اب قدم

وين يالبري
دود كيد البفرج نار همومي وشري
عسفتبو العبوس فارس العجاجها بيطري
سابل عرضو وافر وحاشا مومتعري
¬¬###################################################################

دفاع البداني التيه بقون وعشنق
فوق ضيفانو طربانا بتيتل شنق
فارس الدنقلن ندل ضحيوه اتخنق
روي العطشانة في عصر التريه الزنق
#############################
رحل العندو لكل ودفراش تقدير
ماصع ديما طول ليلو ونهارو هدير
يوم دبتي الخيول والفارس ام قصطير
بطرا متبر القدم الحداهو قصير
############################################
رحل الجودو مابتحاك دربو مزالق
رحل الببسط الدعج الوضيبها كلالق
رحل البدفر الوتر وجاهو مشالق
رحل الكفو زي سيل المطور الدالق
تقولي اردب
رحل الفي المحول بدي الضعاف بالاردب
رحل المن حمول الغير مكرك سردب
النيل الدغور اتراشا طربان هردب
##############################
بدفع ديما مابهم من غناهو وفقرو
عارف كل حيا بندمل في مقرو
الجزر السمان لضيفوا وارك اعقرو
فارس زقرت اليوم البخوجل صقرو
#################
رجلوا تفيلة في كبد المحاصات حارنة
ايا جبارة العامة البراشي عمارنا
عليهو تعج تنوح ست الحشا المتمارنا
والنوق برضو حنن قالت ايا حدارنا
ادم في البلد نوارة
##########
تبكي العامة سارفة دموعا فاقدة حدارا
فقدنو العوادي الفي المحل دواره
خت لهيجة بكري وناقتو نافرة حوارة
##############
الطامة البتاخد سيدها كم لازمها
حدود السمتا نجض كيتها ووسمها
رحل المونتو في سنين المحول قسمها
ياعلي فرقو جرح كبدتي وسممها
####################
رحل البي الخمام بمصع ويطبق الزيمة
رحل البفرج الكربة ويفك الضيمة
رحل العندو في كل المجالات قيمة
رحل الببسط الدعجة البقود هضليما
###############
رحل الجودو مو سخلة وعتود دغاي
رحل البدفع الدرشي ويداني الناي
رحل الدارو لليتمي والمساكين تاي
رحل الليدو سارية السما الدوداي
################
فرقك في الضمير فتق جروحو وخزن
بلدك كلو فاقدك مرخ وسمر وقوزن
ناس وادي الرسن والرفدي برضو بعزن
لي فارس المغارات ام مدافعن رزن
###############
ابكو علي العزيز نسبو ومنسل حر
قشاش دمعة الدعجة الوضيبها بجر
رقد فارس المغارات ام خيولا غر
بت الحسكنيت رزمت وابت ماتدر
##############
فاقداك الغفارات ام عبرتا ضارعا
والوعر التقرقر في الاسود متصارعا
سكينك علي عدل الردوف متسارعا
يابشنبا ملوي وعالية قامتك فارعة
########################
دفاع البشابه قجة الشراك
حلال البضيق عن زقرة الكوراك
كل الحية سارفة دموعا تبكي وراك
رحل الصيد روايق همل الشراك
###############
اياك فارس الخودة البركز الصف
غير الطيبات بشينة ماتوصف
اصلو الدنيا متي ماتدور بتختف كف
كن ببقالي في كفنك معاك بتلف
##############
راح سيف الصحابة الديمة جيب النصر
شروق وغروب وبنفقد لامصر
يابركة برا ويس وسورة العصر
تدخل الجنة لوج عالي وسكونك قصر

شكرا ابوهديل على هذا الكلام العديل ..
وكتر لينا من العيار التقيل