وكلو من الايطالية فريدريكا موغريني ممثلة الاتحاد الاوروبي
الأصدرت بيان باسم الاتحاد الاوربي المتهالك
انتقدت فيه قيام الانتخابات "الحرة" في السودان
وقالت دي انتخابات ساي لانها بتم في بيئة غير مواتية
وقالت الحكومة فشلت في بدء حوار وطني حقيقي
واعتبرت ذلك بمثابة انتكاسة لرفاهية الشعب السوداني
وممثلة الاتحاد الاوربي بقت عليها حكاية "عدال القُصص أب قُصةً عوجا" كونجالة
قاعدة في مكاتب الاتحاد الاوربي في أمان الله تتمردغ في نعيم بروكسل
تاكل وتشرب على حساب الشعب الاوربي البائس المشرد الغلبان
كتير خير موغريني الدباب الرمى فيها حبلو وعقد عليها
وكمان وظفا مع الدبلوماسين في الاتحاد الاوربي بي عصيباتا
مؤهلات زي الناس ما عندها عينوها بالواسطة وأكلت الباستة
خلت دا كلو في بروكسل وقبلت علينا نحن المرفهين ديل
مالنا إشتكينا ليك ؟؟ ولا لقلقة منك ساي أسمعي النحدثك كان ما وروك
"نحن "حُكُمنا"مهما كان ريعو برانا ناكلو نلمو
ونحن بنلغف الجاز من مواسيرو والزيت يمين من امو
نحن بنلبع الصيد والدابي اب زنود ما بنقرب سمو
ومع الأصم سمك الله في البحر "صوت" معاو ما بشمو!
"نحن ان قمنا فايتين الاوربيين النجوس فراسخ فوت
أصحاب مشروع حضاري الما بشابهو بي طاغوت
نحن أصحاب صناعة ثقيلة تشهي الخواجات الموت"
"من الأدب الشعبي بتصرف"
شنو ليك أها لقيتينا كيف ؟؟ عشان تاني ما تجي تهابشي تقرصي
رئيسنا تمام وماش بي نظام وكفل لينا حقوقنا الدستورية
حق الحياة وحق الهجرة والتهميش وحق الانتقال للآخرة في سُكات
يأكلنا نيم يأكلنا حِمِت رِمِت علي كيفو ما عندك علاقة بينا وما اشتكينا
ولو دايرين نشتكي عندنا ناس أمبيكي وأم كيكي وعيسى مماتو
والجلبة دي كلها دعاية مقاطعين ما عندهن "قواعد" جماهيرية
والبركة في أحزاب الفكة كل يوم في إنبثاق لا عِرق لا صفق لا ساق
دايرانا نهيي الأجواء ونكفل الحريات طيب دا ما الهوا ذاتو
وكمان نشرك ناس الحركات ومنظمات المجتمع المدني ألعبي غيرا
"وقسم" الأصم قاعد كان داير يفوز بابنجيدا يفوزو
سجل الناس كلهن في الكشوفات الاحياء منهم والاموات
إنتخاباتنا ونحن أسيادا مش علي كيفنا ؟؟ إنتي مالِك ومالنا ؟؟
أيييي نرشحو ونفوزو ويمثلنا في الامم المتحدة كان عجبك
ما تقومي نفسك ساي كان عندك شغلة أمش أقضيها
تباري من مكتب لي مكتب في الاتحاد الاوربي ياعديمة الوالي
ما تقولي لينا لاهاي ولا فرساي كان سكيتو لي باكر ما بنقبض
وبعدين ما يفوز كان فاز مالو الفوز كتير عليـهو 26 سنة مش خبرة ؟؟
كمان جاية تورينا الشفافية ؟؟ إنتي الشفافية شفتها وين ؟؟
فريدريك راينفيلت ما خج الصناديق في السويد مالك ما نضمتي ؟؟
وداك الليلة شارل ميشيل البلجيكي ما فلقوا بالبطاطس ومسحو بالمايونيز ؟؟
أسي في ذمتك دي شفافية ولا مقبلات مشاوي ؟؟
ما تخافي علينا "ياختي" نحن لا عندنا بطاطس ولا عندنا مايونيز
وكان ما مشى عديل ملاح نعيمية بنكشحو في دوماتو وخلاس
وكان عندك عمار شفافية أو شعيرية أمشي سويهو اسباغتي في إيطاليا
قايلانا ما عارفين ولا قاعدين في إضنينا ولا ما عندنا سفيرات ؟؟
أسي أمانة في ذمتك حصل سفيرتنا في روما إدخلت في شئونكن ؟؟
سفيرتنا في روما أميرة قرناص ليها التحية بالمناسبة دية
يوم واحد قالت برلسكوني فعل ولا برلسكوني ترك ؟؟
ما هداك يمسكو من دي ويفكو من دي شيكاتو كلها بدون رصيد
ياخي دا جاب سيدوف الهولندي لميلان وكرشو وما أداهو قروشو
بالله عليك سفيرتنا يوم واحد فتحت خشما بي كلمة ؟؟
إنت أقعدي إتحاومي لينا كدي زي لوري الببسي
لمن قطرك يصفر وراجلك ينط يطفر ليهو في دبلوماسية تانية
ومش الاتحاد الاوربي دا كدي بس الننتهي من الانتخابات دي
والله نرسل ليكن غندور ونافع والاصم والجاز يفرتقوهو ليكن حديدة حديدة
موضوع: الاتحاد الاوربي ينعي الانتخابات قبال يوم الدفن "عدال القُصص أب قُصة عوجا !! 
الأحد 12 أبريل 2015 - 11:04
