* ام الزين *

الاحبة الطيبين
اسمحوا لى ان ابدا معكم بقصيدة ام الزين
ام الزين نموذج للام الكادحه الصبورة التى ربت وسهرت وصنعت جيل من ابناء وبنات المستقبل
رغم عيشة الضنك وحالة وجع البلد لكننا نجدها مبتسمه فى احلك المواقف وصامده رغم كل الاعاصير والعواصف
لها التحية اينما كانت فى قرانا النائية و فى كل انحاء بلدى الحبيب
ولكم الشكر اجزله
***
*** أم الزين ***
ضلاله بي طرقه
مشروره في حيطة
متكوله بي مرقه
رقراقا بيتاوق
بيناغم ألفرقه
حداها أم الزين
لابساها نص فتقه
بلامه في وجيها
ملتوقه بي لفقه
شايلالا خماره
في حليلة متحرقة
وقودا في اليدين
حازماه بي بتقه
جهالا بي غادي
تتشابا في شفقه
تغنى وتهاتي
لصغيره بي رقه
تحجي يوماتى
خايفالو من شرقه
مقسومة في العينين
ما بتعرف ألمرقه
معيشة زى همين
تبداها بي طرقه
وحليلة في منقد
بصلاتها متفرقة
قفيفه مقدوده
مرقوعه بي ورقه
تتناول الفندك
تنادى للرفقة
كريمه أم الزين
بتقسم ألنبقه
حنينه للمسكين
تسقيه بالبقة
دمعاتها جوه العين
فرحانة مى حرقه
تلولى في الكرعين
ما بتعرف النقه
تحجي بالوالدين
لا صرخة لادقه
السمحة نواره
مرسومة ألخلقه
تتفقد ألجاره
بالنية مي زرقة

اسماء الجنيد
مسقط 26/3/2004

اولاً مرحب بيك الاستاذه الراقيه
ايه الروعه دي
ايه الابداع ده
والله ماشاء الله عليك ربنا احفظك
بالله كتري لينا من جنس ده وادينا من بيت الكلاوي
لك كل الود

زائر

تسلمي يا ســــــوما

كــــل الــــــــــــــــــــود
وكــــــــــــــلنا حصــــــاحيصـــــــا

الاستاذة سوما
هذا الحرف يغوص بنا عميقا فى تربة هذا الوطن العطاء
لينقل لنا صورة للام المثالية
فعلى يديها تربت اجيال واجيال
شكرا لهذه الصورة الناطقة الحية

الى سوما تقديراً واحترام
الى ام الزين تحية واجلال
هم كثر (( ام الزين )) فى بلادنا الحبيبة
لك ولهم كل الحب

ذكرتنى ام الزين (بقصيدة ) الحبيب الاستاذ عبد الوهاب هلاوى (حاجة امنه ) والتى تغنت بها فرقة (عقد الجلاد )
وذلك للتشابه الكبير فى طريقة سرد الكفاح والمعاناة التى تنفرض على الامهات
واذكر اننى ذات مرة جلست احاور استاذنا هلاوى ايام عملنا بصيحفة النخبة الرياضية وسالته عن حاجة امنه المضمون والمناسبة
فقال لى بعبارة مازالت فى خاطرى حتى الان (حاجة امنه هى امى وام كل سودانى بسيط )
تحية لك استاذة سوما ودمتى مبدعه فى شعرك
وتحية من هنا للحبيب هلاوى
ونقول له
لو لسه مستنى منى الملام يا سلام عليك يا سلام

الى عمار تلودى
بالله

سلام يا احبة الشوق لكم دافر والموده نيلين
**
العزيز انور محمد الحسن
حبابك انت يا العزيز عقابك
شكرا ملونه بكل الوان الطيف لى طلتك المشرقة
اسعدتنى بى عباراتك الجميلة يا ود الاكارم
شكرا حواشات سكرنا
**
العزيز حافظ احمد حبابك يا ود الزينين
كل ما امر بالحصاحيصا يجذبنى الشوق اكثر لكل الامكنة
شكرا لكم اهلى بالحصاحيصا العتيقه ومعتقة باهلها الطيبون
***
اخى الشاعر الشفيف عبد المنعم
لطلتك عزيزى احساس بالالفه وشوق النيل للضفة
تواضعك الجم هو شيمة ابناء البلد الواحد
احساسى اننا ابناء بطن ام واحده
تسلم يا ود القبائل وتسلم البطن الجابتك
تحياتى عبرك لاسرتك الكريمه
والشكر دعوات قبيلة

العزيز وليد العشى
ولك التحية والاجلال يا اصيل
فعلا هم كثر .. ام الزين نجدها فى طرف كل البيوت وسط الفريق ووقت الضيق
هى البلسم الشافى رغم الوجع الموكر حد الحشا
لك التحية اخى وليد وشكرا لا تكفى لطلتك الجميلة جدا
شكرا امنيات حنينة من ام الزين البسيطه وطيبة

***
العزيز عمار تلودى .. سلام واحترام
يديك قدر ما يرضيك يا عمار ياخوى
بتشبهنى بصاحب المفردة المميزة والكلمة الشفيفة
شاعرنا العتيق الاخ العزيز عبد الوهاب هيلاوى
والله ما قصرت معاى ابدا يا ود تلودى
ربى يفرحك ديمه
شكرا على الاعجاب والاطراء الفات حدو
ولك التحية والتحية عبرك للشاعر هلاوى
شكرا غيمه ومطرتين يا عمار
***
شكرا يا صداح على رفع البوست والطلة الصباحية
شكرا مارقة من الجوف
مرورك اسعدنى جدا تسلم يا ود البلد

شكرا للجميع واتمنى ان اكون ضيفه خفيفه عليكم
تسلموااااااا

سوما ... شكرا على الكلام الذى يود كل منا ان يمتلكه ...
لكن دحين ما اتاخرتى علينا كتير ..

حباب سيد الدار كريم المقدار
سعدت بى جيتك الباكرية
طلتك بكرت بى خريفنا الرويان محنة
الغربة يا الحنين والجدعه البعيده لومتنا فى اهلنا وحبانا وجيرانا
عذرا عدم معرفتى بموقع الحصاحيصا ..وهذا اعزيه لتقصير منى
لم اعلم به يعلم الله الا قبل عدة ايام عن طريق اخى الشفيف عبد المنعم سيد احمد
جزاه الله الف خير
ولم اتردد لحظه فى المتاوقة والفرحه بيكم
دحين يا يابا تاخيرى امسحوا لى فى طرف توبى ده
وهااااااااااادى تحكرة معاكم فى القيف
شكرا اخى العزيز بكرى شكرا يا وريف
تبراك السعاده محل ما تمشى ومحل ما تقيف

دحين انتى يا سوما قولك ده فى فطومة
أم فى حبوبة تنجى البتهدى الناس هدومة
ولا أم الكل وست القفة الحاجة التومة
أظنها مهدية العارفة التربية وعلومة
................شكرا سوما ونلتقى فى دار حبوبة مع فنجان القهوة
مع ونسة فاطمة بت محمود وقبلها كسرة بملاح اخضر مفروك بيد
بت وراق بثينة ....عليك بعزومة عبدالمنعم وليد سيداحمد وباقى الحبان
...................هنداوى

ام الزين

غوص شفيف , عفيف , كثيف , عنيف
اللهم ارحم امى واغفر لها

العزيز عبد الوهاب هندواى
حبابك الف يا ود القبائل
نضمك سمح بالحيل فى ام الزين ..
سرحت بى خيالى بعيد معاكم وسط الاهل والحبان
ولمة تحت نيمه وريفة ...وقلوب صافية ونضيفة
اريتها تتحقق الامنية دى ونلقتى فى رحاب وطنا الحبيب
وسط اهلنا وحبانا
طلتك اسعدتنى جدا اخى هندوى تسلم يا ود ملوك النيل
شكرا مطامير فرح..

ياسوما أم الزين دي وحيدي؟

سوما يا سودانية يا اصيلة اصالة مملكة كرري وجبال التاكا وابنوس جنوبنا وكمان نخلاتنا وعظمة جبل مرة
وعناق النيلين
شرفتينا ود/بكري معاه حق اتأخرتي كتير خلاص
وكل تاخيرة لي خيرة
حللتي هلا ونذلتي سهلا
عشــــــــــــــــــــــــــــــــــــــــــــــــــــــــــــــــــــــــــــــــــرات حبابك سلامــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــات

الاعزاء الطيبين
اهلين اخى صداح تسلم كتير
ام الزين مى وحيدى يابا .. بتلقاها فى كل ركن وفى كل راكوبه وتحت كل حيطه بتتشابا للجيران وبتناغم بى تحنان
شكرا على الطله اخى صداح

**
العزيز ود عيسى سلام واحترام يا ود ملوك النيل
شكرا لك يا حنين وانت تطوقنى بحرفك الندى ومعانيك التى رشت ديارنا عبير
ان شاء الله اكون عند حسن الظن يا ود القبائل
شكرا جداول محنة وفروع متكية حنة

شكرا سوما مره ومرات

» الحصاحيصا دوت كوم تنعي انور حسن الزين
» حنة نبيل الزين في حي فور
» افراح فاطنة الزين
» الأوباش لعثمان الزين
» الزين الحبيب في ذمة الله

*** ام الزين ***

* ام الزين *