يوم طلعت القمرة..الخير يا ابوى تودينا لى اهلنا بيسالوك مننا..

لو خلونا برانا..ومافى زول طرانا..شايقى اده شبال..لدنقلاويه طربانه..وجعلى اخدلو صوتين..من حلفاوى فى حفله رنانه..وبنى عامرى وهدندوى وبشارى واى شرقاوى فى جلسه جبنه بى هبهانه..وفوراوى وزغاوى ومعالى ورزيقى وهبانى وتعايشى و داجاوىومسيرى وكل اهلنا السمحين فى الغرب ..فى عزومه عصيده دخن بى ملاح مرس بى ويكاب معاهو كتحت كول جنبو سمن ماعز فيهو ابغازى..وعصير قضيم..ونخلى الناس شبعانه..ونتلفح شال حضاره نوبيه ونقدل من الجيلى لى حلفا القديمه وحلايب سودانيه ما مصريه وما بنخليها لو الجن جانا..وفى رجعتنا عقب ..شى تمر وشى فول وشمار وتوم وكسبره وبرتكان و قفتنا ملبانه..وفى امدر..امان والخرطوم وبحرى لى كل السودان النيل روانا..الجزيرة..شبعانه ..شبعانه ..خلوها لى زراعه..لى ناسها لى حيرانا..والنيل الابيض..بياضو بهانا..بخت الرضا ..خيرها..تاريخها كفانا..والجزيره ابا..رجالة تب غامرانا..وكنانه ..سكر ..عسل..سهولها ووديانا..وبطانه بى حيرانها..وكبدة ابل من تمبول وللعيشاب..لبنها سقانا..وسمك كوستى ما احلاهو..وسنار كان مدينة تقاطع لى ودالعباس ومايرنو ..ناس بالولف كاتلانا..سنجه والدمازين والروصيرص..زى طميهم ناس شتول رويانا..والكرمك وقيسان..عسلهم اصيل وكرمهم..مقليل زى العسل..جركانا..وجنوبنا الحبيب فى القلب جوانا.. وكان سبتو الغريب الفهمو لهبا ناره..اهلا خير جاكم جانا..........

الله يديك العافية اخونا مجدى الفاضل ...
بس السودان البتوصف فيهوا دا نلقى وين هسى ؟؟؟؟

هذا الشبل مجدي من ذاك الاسد الراحل المقيم الاستاذ الفاضل سعيد ..!!
هذه قطعة ادبية رائعة تصلح اوبريت تراثي فلكلوري!!
جيتن جيتا يامجدي قنب طولا عوافي دباويا مسكاقرو جيباك كومبو!!
وما تحرمنا من بيت الكلاوي زند ودوش وعكوة لذيذة فتة وبوش!!ا
لتحيات الطيبات لك
كيف الامور؟؟؟

مجدى الفاضل كتب:

لو خلونا برانا..ومافى زول طرانا..شايقى اده شبال..لدنقلاويه طربانه..وجعلى اخدلو صوتين..من حلفاوى فى حفله رنانه..وبنى عامرى وهدندوى وبشارى واى شرقاوى فى جلسه جبنه بى هبهانه..وفوراوى وزغاوى ومعالى ورزيقى وهبانى وتعايشى و داجاوىومسيرى وكل اهلنا السمحين فى الغرب ..فى عزومه عصيده دخن بى ملاح مرس بى ويكاب معاهو كتحت كول جنبو سمن ماعز فيهو ابغازى..وعصير قضيم..ونخلى الناس شبعانه..ونتلفح شال حضاره نوبيه ونقدل من الجيلى لى حلفا القديمه وحلايب سودانيه ما مصريه وما بنخليها لو الجن جانا..وفى رجعتنا عقب ..شى تمر وشى فول وشمار وتوم وكسبره وبرتكان و قفتنا ملبانه..وفى امدر..امان والخرطوم وبحرى لى كل السودان النيل روانا..الجزيرة..شبعانه ..شبعانه ..خلوها لى زراعه..لى ناسها لى حيرانا..والنيل الابيض..بياضو بهانا..بخت الرضا ..خيرها..تاريخها كفانا..والجزيره ابا..رجالة تب غامرانا..وكنانه ..سكر ..عسل..سهولها ووديانا..وبطانه بى حيرانها..وكبدة ابل من تمبول وللعيشاب..لبنها سقانا..وسمك كوستى ما احلاهو..وسنار كان مدينة تقاطع لى ودالعباس ومايرنو ..ناس بالولف كاتلانا..سنجه والدمازين والروصيرص..زى طميهم ناس شتول رويانا..والكرمك وقيسان..عسلهم اصيل وكرمهم..مقليل زى العسل..جركانا..وجنوبنا الحبيب فى القلب جوانا.. وكان سبتو الغريب الفهمو لهبا ناره..اهلا خير جاكم جانا..........

الأخ/ مجدي الفاضل وفقه الله
السلام عليكم ورحمة الله وبركاته وبعد،،،
هم ديل منو الما بخلونا ديل؟
وبرانا برانا برانا نشيل الشيلة، وبرضو ما بخلونا، سيك سيك معلق فيك
وجزاك الله خيراً

روعة واصالة وادب وجمال

تحية خالصة لأخونا مجدي الفاضل سعيد
وللإخوة المتداخلين ،،
ويالقرشي المابخلونا برانا ما ناس
قدرك قدرك

جيتاً جيت يامجدي ، ياهو دا السودان ،فريداً في تنوعه الاثني ،
وجغرافيته ،وثقافته الغذائية ، وتسامحه ، واصالته ،وشموخه،
والله اخوك مشتهي كل هذا التنوع ، وا شريري علي كبدة ابل من
تمبــــــــــــــــــــــول !!