الوالي يوجه بحل مشاكل الركشات بالحصاحيصا ( توجد فرحة )

كل التحايا لجميع الناس الطيبين ،،

الناس اللتم إختزال فقرهم ومسغبتـهم ،،

مرضـهم وموتـهم ،،

جهلـهم وتغبيش عقولـهم ،،

إختزال كل ذلك في ركشة صغيرة ،،

معروشة بشموخ ايدينا ،،

وعشان شنو ؟؟

أصوات إنتخابية ؟؟

يا خي شيلوا الأصوات العايزنـها ،،

وفوزوا ،،

وأهتفوا ،،

وأفرحوا ،،

هزوا وتِبوا وزغردوا ،،

أعملوا الدايرنو ،،

بس ما تفتكروا يا ناس المؤتمر بأننا سذج وبلهاء ،،

ورخيسين لـهذه الدرجة ،،



حسب الدراسة المشار إليـها إتضح بأن معظم أصحاب الركشات ينحدرون من فاقد المؤسسات الإقتصادية التي تمت إحالتـها للصالح العام وغتس وما قلع ليوم الليلة ، " المصانع والمحالج والمشروع ".

والوالي كان وين جائي مع بداية الحملات الانتخابية عشان يدينا تراخيص ندور بيـها ركشات ؟؟ ما كان يجيبا من قاصرا ويشوف لماذا فاقت أعداد أصحاب الركشات صفق شجر النيم في الحصاحيصا.

وإذا كان محسوبي المؤتمر بتعاملوا معانا بإعتبارنا شفع صغار وبناكل في أصابعنا فما حقو معتصم جعفر كمان ياكل أصبعوا قدام الوالي ، فكان يكلمو أو يذكروا يقول ليهو يا سعادة الوالي المشكلة ما ركشة المشكلة في الشعب الطشا ، وبقى ما هو عارف قدموا المفارق لخطوات الأمم المتسارعة نحو الرفاهية والعزة والكرامة.

معقولة يا جماعة الوالي يبيع أو يسكت على البيوعات التمت للمؤسسات الاقتصادية ويجي الآن يقول لينا خلاص إذهبوا فأنتم الطلقاء وسوقوا الركشات بتراخيص مدفوعة الرسم من دم قلب مواطن غلبان؟؟ .

الاخ الغالي والله مشتاقين جداً
يالمحبوب انت لجنة الاحتفالات ما عملت دراسه للمشكله دي
لماذا لم تمنعهم عن قيام لجنه ما دام الموضوع هامشي للدرجه دي
لماذا لم تنتقدها ,,,ياخي الركشه دي بتعيش اسرة لا تملك مصدر
رزق وتفتقد رب الاسره ,,,,,,,,,,,,,,,,,,
وهذا الخبر بالنسبه لهم فرج من كريم ......
زكرتني مقولت....
واقفين تحننوا راكبين تجننوا.....
وامسكوا الخشب...الدكتور بداء قبل النتيجة دي معناها هو
واثق في الفوز وبداء ليكم بالركشات,,,,,,
المره دي لعب باص القون للوالي لكن المره الجايه بعكسه من الكورنه بتخش زي {داكوتا}زمان ......
ساعدونا بالسكات والمويه البارده

سبحان الله يا محبوب

يا أنور طمنا عليك ياخي ،،

وظاهر عليك رايق ،،

وبتتريق كمان ،،

ياخي مبروك عليكم المؤتمر الوطني ،،

وإن شاء الله يربى في عزكم والأحزاب كلـها ما تـهزكم ،،

وبعدين يا أنور في كلامك تلميح ،،

يظهرني بمظهر الساخر من الركشات ،،

فالأيادي الشامخة لا يمكن أن تصبح محل تندر ،،

وأنا لم ولن أسخر من الركشات،،

لكن بسخر من الوالي ،،

فلو جاد في تقديم حلول كان يبدأ بسبب الداء ،،

شنو الجعل الحصاحيصا مخزن كبير للركشات !!

ولو الوالي ما عارف كان معتصم يوريهو ،،

وإذا الدراسة توصلت لمقترح تنظيم التراخيص إبقى الوالي أضاف شنو ؟؟

ونساعدك بالسكات والمويه البارده دي ساهلة وربنا يقدرنا ،،



الأخ الفاضل بدر عباس كتب ((سبحان الله يا محبوب )).

فوالله ما فهمت قصدك يا أخي بدر ،،

ولو كان بتعتقد بأنني بسخر من الركشات ،،

زي أنور ما قال ،،

صدقني حا أراجع المداخلة ،،

وببقى على إستعداد لسحبـها ،،

والإعتذار سيكون مصحوباً ،،

الاخ المحبوب اولا انا لم اسخر من مداخلتك بل بالعكس وانت ا يا سيدى لو طلعت للموضوع فا نا لم اسميه كما سماه كاتب البوست /وراق بل اعطيته اسم اخر :با جعفر دوت كوم (واللبيب بالاشارة يفهم )

حسن وراق حسن كتب:

صرح الدكتور معتصم جعفر في محادثة هاتفية مع ( الحصاحيصا دوت كوم )بانه تباحث مع السيد البروف الزبير بشير طه بشأن مشكلة اصحاب الركشات بالحصاحيصا والتي كانت اللجنة المنظمة لاحتفالات الشمعة الاولي للحصاحيصا دوت كوم قد تقدمت بدراسة حول هذه المشكلة هذا وقد اسفرت نتيجة القاء مع الوالي عقب تدشين الحملة الانتخابية بود الفادني عن توجيه مدير الشرطة بالحصاحيصا بحل جميع مشاكل اصحاب الركشات بالحصاحيصا وعلي راسها ترخيص جميع الركشات غير المرخصة .

[b]الاخ / حسن وراق

السياسيون و المثقفون هم السبب الرئسى فى تخلف السودان...... لانهم فى سبيل المصالح الذاتية و الشخصية مستعدين يبعوا الوطن...... انا حتى الان ماعارفك مع ياتو حزب .... مرة معارضة و مرة مؤتمر وطنى ومرة تهاجم محلية الحصاحيصا ومرة تقدم لهم دعوة لحضور احتفالات المنتدى ..... و اللة حيرتونا.

ام بخصوص الركشات كنت قبل الدخول للمنتدى .... قرأت تصريح فى جريدة الحياة الصادرة فى المملكةالعربية السعودية للسيد الصادق المهدى..... (دعا فية انصار الفريقيين و الناخبيين لقبول التبرعات التى يقدمها الحزب الحاكم باعتبارها غنيمة ساقها الله اليكم.... ثم التصويت بما يحكم الضمير) .

يا ابناء الحصاحيصا ..... لا ترفضوا التبرعات و تخفيض رسوم ترخيص الركشات لانها هى حقوقكم؟؟؟؟؟؟؟؟؟
وبعدها صوتوا بما يحكم ضميركم

يا ود اللوا تقصد ناكل ثورنا وندى زولنا ليك علينا نسويها امكن نرجع حاجة من الماكليننا ليهو من ما نطوا علينا فى 30 من يونيو 89

حسن وراق حسن كتب:

يا ود اللوا
سلام
والله نحير عشرة زيك ودا المطلوب ان تحتار
علي ان اورد الخبر مجرد
وعليك التعليق
ان تعرف حزبي لا يغير في الموقف كثيرا
الخبر يهم الجميع و بمختلف انتماءاتهم العقائدية والحزبية والموقع للجميع وانا اورد المادة للجميع واي زول يشيل مقصوا ويفصل علي مقاسوا ويا ود اللوا ساعدنا بالفهم اسع لو ركزت علي اخبار الوطني او الشيوعي او اي حزب آخر يصبح الموقع موجه الجميع يريد المادة المجردة من الانتماء ويا بورداب عوووووووك حلوني من ود اللواء دا عاوز يرفع كثافتي يلخبط في الكيمان في دعوتنا للمسئولين في المحلية لانهم السلطة الحاكمة شئنا ام ابينا والواجب والاتكيت يقول ذلك وكل ذلك لا يمنع نقدهم
والله شنو يا جماعة
غايتو يحلنا الحل بلة.. ولو لنت يا ود اللوا بتكره الحكومة والمؤتمر الوطني في ناس عكسك يجب ان نحترم وجهة نظرهم ونوفر لهم المعلومة مجردة ولا نحجب عنهم ما يعضد انتماءهم وتوجههم وهكذ ديمقراطية ..
والله يا ود اللوا قومت نفسي والحمدالله مابقيت ود المشير كان جبت خبري والله شنو؟؟

[b]السيد / حسن وراق
بقيت تقول عووووووووووووك........ هذة هى الديمقراطية لا يصح لا الصحيح...... حيث يكون الكلام على المكشوف فى الهواء الطلق و الرا ى والراى الاخر..... وبعدين يا استاذ حسن وراق مالو تفسك قصير دى اول جكة....... منو القال ليك اننى اكرة الحكومة و المؤتمر الوطنى يعنى فى هذا الزمن تهم جاهزة؟؟؟؟؟؟؟؟؟؟؟

سؤال لا اريد اجابة من الاخ / حسن وراق بل من الشعب السودانى وابناء الحصاحيصا ...... ماهو الفرق بين الاستاذ حسن وراق و الاستاذ المحامى غازى سليمان ؟؟؟؟؟؟؟؟؟؟؟؟؟

حافظ أحمد كتب:

طـــــــــول بالك
وقصر قلمك

سيك سيك
معلق فيييييييييك
و الله يا حسن وراق
ومن معرفتي بيكم انتم الاثنين
انت في وادي وود اللوا في وادي
كل الــــود
وكلنا حصاحيصا

يا حافظ اللبيب باشارة يفهم ورسالتك وصلت من زمان و لاتحتاج لشرح لان الشيطان يكمن في التفاصيل وارجو ان لا نبعد انفسنا عن ما يفيد ونتلقي الحجج ونصبح انصرافيين .. كان هذا المجهود اولي به بوست جديد ونافع علي نافع ولا داعي للعودة الجبرية!!
ودام صفاك موفور
وكلنا حصاحيصا
وكلنا محترمين

الاخوان وداللؤا/حافظ/حسن
هدؤا اللعب الموضوع موضوع ركشات ما تطلعوا منه...
اخي المحبوب اولاً لا علاقه لي بالموتمر الوطني ابداً لكن اريد فوز الدكتور معتصم
لنه ابن الحصاحيصا ...وهو اولي ورجل مناسب من كل النواحي ....
ثانياً انا لم اسخر منك ياعزيز لكن هناك من يعانوا من عدم ترخيص الركشات وده فرج وخير لهم
لا ولم اسخر منك.....[right][justify]

اخي المحبوب اولاً لا علاقه لي بالموتمر الوطني ابداً لكن اريد فوز الدكتور معتصم
لنه ابن الحصاحيصا ...وهو اولي ورجل مناسب من كل النواحي ....
طيب يا انور مامون على عطا المولى ود القوز ولاشنو؟

بدريتو يا خطير
لاس فلاتاس كيف ؟؟

عزيزي أنور ،،

في الأول طمنا عليك ،،



أولاً :

نبدأ بكلامك الفوق دا ،،

(( ...... لا علاقه لي بالموتمر الوطني ابداً .....)) !!

كيف ما عندك علاقة بالمؤتمر الوطني ،،

وهو إنت قايل العلاقات بالتنظيمات السياسية دي علاقات نسب ولا شنو ؟؟

لا يا عزيزي الفاضل فالعلاقة بالتنظيم السياسي علاقة من نوع خاص ،،

فالتنظيم السياسي عبارة عن حزب ،،

إجتمع فيه أفراد أو مجموعة ناس بالضرورة ،،

يربط بينـهم إطار فكري وتنظيمي ،،

بـهدف الوصول للسلطة وتحقيق برنامجـهم ،،

ولواعي التعقيب على ردك ،،

فسنفترض بأن المؤتمر الوطني حزب سياسي ،،

وسنتجاوز عن فلسفتـهم للحكم ووسائل الوصول إليه ،،

فـهدفـهم الوصول للسلطة "فلنقل" بالوسائل السلمية "الانتخابات" ،،

فلمن تجي إنت بجلالة قدرك تقول بإنك حا تقيف مع الأفراد ديل ،،

فـهذا يعني بأنك وضعت نفسك في الإطار الفكري لهذا الحزب ،،

حتى لو لم يتم التأطير التنظيمي أي دخولك كفرد منظم ،،

وهدف الوصول للسلطة دا إنت ما بتنكرو بدليل إنك قلت داير تساند الدكتور ،،

وبذلك فإنك مؤتمر وطني بجدارة لا يؤثر في صحة ذلك عدم منحك بطاقة العضوية ،،

وأرجو أن تنتبه لحقيقة كون المؤتمر ما محتاج أصلاً عشان تشيل بطاقة عضويته ،،

طالما تحملت عبْ المساندة والمساعدة في وصولـهم للسلطة ،،

وبالتالي تحقيق برنامجـهم المعروف لدي ولديك ،،

وعلى فكرة ناس المؤتمر ما إتبعوا سياسة الخم السياسي دي عبط ،،

لا لالالا يا أنور ،،

فهم غير معنيين بتطوير وتنمية المفاهيم السياسية ،،

ولا معنيين بترقية المفاهيم المتعلقة بالدولة أو المجتمع في الإطار المتعارف عليه ،،

ودا معناه بإختصار شديد أرجو ألا يخل بالمعنى ،،

يصلوا السلطة ،،

على أكتاف ناس زيك غير منضوين تحت عباءة تنظيمهم السياسي ،،

بعد يصلوا السلطة يعملوا الدايرين يعملوه ،،

ويصبح الحزب ،،

المجتمع ،،

والحكومة ،،

والدولة في تمام الوقت وكماله ،،

أها ورينا يا أنور بتقدر تقول ليـهم تلت التلاتة كم ؟؟

ما إنت ما عندك بيـهم علاقة تحسابـهم فوق أم كم ؟؟

عزيزي الفاضل أنور إنت متابعني ولا بتقرأ في الجريدة ،،



نجي لحجتك التانية المتعلقة بمساندتك لدكتور معتصم ،،

وفي الحقيقة حقو نقول عليهو مرشح المؤتمر الوطني ،،

بدلاً من الإشارة إليه بالإسم ،،

لأنو مرشح من حزب سياسي ،،

وما طرح لينا ليوم الليلة ما يشي بأنه " معتصم " حزب سياسي لحاله ،،

ولا ينبغي له أن يكون زي ما قلنا ،،

لأنه فرد والحزب مجموعة أفراد زي ما قلنا ،،

وما أظنك منتظرني أعدد ليك مساوي و/أو مآسي المؤتمر كحزب ،،

وكونك تريد الفوز لمرشح المؤتمر الوطني ،،

فإنك تكرس بشكل أو بآخر أردت أو لم ترد ،،

تكرس للدكتاتورية والشمولية في أقبح صورها على الإطلاق ،،

تكرس لإفقار الشعب السوداني بتبديد كافة ثرواته ،،

فإن كانت الثروة تعني فيما تعني الثروات المادية والثقافية ،،

فإفقار الشعب بتشويه موروثه الثقافي ،،

والعمل على تقييد حريته في التعبير عن إبداعاته الثقافية أكثر مضاضة ،،

وكون المرشح من الحصاحيصا ،،

فهنالك مرشح آخر من الحصاحيصا حا تقسم ليهو صوتك ولا كيف الدبارة ،،


ثانياً :



ذكرت يا أخي الفاضل بأنك لم تسخر مني ،،

أنا ما قلت ليك إنت سخرت مني ،،

قلت ليك بأن كلامك بظهرني بمظهر الذي يسخر من الركشات ،،

ووالله العظيم أنا كان في ذهني بأن شخص زي الوالي قمة هرم السلطة التنفيذية في الولاية ،،

لمن يسكت على الظلم الحاق بأصحاب الركشات إبتداءً ،،

ببيع مؤسساتـهم الاقتصادية ،،

مصانع دقيق وقمح ومشروع جزيرة وخلافه ،،

ما ينتظر مني أنا شخصياً أصفق ليهو نـهائيــــاً ،،

حتى لو أداني أو رخص لي ركشه بمكنة هينو ZY على خط الخرطوم بورسودان ،،

وبعدين أنا ما قلت ما يفرحو بالفرج والخير ،،

يفرحوا لكن الوالي يفرح لشنو ؟؟

ودمت أخي الفاضل ،،

وأعذرني إن أطلت ،، ولك شكري وتقديري

الاساتذة حسن / محبوب والاخوة المتداخلين

لدي ملاحظة بسيطة جدا وهي تقول ( بأفتراض اننا سنحل كل مشكلة بعد طرحها من داخل منتدي الحصاحيصا اكرر كل مشكلة وبنهج ان معتصم اتصل والوالي استجاب (قبل او بعد الانتخابات ) فليستعد المنتدي لوضع تصور لحل كل مشاكل المدينة والتي هي بالضرورة مشاكل كل السودان (نسخة طبق الاصل) وليستعد معتصم ويعبئ تلفونو .
ياحلوين ... آن الاوآن لنكون اكثر واقعية فمشكلة النظام (المغتصب) وتجربته التي استعان فيها (بالفاشلين المصعدين ) علي هرم الخدمة المدنية والعسكرية والغياب التام (لتفعيل القانون) وما تبعه من استباحة للمال العام وانتشار لفساد دولة لم يعرف السودان له مثيل بتاريخه هو الذي ادي لظهورمشاكل هيكلية لا ولن يسع المجال لذكرها وذلك لسبب واحد وهو انها شملت كل مناحي الحياة ( من البطن الي القبر ) .
نريد نظاما ديمقراطيا ... بالمقام الاول ، نظام يسمح لنا بأن نحارب لاجل اعادة تشغيل مصنع الصداقة واعادة هدير ماربلس وركوب الترماج وووو واراضي الحصاحيصا وووو ومشكلة المسجد العتيق ووووو مشكلة تعيين الخريجين ومناقشة تقرير المراجع العام .

( معا لاسقاط عصابة يونيو )