تبروقه..وااه.. شوقا..مشلعيب شنو البعيب..

عنقريب هبابى تلاته كرعين مكعوجات..التالته جردل طلس قديم حق رحمتات..منجد سيور جاميكا مكروبات..منو اتنين ..تالتهم كراعو التالته طوبات..زير مويه اسود موهط نصو فى الارض ورقبتو موشحاها ترمات..شجرة نيمه ضالاهو عروقها من جوه الزير راضعاهو..باقيلا للحياة قبلات..واضتين خلف خلاف دون خلاف واقفات..طوفين تراب حدا المقابر شلناهم فى شوالات..وبى روث بهيماتنا مزبلات..مسقوفات..قول ..عروق ومرق وبروش وقنايات..شعبه.. السوس ماكل بطنها وايدينا لى الله مرفوعات..مطبخنا ادايات..وفى كل فتحة باب وطاقه ايات الله ..مطبوقات ..وبين كل شق وشق محشورات..والسحارة ممنوع القرب منها ده مخزن ابواتنا والحبوبات..فى اوضه ناصيتها من جوه تلاته رفوف خشبات..الرف الاول حنوط ودبلان ..كفن.. طارين الموت قبل الحياه ام قشات..الرف التانى كتب وراتب المهدى واوراد الختميه وابن كثيروكتاب قران وتفسيرات..الرف التالت شجرة الاهل..من جدنا ابو جدنا خال جدنا اشراف..ومن حبوبتنا حبوبه حبوبتنا بعانخيه ما بنخاف..ده من طرف ابوى الماجاف..ومن امى نوبية من اسوان من اثنا عزبة العسكر ما اجلاف..لى ناس الولى فى الابيض احلاف..وجدنا فى اردمتابالجنينه..حنيه لى هسع مافيها جفاف..وحبوبتنا من امنا دهمشيه من امها وابوها كاهلى ما رجاف ..دى شجرة كبيرةالاهل فيها اصناف.. اصناف..سودانى احمد الله ناشف زى شدرة الشاف ..والفقر عندى مابنعاف..اغبش عديل انشاف..وماتمومة جرتق اصلى ما بنضاف..وساعة الظلم بس جبل رجاف..ارغى اذبد وان هديت اخوك ات نسايم الطاف...

والعراقي من الساكوبيس والمكركوب كلودو فاشري , والكنتوش مشدود فوق اللدايات
والروب معلق فوق المشعليب , والخضار في الكابدلو, والمشاط السودان قفل
وشكرا لك اخي مجدي الفاضل

تجسيد عميق وسلس يامجدى ونامل ان تظل رصيدا دائما