عربات وايرباص الإتحاد العام للطلاب السودانيين !! وهول أم الحسين البنو بي قروش المخازن

إتحاد السرور بي كلاشاتو ودوشكاتو وعربجياتو
بي عرباتو وإمكن يجيب طياراتو وايرباصاتو
دا الاتحاد ولا بلاش
عربات بي 24 مليار
طلاب مساكين "كاتحين" ما عندهن "اليكدح"
وسيماهم في وجوههم من أثر القراية فيها شنو لو جابوا ليهن عربات ؟؟
رئاسة الاتحاد "شِدة ما مهمة" مبيتين ليها ناس في جامعة علوم الاتصال

عربات وايرباص الإتحاد العام للطلاب السودانيين !! وهول أم الحسين البنو بي قروش المخازن Image

تخريج مافي كان مرقت روح الخريجين جديد وقديم
يعني طلاب طوووالي حدهن الموت زي ماقال الجراد "عليه الرحمة"
مرة في الجزارة جابوا ليهو ضريبة بتقدير "جيد جداً"
وحسب كلامو قال أرباحو كانت جامعة القران الكريم ما تدخلوا
وبشان التقدير الضريبي كان رامي اللوم علي فتح الرحمن مع انو صاحبو
الجراد يوم قام الصباح بدري سأل من حزام القضروف
أمي سألتو "الليلة القضروف قائم عليك ؟؟"
قال ليها أبداً والله "قائم علي فتح الرحمن بتاع الضرائب"
المهم شال الحزام في يدو وركب حمارو فات
قال غشيتو في البيت في الحلة الجديدة مالقيتو
قالوا لي مرق بدري مشى المكتب "كان مقابل بيت ال محمود سيد أحمد"
قال مشيت ليهو هناك وأول ما دخلت لقيتوقاعد يشرب في قهوة الصباح
قال من شافني وقف علي حيلو وسالني "الليلة مالك آآآآلجراد في شنو ؟؟"
قال طوووووالي مسكت في الضهر وأخدت لي "قنتة حارة" وحكيت ليهو الحكاية
المهم قال فتح الرحمن شِفِت ما فاتت عليهو واخد ليهو ضحكة
ودخلني مكتبو وطلب الملف الضريبي وبدأ يقرأ فيهو
إنتهى من القراية ومن نظراتو عرفت التقدير أقرب للحقيقة
أها قال طوووالي بديت أربط في الحزام تحسبا للمطبات الضريبية أو أي هبوط إنطراري
قال وبي طريقتو ديك فتح الرحمن سألني " جزء كلام والباقي بالإشارة"
"شنو آآلجراد كل سنة جاينا بالحزام الكلام دا حدو متين ؟؟"
قال أشرت ليهو بتبديل يدي في الهوا وقلت ليهو " طوووووووووالي حدو الموت"
دحين الناس ما تنقنق ساي ديل طلاب طوووالي
والعربات أقل ما يمكن تقديمه لهذا القطاع الطلابعتالي دا
شوف رئيس الاتحاد دا عليك النبي ما بشبه ناس الكنبة الورا ؟؟
بالمناسبة الكنبة الورا دي كانوا بقعدوا فيها البايتين
ولأنو "طال الكان قصير والعالي إتاحت والصولات حليلن ملكتن راحت"
بقو البايتين يقعدوا قدام "دا لو جو دخلوا ليهن ليكشر"
يعني في سنهن دي يجيبوا ليهن عجلات زي طلاب زمان ؟؟
وعجبني رئيس الإتحاد في ردو علي الحساد المابعجبن العجب ولا الصيام في رجب
قال " بي قروشنا ولو دايرين ممكن نعمل شيرنق نشتري أيرباص"
ومالو الايرباص كتير عليكن ؟؟ إنتو البتسوو فيهو دا شوية ؟؟
لكن بصراحة الايرباص داير ليه جيهة مش جبهة
ودي ذكرتني أم الحسين الله يرحما لمن بنوا ليها "الهول" بي "الهبِر"
راجلا الله يرحمو ويغفر ليهو سفسف المخازن الكانت زاخرة الوكت داك
الناس كلها عارفة لكن زول بنضم مافي فضالة ساي "مقطعنو في مصارينن"
وام الحسين كانت إمرأة ضخمة جدا تمش الهوينا كما يمشي الوجي المِلكِك ليهو في طين
كان جنها بوبار طووووالي تشبكك عندنا وجابوا لينا ومشينا والفعلتك والتركتك
إن جابو ليها ربطة جرجير وعجور وطماطم وخمسة رغيفات تكلم الحلة كلها
لاقت حبوبتن لينا عليها الرحمة في مناسبة عرس في ود حسونة وتبادلن أطراف الكلام
وأم الحسين قاشرة بالهول الكلام كلو "عنقريب الهول الموسر بالبلاستيك"
"وترابيز الهول حقات الفورمايكا"
"وملايات الهول المعمولات بالكُروشي"
حبوبتنا نظام "أوضة طوب اخدر وراكوبة"
والعفش داخل الاوضة "سحارة" على مسئولية البدخل يدو طووووالي "يقرص"
حبوبتنا عاينت في أم الحسين "ممغوسة من لغف الراجل وبوبار مرتو" وقالت ليها
"النبي إنت وينو خِصرِك للهول هاجانا الهول الهول"
"أنا متنضرة كان لقيت هبرة في المخازن كنت بنيت لي فوريكة "
أها الايرباص الدايرينو للإتحاد العام للطلاب دا !!
دحين ما دايرلو شِنط سمسونايت ؟؟
ما دايرلو جاكيتات أو جلاليب بيضا مكوية ؟؟
أركبو عرباتكن ساي والكلاشات والدوشكات دي إلا تشترو ليها إنتنوف زيادة علي العندكن
لكن ايرباص دي جلوها يا اولاد الهرمة
طلاب لا يدرسون ولا يستحون ولا يتخرجون

» عربات برلمانيي المؤتمر الوطني البي 15 مليار !! وحكاية "بِت الرضي وعوض جاكات"
» شرفه وزير الشباب والرياضة ورئيس الإتحاد العام إفتتاح فخيم وانيق لحلويات تيسيباس
» دعوه لتقديم خدمه بسيطه للطلاب الجالسين للامتحانات باسم دوت كوم
» في الحصاحيصا اضراب وأعتصام اصحاب وسائقو عربات تاكسي رفاعة!!
» تعريفة حمرا+ 5 قروش+10قروش=كم؟؟؟