مسدار الدرجو فصيح
للحلوين الغايبين و حاضرين
(مشعلوا الحرائق الجميلة، و فعلة الانسان النصيح)
(0)
محمود ود طه:
استعين بى الله الفيك و تعال
يا مفرهد بالناس و ذلال،
يا بعيد و قريب
حبيب و غريب
يا رطيب النفس نفيس..
يا خال.
فد يوم شفتك فيهو
حبست السكة علي
وقدر ما اتعتر فى سوءآتى
اتشوشو بى رغباتى
وأغتس أقلع تعطش ذاتى
تقوم تلفانى بكلمة ري
بس يا ريت القلب جناح جبريل
ما الحد من خلف خلاف
وسوقك حااار يا حي.
(1)
محجوب وليد مريوم:
على مد من الأبيض الأزرق مظان شجر
على مكث من الأحمر الأصفر تراب تبر
على مد مكث منك كانت سماك الشعر:
وأطير أحلق فوق سماك
سما الوطن معيون،
وأطير أحلق فوق خلاك
خلا الوطن مسموم،
وأطير أحلق بى غناك
ما غناك مردوم
غناك تم تم
وأطير أحلق بى غناك
ما غناك مريوم
غناك ميروم
وغناك
فتح للضلمه عيون.
(2)
محمد الحسن سالم حميد:
مقيم فوق الشموس العصية،
ردءا للوطن
حتى تغلبه الشموس الى الظلال
فيلفحها قميص دمور ويخرج:
أرتيق المضايف واللطايف، المزاير والمصايف
الساق الشمش للضل
حميد للبنود من الشقاوة فتر
فوتك رهاب ، و فوت البلد أكبر.
ونوح من ها الحتوف ، من ها الحفوف يا نوح
نووح منها كتمة روح
ولسان مجروح
وولدا مالى ملى وكان بحبوح
بس ..
وييينك يا جرف يا حرف
يااازوول يا روح.
(3)
زهاء الطاهر:
يقول الشعر الا..نثيرا
يحب البنات الا..قليلا
يسقي فصول النبات الحياة
أكثر كثيرا.
العوافى يا ود يا موافى
با زاهى وماك متجافى
يا طاهر وماك عواف
البت بى وراك حدت وغطت وشا ضو بـ ريدك
والريد من بعدك شت و حت، سج و لج
وجف رهيدك.
با تقيل وشفيف
أخدر نكته ووناس
يا ذوق وقيافه
يا ود يا زراف.
عبد المنعم رحمة / سودانفووول
موضوع: مسدار الدرجو فصيح ... للحلوين الغايبين و حاضرين 
الإثنين 6 يوليو 2015 - 7:20
