أي زول ما عندو علاقه بالسياسه يخش هنا

المحبوب في غيبتك المشاكل كترت
الكهارب والقهوه مغشوشه ود نمر خالطه بحاجه
وبركه سجناهووووو.
والبلاك خربانه..

رحاب قسم الباري كتب:

المحبوب في غيبتك المشاكل كترت
الكهارب والقهوه مغشوشه ود نمر خالطه بحاجه
وبركه سجناهووووو.
والبلاك خربانه..

ألفا عليك يا رحاب كان ما المدام صاحبتك

أبو رائد كتب:

رحاب قسم الباري كتب:

المحبوب في غيبتك المشاكل كترت
الكهارب والقهوه مغشوشه ود نمر خالطه بحاجه
وبركه سجناهووووو.
والبلاك خربانه..

ألفا عليك يا رحاب كان ما المدام صاحبتك

اتقيض علي متلبسه..
ويامدام انا اقصد ود نمر جارنا بالحيطه دسكو..
براءه ياابورايد.

السلام عليكم يا السائق القطر ويابتنا هبوية اها انا جيتكم بس اوعى من الكروت الحمر .
اها نخش ليكم بقصة كده ظريفة زكرنا ليها ابو رائد (رائد حرس صيد) . يسم الله نبدأ:
فى اوائل الالفية الثانية قبل الطلاق بين الجماعة (امك فاول سياسى ) معليش ما بنكررة تانى انا زولا برلووم فى البوست ده سماح هبة اوكى
كانت شركتنا تقوم بتنفيذ عطاء شحن السكر من مصانع السكر فى النيل الابيض (كنانة وعسلايا) الى مخازن المؤسسة بالابيض وام روابة وكانت شاحنات الشركة بعد الشحن تمر بالنقطة الغربية بكوستى على الطريق القومى كوستى - الابيض وطبعا هذه النقطة نقطة تفتيش مكروهة للسواقين وبعانوا فيها كثير شئ جمارك وشئ منفستو وشئ رسوم عبور وشئ رسوم ملاحظة والى اخر ما فى القاموس الجبائى الانقاذى (فاول تانى) المهم السواقين كانوا بمشوا حالهم مع الجماعة عشان ما يتاخروا ويعاكسوهم خاصة ناس ود عيسى الله يطراهو بالخير (ما الخير ود التليل )ولاالخير (الميكانيكى) النقطة الغربية دى مشهورة رأسمالك خيشة وشعبة وكرسى وطربيزة ولوحة مكتوبة بمسواك مغمس فى علبة بوهية -دمغة جريح -دمغة هواء -دعم طلاب -اى حاجة والسلام وتلبس كاكى وكده الشغل بمشى المساء تلم راكوبتك وتتخارج المهم واحد من سواقينا كان مفتح شوية وبتاع مشاكل وطوالى بعمل شمطة فى النقطة دى والجماعة مرات بفوتوهو لمن العربات تكون كثيرة عشان ما يحرض الباقين والمعلوم ينقص ومرات لمن السوق اكون نائم بملصوه تمام وبعاكسوهو شئ تفتيش ولابس شنو سفنجة ولا جزمة وشغل الاشارات والمنشات وطفاية الحريق والذى منه وطبعا هو لميض المهم مرة بعد ما مر على الجبايات دى كلها ومشى اسوق الشاحنة بتاعتو وهو يشخط وينبذ صفر ليهو واحد لابس حرس صيد قال ليهو اقيف يا اخينا ماش وين ؟ وشائل شنو؟؟ ...
رد عليهو سواقنا اللميض ماشى الابيض وشائل فيل ..
عسكرى حرس الصيد حمر ليهو وقال ليهو امشى ظاهر عليك لئيم ما تخرب لينا اليوم
اها يا هبة وبركة بتدونى انا واخوى الكاشف تزاكر ركوب اكرامية ؟

الله يامبارك الزول وصل تعال بي سرعه
الزول ده الا انتا البتقدر عليه ......
ده كل من ابو رائد جاب لينا الهواء هو ورحاب
نحنه قفلنا الباب بدري لكن هم الجو فتحوه تاني
يا مبارك يامبارك يابوليس يابوليس الحق الزول
الخطر وصل

رحاب ابو رايد يجهجهك قدر دا
افا عليك
بعدين مسئولة من الخير ات هبة بتمش وين
نحن الليل كلو نحاحي ليها في الكواكب احتفلوا بالقمر
وانور دا مالو بكورك
مبارك تلقاه يغني اسي
ات الله ماليك
يابدر عليك الله البوست شوفو لذيذ كيف
ما احسن من بي هنك
ياخي رايك شنو نقعد هنا
مالنا ومال وجع الدماغ

يابدر يااخوى انا اول مشاركه لي فهذا البوست كاتبه
المؤتمر الوطنى مخترع ...
ياهو زي دمغه الجريح,, ولو عاوز تسافرمن الخرطوم لاي مدينه تدخل مبنى الميناء
لدقائق بقروش,, وتدخل من مدينه لمدينه بقروش
والمستشفى تدخله بقروش .. انا خايفه ع الهواء يبقى بقروش..
ويا انور اكيد بركه فاصل ليه في حته..
ويالمجبوب ده ودنمر بياكلو جم.... واكيد مدامو اتعادت
المحبوب هبه دي لو ماقادره ع البوست ده تقول
نحن الشيله بنشيلها.

والنظام العام وبسط الامن الشامل
والشرطه الشعبيه والخدمه الوطنيه قالو مايقولو الالزميه
والهدف ولبس عساكراشكال والوان..
والاختراع الاكبر الجمره الخبيثه مره سالت جابوها من وين قالو ليبيا عاملاها ماعارفه صحي ولاكذب
هبه ماتفهميني غلط دي ماسياسه اختراع اختراع..

يا جماعة الخير انتو سواقين القطر ديل فاتوا وين ركبونا معاهم وناموا ولا شنو يااخوانا ؟؟ المحبوب اخوى الهمبريب بتاع الكنار والشى المر داك بتاع الحلاوين ظاهر نوم السواق ولا طشا شبكة وربك استر ما اتكامل بينا الكنار ده ولحقنا لورى حاج الصديق ود المبارك عارف قصته ولا احكيها ليك ؟
زمان اول ما ظهرت اللوارى الهوستين اهلنا ناس الجزيرة ربنا يعيد عمارها تانى من جديد واجازى الكان السبب (ده فاول مش كده) معليش ممنوع السياسة اعفوا لينا اخوكم اشتر لسع لنج .المهم بعض اهلنا الطيبين ديل باعوا بقرهم وجرى على الخرطوم واشتروا اللوارى بالاقساط والموسم كان تمام القطن مالى اشللة والخير باسط تب والترحيل فاتح من الجزيرة الى محالج كوستى والاجرة للدور دوبلى ماشى راجع وانتا ومجهودك اها عمنا ا حاج الصديق من الناس الاشتروا لورى وكان من المشهورين فى المنطقة بتاعتوا بالشفقة يعنى زول شفقان بالحيل جاب ليهو سواق من البساتنة عشان اسوق ليهو اللورى المهم حاج الصديق بقى راكب مع السواق ده ليل نهار ومعذب ليك ود جبارة ده اسم السواق بتاعو مسك ليك السواق نقل قطن من من نمر المشروع الى محالج كوستى جرى شديد بالاسكيف ونهر فى ود جبارة الكع بسرعة اللورى ده عليهو اقساط وود جبارة 3 يوم بالكامل ماشاف النوم الاكل فى تلتلة شراب الموية درب بالمناسبة عمنا حاج الصديق مخترع الدرب من قربة الموية المعلقة فى اللورى واول من عمل ليها بوز من قزازة البيرة ابو جمل والشراب اسكوب يعنى حقو ادوهوه براءة الاختراع باثر رجعى المهم بعد 3 ايام سواقة لود جبارة من غير راحة ولا نوم وهو راجع من كوستى بعد تفريغ شحنة قطن فى المحالج هناك ومع لفات الكنار والهمبريب بدأ يدقس وطوطح فى اللورى مرة شمال ومرة يمين عمك حاج الصديق كل مرة انهروا اصحا يا زول الكع اللورى عليهو اقساط نتلافى لينا دور دورين بسرعة النوم ملحوق المهم جمب كبرى بخيت ود جبارة نام عديل فى الدركسون من التعب حاج الصديق راح مولع ليهو البطارية البورش فى عينو وقال ليهو يازول انت نمتا مع صحية ود جبارة ونور البطارية فى عينو راح كافى اللورى فى الكنار المهم اللورى راح وعمنا حاج الصديق غرق رحمه الله والبوليس مسك ودجبارة على زمة التحقيق وسألوهو يازول كفيت اللورى فى الكنار دة كيف انت سكران ولا شنو؟ رد عليهم ابدا والله شالتنى دقسة ساكت صحيت بنور البطارية حقت المرحوم فى عينى قايلوا قطر داخل علينا لفيت الدركسون شمال وهاك يا الكنار اها من اليوم داك سمو اللورى الهوستن شفقة حاج الصديق
كفاكم مش كده المحبوب شوف بركة ده خلى اهدى السرعة شوية ما يلحقنا حاج الصديق قالوا فى عرس قريب ده من داخل دوت كوم .

سلام دحين دى مالخيمه حقت السياسه ياولد انت ياود احسان بت النعمه بت فضلالله تعال حبوبتك مابتشوف سمح تعال دخلنى على خيمة السياسه الساواها البنيه هبه بت سعاد الطيب ود الامين باقى ياولدى بدور انزل فى الانتخابات ودايراها تسوى لى الحمله من
الخيمه دى .اجى ياربى انا غلطانه دى خيمه حفلة نانسى عقرب .لالا دحين ياوليد داه ما المحبوب ود الصداقه (القصيرالسمين ده)
واب قميص اصفر الطويل مامبارك ود صليحه البقولو ليهو ناس صداح (الربو اذا شك القميص)تب انا كان كدى وصلت

والجنى القليد ده مابدر ودابونوره وداك صداح وليد فاروق برى برى تنرانى ماضهبانه وداك ماراشد ودمحمد الجاك

والله تب الحمله ناجحه وانت ياود احسان ماك عارفنا نحن ماناس كضب ولاقتل ولاتشريد وبنوزع الفرص بالتساوى للبستحقها

نحن لابندفع قرش ولاخدمه اخلاقنا وسمعتنا بتجيب الناس .

وينى البت دى يابت ياهبه يلا ابدى الحمله

سياسه . اكل . شراب . صحه . تعليم . تغير . استقرار . رفاهيه .

اه ودعتكم الله وكتر خيركم

كدى اول حاجه ... بدر ده كان عنده مشكله مع العيون .. من دخل معاكم بقت فى الراس .. قولوا ليهو فك الراس نحن الباقى بنقدر عليهو .. يا بت الحصاحيصا ... انتى السبب ... نحن زولنا ما بنخليهوا .. وانتى مبروك عليك كبير كومك بالمحبوب ... مبارك راسه خفيف .. بقدر عليهو .. المحبوب ده عايز ليهو حكه راس ...

وانا جديدة (كرت) لكن مااحمل وبقول (س) يعني سلام

اها تقول شنو يا مبارك في سياستي.. قصدي سلامي ده ؟

بت امها كتب:

وانا جديدة (كرت) لكن مااحمل وبقول (س) يعني سلام

اها تقول شنو يا مبارك في سياستي.. قصدي سلامي ده ؟

...........
( كرت كرتونه) ههههههههه
سلامك فيهو سلام
وفيهو فهم وكلام
وانتي خاتيه الملام
وكان تاورك ( ضرسك)
بنكلم ليك دكتور سلام
( سلام قوليب)
ابقي لي جوه .. والسين دي ختي فيها تلاته نقاط عشان نقنع هبة انو مافيها سياسة

بت امها ومبارك سلام ..كيفكم ؟ اخباركم ؟
مبارك الكتاب وصلك ولا لسه ؟ لان خالد استلم.
افتكر دا كلام خارج السياسة !!

عاطف اسماعيل كتب:

بت امها ومبارك سلام ..كيفكم ؟ اخباركم ؟
مبارك الكتاب وصلك ولا لسه ؟ لان خالد استلم.
افتكر دا كلام خارج السياسة !!

...........
ماوصلني
انتا مرسلو ( بي كرعينو) ولا شنو