الليل واخره- نهار ميتذل وصحو بلا غفوة

[b]مدخل اول:-
الا ايها الليل الطويل الا انجلى وما الاصباح عنك بأمثل
فى تمام السادسة صباحا يكون استيقاظ الموظف فى الارض
يبحث عن نعاله وفرشاة الاسنان
المعجون كتب عليه بعبارة انيقة:-
( صنع فى انجلترا)
نفس العبارة يوميا اقرأها على سطح أنبوب المعجون
واتسائل فى سرى يوميا ( الانجليز ديل جنوا)
احتسى الشاى بينما استمع للنشرة بتاعت ستة ونص
بعدها دعاية عن بسكويت... وشاى.... واتصالات بالكوم
لا يرعوى بالى الا لتلك الدعاية التى يقول مطلعها:-
(يسلموا ملوك الشاى)
وتردد الفتيات فى الدعاية بغنج شديد:-
(شاى شاى )
استغفر الله
والله فترنا من الدعايات
خاربة علينا اى حاجة
مع انو انا لى عشرة سنوات ما قاعد احضر لى مسلسل
والمرة برضو
وذلك فضل الله يؤتيه من يشاء
النهار يحتشد بكميات من الضجيج
لذلك انا احب الليل
ما الليل واخره
الليل بس
اليس الليل هو من الهم الشعراء فكتبوا
واثروا الاذن السودانية بالاغانى الجميلة
الغنا السودانى ده كلو كاتبنو بالليل
هسة شفتو ليكم اغنية حلوة كتبوها بالنهار
حكى لى احد الشعراء المشهورين انه كان يتنظر الليل بفارغ الصبر ليكتب أغنياته ( وذكرياته)
والله عمر الجزلى ده صوتوا بالليل فرق كبير من صوتوا بالنهار
كدى احضروا برنامجه الجميل فى الاذاعة السودانية( اغنياتى ةذكرياتى)
عشان تتأكدوا من كلامى ده
والكورة حقت العصر ما زى كورة الليل
هسة هلال مريخ دى لو لعبوها بالنهار بتكون حلوة؟
طيب من قبيل انا قلت ليكم الليل سمح
وترباس قال : الليل بريدو الناس
والليل الليل مابنوموا انا حارس نجوموا كما غنى الكاشف عبقرى الاغنية السودانية
والعريس بغنوا ليهو( الليل ..ليل ) العديل والزين)
حصل لاقتكم سيرة عرس بالنهار؟
هسة لاقاكم شاعر غنى للنهار
النهار الحارده
والامثال السودانية معظمها عن الليل
اديكم مثال:
الليل غتى الجبال
مقطع اخير:-
ليالى بعد الظاعنين شكول طويل وليل العاشقين طويل
ليته قال ( يطول)
او كما قال الناقد شوقى ضيف
كمان قولوا ما بنعرف شوقى ضيف
والقاكم