الشاش" و"الِلصق" والديتول والبندول وحقن التتراصايكلين والعناقريب "النقالة" دا كان لقيت ليك أربعة من الكنبة الورا يشيلوك كوكب منزه في علوك لو كان "حسيب" إزعافو واصل لي تبوك المهم السنة دي بعد الميزانيات والنضم الكبار كبار قلنا المطرة تصب بي جاي نحن نزوغ نمرق بي جاي لمحلات الفول نصلحو بالدكوة وزيت السمسم والعيش من نارو لكن باغتتنا المطرة جنس "باغات" مش قلنا ليكن المسئولين مننا من بدري أعدوا العِدة شفتو الشِدة ؟؟ معقولة يخلو الخيران ويـهدمو الدكاكين والتشاشات ؟؟ الدكاكين بدخل قروش أها الخور بجيب شنو غير "القُشقُش" ؟؟ دا في السوق في المساكن وطرف "الغبائن" شارع ناس السماني يدخلك في بيت التومة بت حمد شكشاكة توقف الحركة أي زول شايل نعلاتو وآخرين تلقى الواحد جلابيتو في خشمو تقول ساكي ليـهو حرامي "من حرامية النـهب الجميل" لكن يالموية ما بالغتي آبار السايفون الفي نص الشوارع مالا ذنبـها شنو ؟؟ مالو لو مريتي فوق للسايفون يعني كان في زول حا يحاسبك ؟؟ أو كان تمرقي بي تحت البئر وتغوري في ستين داهية ؟؟ مالازم كمان نعمل سايفون مش أحسن من نشيل اللباريق ونضرب الخلا ؟؟ وبفضل التكنولوجيا في ناس "محظوظة" قدرت توظف الآبار القديمة كسمفونيات حتى "عِد"جدي فضل المولى الله يرحمو قالوا داير يتحول كسايفون القصة دي ما عجبت طيفور أصلو بجي بالليل ما شاء الله سكران وراكب حمارو أها خاف يوم "يترتح" في "العِد" يلحق الرقدو وفي يوم من ذات المغارب وبي فوق الحيطة "كورك" للخليل ردت عليـهو علوية "الخليل مافي ما جا من صلاة المغرب" قال ليـها "خلاس قولي ليهو أردم العِد دا أهدمو ما يودي لي زول في داهية" قالت ليـهو "بري والله ما بنردمو ولا بنـهدو" قال ليـها "لي شنو ما بتردموهو ؟؟" قالت ليهو " خليل أخوي قال داير يسويهو سايفون" بي سكرتو ديك قال ليـها في إستغراب ودهشة "قادر الله يا بتي ....." "دحين قلوط الفوتريتة دا خرتوش المطافي بفرتقو؟؟" "خلي موية راكدة من زمن جدي حي وأبوي صبي" وعشق دور حديدو أها بالمناسبة أهديكن أغنية القطار دور حديدو بصوت مغني حبشي
شوفو الجيـهة أسي أكان مسكنا حاجاتنا ديل للحبش ما أحسن من اللبش دا؟؟
موضوع: قسوة أعاصير الخريف ، وسطوة تماسيح الجريف 
الإثنين 18 أغسطس 2014 - 8:35
