حَكّامْــــــــــــــــةُ امْ كِيكِي

ليلكْ بَهِيمْ
إغَالبْ صَرِيخَك فَقْدْ القريبْ
تعاين دواخلكْ
تكوس لي حبيبْ وتلك الأماكنْ،
وما تَلقى ساكنْ غيرْ النحيبْ
ْْْْْْْْ
غريبة الدارْ
مَغبّرة كاتمةْ
صانّةْ كالجَبّانة
تهاتي بالعِينة اْمْ بروقْ
في رَجا المطرْ الصّبيبْ
هَدَاْ ليلْهَا وَدّرْ بهجتو الطربَانةْ
لا أكلنْ طعيمْ
لا بالنْ إروقْ
لا زُوجَنْ لزيمْ
لا جنيات اِطمبرو لا بَنّوتْ إقوقنْ
لا طبْلَنْ رزيمْ
--------------
علّمَني اْمَاتي
مِنْ بقيتا بِنَيْ
أغني للحرابة
اِزَغْرتَنْ جاراتي
لي أبُويَا وِاْخَيْ
وَنَا واقفة لي فُرْسَاني:
ما في زول يَغَشَانِي
ما يتاوق لَيْ
أو يْدقْ بيباني..
إلا بعد الهَبْرةْ
------------
جو العيال اجتمعوا
قَجُّوا الكلاشْ للتارْ
فارقونا دْغيشْ
شدّو خيلُم فزعوا
زي بِريقْ ياخْواتي
مِتِلْ سِلاحُنْ لمعوا
قام عجاجُنْ ديشْ
فِضِلت أندَهْ وأندَهْ
للعامرة بيهم دارنا
وُحالي لينا العيشْ.....
لكن قُلالْ الرّجَعو
ْْْْْْْْْْ
يا الله يا منّان
ليكَ بشرح قصدي:
الحرابة تغور
نرجع نصطلح
بالحُسنَى ما بالزِندِي
الخراب ده إِفُوتْ
اِتفاهمو الحِبّانْ
تتناغمْ الأمّاتْ
اِحِلْ علينا أمانْ
إِجو فريق ناس فوقْ
اُنَاسْ الفريقْ التحتو
جملةً فرحانين...
أمُرْقِي يالقَمْرَهْ
جوكي الشبابْ ناقزينْ
ْْْْْْْْْْ
شُوفُولِي ناسْ عوضيةْ
نادوها حدّ الزينْ
"وِنْتِي يا رِقَيّةْ
رِقَيّةْ بتَ أهلنا...
أم شعراً مَتَنّى"
قُوميلا يالصِفيرهْ
يَمْ دَمْعَتَنْ مِطيرهْ
"قَشّايتي يالخِديرةْ ..
بَفِرِكي وبَطويكي
بَشوفْ شبابي الفيكي
شبابي نورْ الوادي
يا حمرةْ امْ بوادي"
هـَ ديلْ عيالنا اليُفّعْ
بَدَالْ إضُرْبُو المُدفعْ
دايرين إضُرْبُو اْمْ كيكي
==========
جيرانَا صالحونا
شدّو الرِّكابْ قَصَدونَا
نضبحلهُن كرامة
كرامة للسلام
كرامة للسلامة
.. اِبْقَا فَاضِلْ قولِي ليكِ
إخَيّتِيْ الحكامة:
حَكّامَة يا حَكّامَة
حِكْمَةْ تْحَكِّم الرّايْ السديدْ
كانْ في الجُبالْ كان في الغَرِبْ/ كان في الجنوبْ كان في الشّرِقْ/
كان في الشمال أو في الصعيدْ/
تِعبت الروحْ المَقَنْطَرةْ للهلاكْ
قوم يا مَلاكْ الرّحمةْ بشِّرْ بالجديد
وابقَ دوباي للعمل
....
العملْ عند الأهلْ
الأهلْ عايزين أملْ
الأمَلْ جُوهْ القلوبْ
القلوب دايرهْ الوئامْ
الوئامْ دايرْ السلامْ
السلامْ دايرَ الضَرِعْ
الضرع دايرَ الزرعْ
الزرعْ دايرَ المطرْ
والمطرْ حق الجميع
المطر خير للجميع
--------
مَغْرَبتْ والطير سكتْ
لي عُشو آبْ
شوقي غوّر
إلا بيتي بشوفو نوّر
بعدما شال السحاب
والقِبْلِي دوّرْ
وجاني من قالْ طه زولِكْ..
عالي بَنْبَرو في مجالسْ
الاصطلاحْ
واْقْوى من قالْ..
زي حميد:
"أرضاً سلاح
أرضاً سلاحْ"
وفوكَا زاد:
ما بْندُورْ "صقارا حام"
فوقْ جماجمْ الانتقامْ
وتملّي زاد:
سوقني محل ما الحبيبة
قريبة تراعي الغرام
غريبة الأشواق حبيبة
يجيبا منام في منامْ"

محمد المهدي عبد الوهاب / منقول من بوست لـ "عفاف أبوكشوة" سودانيزاونلاين