بدأ العمل فى صيانه شوارع الحصاحيصا

سلام يا احباب
انا ما ح ادقس زى ما دقس حسن وراق وبقيتو ليهو فى رقبتو ح انقل ليكم الحاصل بالصور وبعد داك اى زول والقناعه بتاعتو
بما اننى انعم هذه الايام باجازة سنوية قررت ان اقضيها كلها بالوطن الصغير الحصاحيصا اتصل بى الحبيب حسن وراق وقال لى( ياخى وين انت ما مشيتو شوفتو الشوارع قالوا الصيانه بدأت )
رددت اليه ياخى ما معقول مافى زول ادانى خبر ورانا حاجة
قال لى ياخى شوف الحاصل عشان نتفكه من ناس المغربى والباشا وودعيسى الباقين لى فى رقبتى
حملت الكاميرا واتصلت بالصديق مزمل يعقوب وذهبنا يرافقنا حسن وزيرى
بالقرب من مكان طرمبة موبيل شاهدنا بعض اعمال الصيانه والتى تتمثل فى نظافة للشارع وطرحة وتوسعته من خلال عربة (لودر )
فرحتنا جميعا فى حضرة السيد المدير التنفيذى ومدير المرور والشرطة وعدد من القيادات التنفيذية
لكن هل سيتواصل العمل ؟
سؤال لا استطيع الاجابه علية
[img]

والله ما مصدق شوارع الحصاحيصا بدأة بها الصيانة والله دى حا تكون اجمل حاجة لقد عانت الحصاحيصا كثيرآ من الاهمال واتنمى ان يستمر العمل حتى تكتمل اللوحة الجميلة للحصاحيصا والى الامام دائمآ

والله مشكور اخونا عمار بس زي ما قال ابو علي صيانه ولا نظافه وقفل خشم....؟؟
المهم انو حصلت حركه واكيد الدق على الصخر مهما طال راح تتفتت وترمه واصبر ..
وربك المعين

الاخ /عمار تلودى
التحية لك ياعزيزى
وانا اسف على الغياب (مشاغل الدنياة )
وياريت ياواصلوا على طول
ودمت
المغربى

هووووووي ياعمار اعمل حسابك
انت عارف الاله الواقفة تحت الشجرة دي مالا؟؟؟
ما اظنك عارف
اوريك انا
ان كان نظافة ان كان صيانة
مقبولة من الحكومة
بس النصيبة دي في وقفتا دي عطلانه
والا ما كانت وقفت كدا يوميييين وانا بجي ماري هي واقفة كدا
تكون ماااااااالا؟؟؟؟؟؟؟؟؟؟؟؟؟
ربنا يتم الباقي ان كانت اي واحدة من الاثنين

اليوم تاااااني مشيت ي شارع المصيبة ديك وللاسف ما لقيتا بس لقيت ليك جذء منها قاعد وجذء مافي معناه كدة اتعطات فعلا وودوها الصيانة
ولو كان معاي كاميرا كان تكون يوجد صور
بس يا ابو علي لاذم تمشي تجيب توجد صور
بالتوفيق

ياداوود ده كلام شنو ..!
تعرف يكونو الميزانيه المطلعاها المحلية بس لحدي ما تتعطل المصيبة دي ويخلوها كده للناس على امل انها راح ترجع وبعد شهر يشيلوها والموضوع يتصم خشمو على كده ..
وتحت تحت تكون الميزانيه راحت ل............ مافي داعي
سمعت نكتة الاتنين الاصحاب واحد دخل مع الجماعه ديل وادو عطاء برج تجاري وريش منو لمن لاقاو صحبو استغرب لانهم كانو على الحديده قبل شهور قليله مع بعض وسأله من اين لك هذا فاخذه صديقه الى فلته وفتح النافذة وقال له هل ترى ذاك البرج فاجاب صاحبه نعم فقال طن هناك طنين هنا (اسمنت وسيخ و و و ) فقال له صاحبه طيب ماتشوف لي طريقه معاكم وفورا دخل مع الجماعه وبعد شهر واحد قابله صديقه متعجبا من مظهر الثراء الفاحش الذي عليه فقد اصبح اغنى منه فقال له تعال معي لى بيتي فاذا به قصر فخم وفتح له نافذة تطل على النيل وسأل صاحبه هل ترى ذاك الكبري فرد صاحبه لا فاجاب الصديق كلو هنا ..
ولي قداااااااااااااااااام

يا عمار تلودي ,برضو دقست,الصور دي نتاج عمل ساعه بس وبالتحديد عصر الثلاثاء 29\9 ,وبعدها تعطلت الاله الوحيده

وحتي الان لم تباشر العمل ,وبرضو مواسير في مواسير

يا عمار قالوا انتهوا من شارع فور وشارع 6 / ابريل وهسى شغالين فى شارع الطرمبات صحى الكلام دى يا عمار
تحياتى
المغربى