حا يشيلوك للصالح العام ؟؟ التمساح بخوفوهو بالموية ؟؟
مالك ما بتعرف الكلام ما تقول ليهم أنا كنت رئيس القضاء في البلد دي الزيي منو ؟؟
قول ليهم انا الذي نظر النظام الى مكايداتي وأسمعت تفصيلاتي من به صمم
أنام ملء جفوني عن تشريدها ويسهر المفصول جراها ويختصم
عملية بائخة الزول يشتغل ماكوك قضاء عشرمية سنة
وآخرتا وبعد ما خرتا يجي يتبهدل جنس البهدلة دي وبسبب بيت وعربيات كمان
شنو يعني تزرزروا في الزول وهو في سن المعاش يدردق في نجايلو وطبق الميري شايلو
مالكن ماعارفنو كان رئيس قضاء يهز ويرز ووقف القضائية السودانية علي قنقرة ضنبا ؟؟
ومفروض رئيس القضاء في دول الخلافة تكون عندو حُصانة أو بغلة
مش تبقى عليهو حكاية البغلة الكانت زمن سيدنا عمر خصوصا نحن في عهد خلافة
ودا دور الخليفة تجاه العاملين لديه عشان ما يتعترو في دروب المعاش الموحشة
وسيدنا عمر قال لو عترت بغلة في العراق لسألني الله تعالى عنها لِمَ لَمْ تمهد لها الطريق ياعمر ؟؟
فما بالك برئيس القضاء الأسبق يا عمر ؟؟
بغلة تعتر يقيف الخليفة بين يدي الله عشان ما مهد الطريق فما بالك برئيس قضاء أسبق
مالو لو أديناهو بيت إن شاء الله نشرد ليهو أي زول للصالح العام شنو يعني ؟؟
المفروض "من باب أولى" كان قاعد في بيت نملكو ليهو ونسجل ليهو العربيات العرفا وعرفتو
بيت ساكن فيهو ليهو أكتر من عشرمية سنة تقولو ليهو أمرق منو ؟؟
يا زول ما تمرق خليهن يشتكو واللشوفو الحا يحكم ليهن بالإخلاء منو ؟؟
بعدين تعالوا هنا يمرق كيف من البيت دا طيب والعفش يوديهو وين ؟؟
بعدا ما لملما النمل يجي ياطاها الفيل ويدوها لي واحد تاني ؟؟
"يتحدث المجنون ويستمع العاقل" دايرنو يقلع الزنك الأمريكي العاملو مظلات ؟؟
ولا يقلع أشجار الزهور والدرابزين البرا الحوش ؟؟
العفش كلو جايي من برا والمعدات الكهربائية ما بتتحمل النقل من فجة لي فجة
والستائر "سيتان وحرائر" تاني يلقى ليهو بيت زي دا وين يركبا فيهو ؟؟
والله لو تسمع كلامي أصلو ما تطلع هن القالعنو هين ولا مقطوع لين ؟؟
والعربات " كمهن يا جلال ؟؟" ما تقول لي إتنين عيب السواد أمانة ما إتلومو
الهيلمانة دي كلها في عربتين أو قول تلاتة عربيات أكل عليهن الدهر وطشم ؟؟
المن قعر حجرات الدراسة مامرقو جايبين ليهن كوريلات علي الزيرو يقلعوا عرباتك إنت ؟؟
الزيك إنت المفروض بعدما عتلت وشِلت نضفت ليهن القضائية المفروض يرقوك يودوك لاهاي
كان علي الأقل يستفيدو من خبراتك وتحاول "تبعبص" الموضوع الهناك داك أظنهن ناسينو
بالله مش كان ممكن تفكهن من اوكامبو وبنسودة توديهن الصالح العام خروج برا عودة ؟
بصراحة الغلطة غلطتك إنت من زمن كنت رئيس قضاء وقتك البتوقع بي يديك الاتنين داك
مغمض عينيك تشيل وتودي للصالح العام عدمتها السارحة والمتراوحة هدمت اهم اركان الدولة
ولي المساعدين عملتهن يايات والترقيات بالبرشوت ترضيات
زمان كان سجلت البيت في إسمك أو إسم أي واحد إن شاء الله ود الجاز ما كان نفعك ؟؟
البعرفك ويجيب خبرك منو ؟؟
وقول عرفوك دحين البقدر يلاوي البلاوي ويحكم يقلعو منك منو "كان في التسجيلات كان في المحاكم"
ما في دقيقة واحدة بتكون قعدتو في "صالح عام" علبو مايقوم إلا لمن منكر ونكير يشوفو طلبو
وما تقول لي ما بنيت ليك بيت دي تبقى بيتية وشيلا دفع رباعي
غايتو شيل شيلتك عشان تشيل تاني
والحمد لله جات علي كدا بركة المابقت عليك حكاية تقاطع شارع الستين داهية
موضوع: رئيس القضاء "الأصبغ" مولانا جلال !! أصلك ما تطلع ليهم من البيت ولا تديهم العربات !! دايرين يعملو شنو ؟؟ 
الثلاثاء 19 مايو 2015 - 11:05
