شاعر الثورة محجوب شريف

اشوفك

أشوفك جنبى..واتمّناك

واكذّب عينى إنى أراك

أصدق كيف بتحكى الشوق

وليل الغربه..لى مضناك

لى أنا..اللى بحلم بيك

ولى أنا..اللى بترجاك

يا حلمى البعيد..وعزيز

زمان يا حلمى مأ أقصاك

أعِد أيامى.. وأحسب بيك

ثوانى العمر ..واستناك

وما فكّرت يوم أنساك

ولو فكّرت كيف انساك؟

وذكراك يا أعزّ حبيب

دوام رغم الزمن ذكراك

انتَ الليله..جنبى قريب

بأىِّ مشاعر..أتلقّاك؟

وين أعصاب بتتحمل..

وين أحرف بِقَدْر هواك؟

*

تعال يا ماضى من عمرى

تعال..أنا من جديد أحياتك
مع السلامه؟

كنت عايزك للطويله..

وللأمانى المستحيله

وكنت محتاجلك معاى

والليله بهرب من وسايدى

من نجيمات المسا..

العنّك بتسال

ومن قصايدى

الليله بهرب من ملامحك

حتى من فكرة اسامحك

من الدروب الجينا بيها

وأىّ حتّه مشينا ليها

ومن حنينى الكان بيحلم

لو أماسيكِ

واصابحك..

قلبى كم حّباك ياما..

خَلّى يرحل بالسلامه

مع السلامه

مع السلامه

مع السلامه



بلا وانجلا؟


بلا وانجلى

بلا وانجلى

حمد الله الف على السلامه

انهّ كتف المقصله

والسجن..

ترباسو انخلع

تحت انفجار الزلزله

والشعب..

بى أسرو اندلع

حرر مساجينو اندلع

قرّر ختام المهزله

يا شارعاً..

سوّا البدع

اذهلت أسماع الملا

كالبحر..

دواى الجلجه

فتحت شبابيكا المدن

للشمسِ

واتشابا الخلا

*

شفت البنادق فى السما

الظبط والربط انتمى

للشعب..

شعب الملحمه

الصرخه كانت همهمه

والهبه كانت ململه

*

سداً منيعاً يا وطن

يا شعب وهّاج الفطن

للظلم يوماً ما ركع

مهما جرى

تباً لعهد السمسره

والنهب..

ثمّ السمسره

سداً منيعاً يا وطن

صه يا طنين البلبله

أبدا ً لحكم الفرد..

لا

بالدم لحكم الفرد..

لا

تحيا الديمقراطيه

كم نفديك يا مستقبلا

بلا وانجلى

بلا وانجلى

حمد الله الف علي السلامه

انهدّ كتف المقصله

الشعب حبيبي وشرياني

بطاقه شخصيه

الاسم بالكامل

إنسان

الشعب الطيب والدىّ

الشعب حبيبى وشريانى

أدانى بطاقة شخصيّه

من غيرو الدنيا وقبالو

قدامى جزائر وهميّه

لا لون..

لا طعم

ولا ريحه

وايام مطفيّه مصابيحها

زي نجمه بعيده ومنسيّه

المهنه:

بناضل وبتعلم..

تلميذ فى مدرسة الشعبِ

المدرسة..

فاتحه على الشارع

والشارع فاتح فى القلبِ

والقلب..

مساكن شعبيّه

ودينى محل ما تودينى

شرّد اخواتى واخوانى

فتش أصحابى وجيرانى

خلينى فى سجنك…

وانسانى

في سجنك جُوّه زنازين

أرمينى وكتّف ايدىّ

من أجل الشعب السودانى

وعشان أطفالنا الجايين..

والطالع ماشى الورديّه

وحياه الشعب السودانى

فى وش المدفع

تلقانى

قدام السونكى

حتلقانى

وانا بهتف تحت السكين

الثوره طريقى وايامى

معدوده

وتحيا الحرّيه

جميلة ومستحيلة - محجوب شريف

يا جميله .. ومستحيله
انت دايما زى سحابه
الريح تعجّل بى رحيلها
عيونى فى الدمعات وحيله
اسمحيلا تشوف عيونك..
اسمحيلا
أنا لا الصبر قادر عليّ..
ولا عندى حيله
يامراسى الشوق تعالى
لا اليالى تمر بدونك هى الليالى
من ضواحى الدنيا جيت..
وعليْ رحالى
لمداين فوق عيونك يا محالى
ريّحينى..
أسُتْرى حالى
فرحينى
عيونى فى الدمعات وحيله
أنا لا الصبر قادر عَلَىْ..
ولا عندى حيله
حدّثت عنك نجمة جارة
وزرعت اسمك..
حارة حارة
فى مناديل العذارى
فى مشاوير الحيارى
فى لحى الأشجار كتبتو..
نحتو فى صم الحجارة
وبحت للشمس البتقدل..
فى مدارها
عيونى فى الدمعات وحيله
اسمحيلا تشوف عيونك
اسمحيلا
أنا لا الصبر قادر عَلَىْ
ولا عندى حيلة
وانتِ منك لا بداية..
عرفت لسّه ولا نهاية
مرة أسرح..
ومرة أفرح..
ومرة تغلبنى القراية
ولّمن أكتبلك وداعاً..
قلبى ينزف فى الدواية
يا صبيّة..
الريح ورايا
خلي من حضنك ضرايا
عيونى فى الدمعات وحيله
اسمحيلا تشوف عيونك
اسمحيلا
أنا لا الصبر قادر علىْ..
ولا عندى حيلة

وتر مشدود - محجوب شريف


سلمت
خايف كنت ما يسلم قلب مفصود
حلمت
قبلك كنت لا بحلم ولا موجود
معاك بحلم كأني على فرس طاير بغني على وتر مشدود
واطير عبر السما المدود
سما الوطن اللي مالو حدود
حمامة جناها لا خايف ولا مفقود

واشر الغيمة خيمة على النجم وارتاح
أصادف أجمل الغابات واصادق غصنك الفواح
واشرب من زوايا القلب جنبك اخر الأشباح
وتفتح كلمة من عينيك لي مجرى الغنى المسدود

واخط اسمك على باب الزمان اكليل
وردة صبية تلمع فوق صديري النيل
وباسمك أغني لي عالم بسيط وجميل

وانادي عليك ملاذا في شتا الأيام
وبردا في الحياة وسلام
وفي شدة هجير وزحام

جزيرة حنينة بين نهرين حنان القاك عليك اتلم
وهودج في صحاري الهم
وعالي النخيل عليك اتلم
وفي السكة اللي ما بتعود معاك
لآخر المشوار نغني على وتر مشدود

احبك احبك

أحلى فصول العمر حنانك
حتة لقيتَ مكانك اجمل
أجمل سكة مشيتَ عيونك
أحبك أحبك أنا مجنونك
ساكن فيني هواك وبريدك
جوا القلب النبض يصونك

معاك معاني حياتي تبدا
وافتح باباً ياما انسدَّ
أشوف العالم ربوة جميلة
عليها نسيم الصبح مخدّة
وبيني وبين النهر عشانك
عشرة بتبدا
وبين عينية وخد الوردة
تبقى مودة
أصالح روحي
تبرا جروحي
ابشر باسمك اهلل أغني
أقيف اتحدى

أديتيني مشاعر حية
عوضتيني الزمن الماضي
زمن الجرح الأكبر مني
وقاسي علية
وبيك صادفني ولقى عنواني
رزاز الفرح الخلَّى الجية
أريت صادفني حنانك بدري
لو لاقيتك بدري شوية

غنى ياخرطوم غنى وشدى اوتار المغنى

غنى ياخرطوم غنى
شدى أوتار المغنى
ضوى من جبهة شهيدك
أمسياتك واطمئنى
نحنا منك ريح وهبت
نار وشبت
فى وجوه الخانو اسمك ياجميلة
ونحن ياست الحبايب من ثمارك
فى دروب الليل نهارك
وقبل مايطول انتظارك
نحن جينا
وديل أنحنا القالو متنا
وقالوا للناس انتهينا
جينا زى ما كنا حضنك... يحتوينا
لما فارسك فينا هبَّ
وعبَّ حجرك بالمحبة وبالأماني
صحى نار الثورة تاني وجانا داخل
زي شعاع الشمس من كل المداخل
وهز بالمنشور وبشر
ياما فرهد فى عيونك غصن أخضر
وفرحة أكبر من شجونك
والسلاسل يا جميلة
يوم ما كان ميلاد شهيدك
يلا غني ولاقي عيدك
ولى ثمارك لقي ايديك
جيل مكافح حلَّ قيدك
فى غضبنا الحر ولافح
وياما باكر وفى زنازين العساكر
نبني مجدك ومهرجانك
وكل قطرة دم عشانك
ولى جديدك يا جميلة

مريم ومي

مريم ومى بنياتي وحشتنى ولعبتن بى
تحياتى ..
تصحووا امامى اشواقاّ تهز النبض وتتاقى
عميقاُ من شعاب النور الاقى الذكرى بتاتى
سلاماً يا حماماتى اسكنن فى مسامتى
سلاماً يا غماماتى البتدني ابتساماتى
مريم ومى بنياتي وحشتنى ولعبتن بى..

**
يسافر قلبى صوتي يرن يسابق الريح
قلب (الوالد) انت صحيح تحن وتهم
حذاراك من الجواك وحذراك من جرى التبريح
حتهرب منه جلدك وين ويوماً ما حتسكت تم
واخط رأسى وافارق دنيتى وناسى
واخلى وراي كراسى
وما أسود سطر بالشين
وما تعود اساك العين
وما تشمت عدوي فينى
مريم ومى بنياتي وحشتنى ولعبتن بى

***
طريق الشعب اوسع من زحام الطين
وقلب الشعب ارحب من رحاب الضو
ونبض الشعب كلو حلم بداه بيتم
وتطلع من شقوق الارض آلاف المدن قامات
ويطلع حتى من قلب الحجر والصى
شجر متشابك الهامات
وجيل جاى حلو الشهد
صبايا وفتية يمرحوا فى صباح الغد
عيونهم برقهن لماح سؤالهم رد
خفاف ولطاف وثابين أوان الجد
دفاعا عن حياض السلم والافصاح

سلموا لى عليهم
سلموا لى عليهم جملة
حتى اللسه قبل الخلق والتكوين
صناع الحياة اليوماتى ملح الارض
نبض الشعر والموسيقى والتلوين
هدامين قلاع الخوف
كانت هذه الدراجة يوماً ما كلاشنكوف
مابين منارات السمع والشوف
نقاشين فى جدار الصمت
نساجين خيوط الشمس كهربجيةالظلمات
واجمل ما تكون الدنيا
رسامين حفاريين مجارى العصر
نصرا نصر حروفاً واحلالى تشمهن ترتاح
ح حرية ت تغيير ت تعليم ك كتاب م مسمار
ح حرية ت تغيير ت تعليم ج جراح
سكة حديد تهز وترز
ب بحارة بحراُ عب وثار
وطن مدرار جرت تتلاحق الانهار
كما تتلاحق الاعراف
كما تتمازج الالوان
كما تتصافح الاديان
كما تتمازج الالوان
هجيناً من سلالات الفخار والعز
مرور النسمة وايضاً هبة الاعصار
علم فى نشرة الاخبار
وهيبة على امتداد الكون
علماً فى حماه الوردة حتى الزهرة والمريخ
شبه حرب النجوم انزاح
ايادى القهر خلف الظهر مكتوفين
افاعى السحت حيث مزابل التاريخ

***

سلموا لى عليهم جملة
حتى اللسة قبل الخلق والتكوين
بشوفهم كلهم أسه
عصافيراً ترك جنبى
نوافيراً ترش قلبى
حماماتى بتشرب حسه من ايدى
مريم ومى بنياتي سمعتن صوتى جيتن هى
مريم ومى بنياتي سمعتن حسى جيتن هى
طلعتن من زوايا السجن كاللبلاب
وبين السنكى والترباس وبالرقراق وحلق الباب
وعبر السور زى النجمة والعصفور
تجرن جدولاً رقاق
من حبل العشم فتلات
ومن حقل الوطن شتلات
امكن الفى قلب جيتن لى
من تيابها شراع
ومنديلأ خيوطو شعاع
وكراسا مسطر بالضحى اللماع
وخط ايدا وشعورا الحي

وقالت لى قالت لى وقالت لى
سلاماً ياابو مريم ومى
ثباتك شعلة فى ايدى
بنياتك خلي راسن فوق
وحاشاك الكلام النى
وحاتك ما انكسرنه وراك
ولابد أن يعود الحى
وفجراً كالكرِب حيبين
وشعب تترب حيقوم
ويملا شوارع الخرطوم
وتجري مدامع الحلال
تجر النم تسوى القوق
فوق فوق سودانا فوق سودانا فوق

***


بدل شاهيك اشرب دم اذا قلت الكلام النى
وانا الما عندى ليهن شىء
لا فى البنك ولا فى الدين سوى الكلمة الما بتنداس
ولا بصبح مكانا الرف ولا عصفورة جوه الكف
ولا صقراً يحلق فوق وينزل كف
نبض الشعب اجمل من بريق الماس
واجمل من حليب الستره ما حبيت مشارب كاس
و القمرية بين اغصانا اشرف من موائد ناس
واقرب للوطن من ناس
وخيراً جانا ما عم البلد وسواس
أذن فلتقرع الاجراس
مريم حضرى الكراس
مريم ومى تعالن جاى نغنى لاخر المشوار
نغنى لاخر الانفاس
نغنى لاخر المشوار
نغنى لاخر الانفاس

نغنى لاخر المشوار نغنى لاخر الانفاس


تسلم محمد على

بالجد روعة يامحمد
نغنى لاخر المشوار
نغنى لاخر الانفاس

الغنية دي اهدا لي اجمل اتنين ايلاف ومصطفى مدثر عثمان الجاهوري

نقطة ضو


في اللحظة ديك والتو
لحظة الميلاد كنت نقطة ضؤ
فرهدت بيك فرهيد ....
وانتشيت بالريد
وطرت بيك الجو
قالو ايضا بت .....
قلت مالو ولو
بختي بختي
انت بتي ..
امي واختي..
همي شيلي ..
شيلي مني..
مني ختي
........................
بتي
بشوفها عز التبتبة
بتي البريدة مرتبة
دولابا داك والمرتبا
جات من قبيل من مكتبا
ادت ابوها مرتبا
سددنا دين دكان حسين
كستني توب نجدنا كم.. كم مرتبه
جيهت بيتنا القديم
السقف داك والمسطبة
...............................
قيرا قيرا يا مهيرة
ياشتلاية جاتا مطيرة
تكبري انت تشيلي حملنا
وتزيدينا ترانا كملنا
نسمع عنك ما يفرحنا
الاستاذة دي كتر خيرا
يوم تلقانا هي ...بتوصلنا
وتحصلنا ...تفك الحيرة
ما بتتصنت و ما بتتعنت
ما بتاوق في حق غيرا

فايزه السيد كتب:

نغنى لاخر المشوار نغنى لاخر الانفاس


تسلم محمد على

الخالة فايزة شكرا علي مرورك الذي اسعدني

نغني لاخر المشوار

عفراء مصطفى كتب:

بالجد روعة يامحمد
نغنى لاخر المشوار
نغنى لاخر الانفاس

العزيزة الغالية دوما شكرا علي المرور ولو عندك حاجة ما تبخلي علينا

نغني لاخر الانفاس

رؤى شعيب جبريل

.الغنية دي اهدا لي اجمل اتنين ايلاف ومصطفى مدثر عثمان الجاهوري

تسلمي وليهم التحية وليك يا التحايا ايضا لمرورك

ونتمني منك المواصلة في هذا البوست

محمد علي جبريل كتب:

رؤى شعيب جبريل

.الغنية دي اهدا لي اجمل اتنين ايلاف ومصطفى مدثر عثمان الجاهوري

تسلمي وليهم التحية وليك يا التحايا ايضا لمرورك

ونتمني منك المواصلة في هذا البوست

جدا يا محمد
دي اهداء لانو هم بحبوها وطلبو مني اشتري ليهم الشريط عشان كدا

راااااااااااااااااااااااائع يامحمد جبريل
اود مشاركتك بقصيدة تبتبا :
تبتبا تبتبا تبتبا تبتب
باكر تعرف تقرا وتكتب
وياما ترتب
نحنا بنحلم وكم نتمنى
هي تحقق كل ما تحب
تبني حياتا الند بالند
اي مكانة وخانة تسد
هدهدا هدهد كل الورد ينوم ويفرهد
زي عصفورة تطير وترك
تحبا وتمسك وتاني تفك
سيبا تفكفك سيبا تلكلك عايزة تنطط
بكرة حترسم وياما تخطط
بكرة حا يبنوا مدائن ضو
ما بيعكر صفو الجو صفارة حرب
تشطب من قاموس الدنيا
الضرب الشك الخوف
ينعموا كم بالشم والشوف واغاني الحب
افتح بابك آمن تب
زي ما النهر بيلقى مصب
اي حمامة بتلقى الحب
تلقى الورده الندى في الكم
تلقى حداها جناها الام
يرضع صافي حليب الحب
نقدل نحنا الجد والعم
تملا عيونا كهارب سد
باباً جاب الهم والزم والصد ينسد
نفرح لما ندمع جد
مد البصر الامل يمتد
العمل يشتد البنا ينتم الغنا يمتد
هدهدا هدهد
اكتبي اكتبي الف المد
حمام وسلام وسعادة بجد
اكتبي اكتبي ياء المد
سرير وعصير وعبير ينشم
اكتبي اكتبي واو المد
حقول وعقول تقرا المجهول كتاب الغد
اكتبي علم وسلم
لا حد يئن لاتسمع بم
لا ينزف دم
لا يعجز رد
لا يعجز طب
لا دمعه في خد
تبتب

--------------------------------------------------------------------------------

بررررررررررررررررررررضو مرثية عبد الكريم مرغني دي (يابا مع السلامه)استفذتني وماقدرته الا اني اشاركك بيها :
[center]
يابا مع السلامة يا سكة سلامة
في الحزن المطير
يا كالنخلة هامة
قامة واستقامة
هيبة مع البساطة
اصدق ما يكون
راحة ايديك تماماً متل الضفتين
ضلك كم ترامى حضناً لليتامى
خبزاً للذين هم لا يملكون
بنفس البساطة والهمس الحنون
ترحل يا حبيبي
من باب الحياة لباب المنون
روحك كالحمامة بترفرف هناك
كم سيرة وسريرا من حولك ضراك
والناس الذين خليتم وراك
وعيونم حزينة بتبلل ثراك
ابواب المدينة بتسلم عليك
والشارع يتاوق يتنفس هواك
يا حليلك حليلك يا حليل الحكاوي
تتونس كانك يوم ما كنت ناوي
تجمع لم تفرق بين الناس تساوي
نارك ما بتحرق ما بتشد تلاوي
ما بتحب تفرق من جيبك تداوي
الحلم الجماعي والعدل اجتماعي
والروح السماوي والحب الكبير
في الزمن المكندك والحزن الاضافي
جينا نقول نفرق نجي نلقاه مافي
لا سافر مشرق لافتران وغافي
وين عمي البطرق جواي القوافي
يا كرسيه وسريرو هل ما زلت دافي

يا مرتبتو امكن في مكتبتو
قاعد يقرا وزهنو صافي
يا تلك الترامس وينو الصوتو هامس
كالمترار يساسق يمشي كما الحفيف
كم في الذهن عالق ثرثرة
المعالق والشاي اللطيف
تصطف الكبابي اجمل من صبايا
بينات الروابي والضل الوريف
احمر زاهي باهي يلفت انتباهي
هل سكر زيادة ام سكر خفيف
ينده للبنية يديها الحلاوة
والخاطر يطيب
يدخل جنو منو محبوب الشقاوة
يستنى النصيب
الدفو والنداوة السنا والعبير
كالغزلان هناك في الوادي الخصيب
حيث الموية عذبة والغصن الرطيب
كم تحت المخدة اكتر من مودة
للجنا والغريب
عش وعشب اخضر جدول من حليب
يابا ابوي يا يابا
الشمس البتطلع بلت منو ريقا
والنجمة البتسطع فيه تشوف بريقا
الندى في حركتو يطفيها الحريقة
ننهل من بركتو زي شيخ الطريقة
شاييهو وطرقتو والايدي الصديقة
يلا نسد فرقتو حب الناس درقتو
يا موت لو تركتو مننا قد سرقتو
كنا نقول ده وقتو لكنك حقيقة
النفاجو فاتح ما بين دين ودين
نفحة محمدية دفئاً كالضريح
ميضنة كم تلالي جيداً في اليالي
مجداً في الاعالي
مريم والمسيح
قلباً نبضو واصل ما بين جيل جيل
ما بين كان وحاصل او ما قد يكون
ما بتشوف فواصل الا الذكريات
وآلام المفاصل بعضاً من شجون
يابا مع السلامة يا سكة سلامة
في الحزن المطير

شكرا ايمان الحاج علي مرورك